ରାଜକୋଟ,୧୬।୨: ଇତିହାସ ରଚିଛନ୍ତି ଭାରତର ଭେଟେରାନ୍ ସ୍ପିନର ରବଚିନ୍ଦ୍ରନ ଅଶ୍ୱିନ। ଭାରତର ଦ୍ରୁତତମ ବୋଲର ଭାବେ ଟେଷ୍ଟ କ୍ରିକେଟରେ ସେ ୫୦୦ ଉଇକେଟ ପୂରଣ କରିଛନ୍ତି। ଇଂଲଣ୍ଡ ବିପକ୍ଷ ତୃତୀୟ ଟେଷ୍ଟର ଦ୍ୱିତୀୟ ଦିନରେ ଜ୍ୟାକ୍ କ୍ରାଉଲୀଙ୍କୁ ଆଉଟ କରିବା ପରେ ଅଶ୍ୱିନ ୫୦୦ ଉଇକେଟ କ୍ଲବରେ ନିଜକୁ ସାମିଲ କରିଛନ୍ତି।
ପୂର୍ବରୁ ଭାରତ-ଇଂଲଣ୍ଡ ଦ୍ୱିତୀୟ ଟେଷ୍ଟର ପ୍ରଥମ ଇନିଂସରେ ଅଶ୍ୱିନଙ୍କୁ କୌଣସି ଉଇକେଟ ମିଳି ନ ଥିଲା। ହେଲେ ଦ୍ୱିତୀୟ ଇନିଂସରେ ସେ ଜବରଦସ୍ତ ବୋଲିଂ କରି ୭୨ ରନ୍ ଦେଇ ୩ ଉଇକେଟ ନେବାରେ ସଫଳ ହୋଇଥିଲେ। ତେବେ ସେ ୫୦୦ ଉଇକେଟ କୀର୍ତ୍ତିମାନ ହାସଲ କରିବା ଠାରୁ ମାତ୍ର ଗୋଟିଏ ଉଇକେଟ ପଛରେ ଥିଲେ। ତାଙ୍କ ଉଇକେଟ ସଂଖ୍ୟା ୪୯୯ ଥିଲା। ଶେଷରେ ତାଙ୍କର ସ୍ବପ୍ନ ପୂରଣ ହୋଇଛି। ସେ ଭାରତର ଦ୍ରୁତତମ ବୋଲର ଭାବେ ୫୦୦ ଉଇକେଟ ହାସଲ କରିଛନ୍ତି। ପୂର୍ବରୁ ଏହି ରେକର୍ଡ କିମ୍ବଦନ୍ତୀ ସ୍ପିନର ଅନୀଲ କୁମ୍ବଲେ(୬୧୯ ଉଇକେଟ)ଙ୍କ ନାମରେ ଥିଲା।
କୁମ୍ବଲେ ୧୦୫ ମ୍ୟାଚ୍ରେ ୫୦୦ ଉଇକେଟ ନେଇଥିଲେ। କିନ୍ତୁ ଅଶ୍ୱିନ ୯୭ଟି ମ୍ୟାଚ୍ରେ ଏହି ସଫଳତା ହାସଲ କରିଛନ୍ତି। ଅଶ୍ୱିନ ଏବେ ଟେଷ୍ଟ କ୍ରିକେଟରେ ବିଶ୍ୱର ତୃତୀୟ ସଫଳ ଅଫ୍ ସ୍ପିନର ପାଲଟିଛନ୍ତି। ଶୀର୍ଷରେ ଶ୍ରୀଲଙ୍କାର ପୂର୍ବତନ ବୋଲର୍ ମୁରଲିଧରନ୍(୮୦୦) ଉଇକେଟ ସହ ଅଛନ୍ତି। ଦ୍ୱିତୀୟରେ ଅଷ୍ଟ୍ରେଲିଆର ଅଫ୍ ସ୍ପିନର ନାଥନ ଲିଓନ(୫୧୭) ଉଇକେଟ ରହିଛନ୍ତି।
