ନୂଆଦିଲ୍ଲୀ,୨୮।୧: ଦୀର୍ଘ ୧୧ ମାସ ପରେ ଘରୋଇ ମଇଦାନରେ ଖେଳିବାକୁ ଯାଉଛି ଟିମ୍ ଇଣ୍ଡିଆ। ନିକଟରେ ଅଷ୍ଟ୍ରେଲିଆ ବିପକ୍ଷ ସିରିଜ୍ ଜିତି ସ୍ବଦେଶ ପ୍ରତ୍ୟାବର୍ତ୍ତନ କରିଥିବା ଭାରତୀୟ ଟିମ୍ ଇଂଲଣ୍ଡ ବିପକ୍ଷରେ ଫେବୃୟାରୀରୁ ସିରିଜ୍ ଖେଳିବ। ୪ ବର୍ଷ ପୂର୍ବେ ଇଂଲଣ୍ଡକୁ ହରାଇ ଭାରତୀୟ ଦଳ ଇତିହାସ ରଚିଥିଲା। ପୁଣିଥରେ ଉଭୟ ଟିମ୍ଙ୍କ ମଧ୍ୟରେ ରୋମାଞ୍ଚକର ମୁକାବିଲା ଦେଖିବାକୁ ମିଳିବ ବୋଲି ପ୍ରଶଂସକ ଆଶା କରୁଛନ୍ତି।
ଇଂଲଣ୍ଡ ବିପକ୍ଷ ଗତ ସିରିଜ୍ରେ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ୨୮ ଉଇକେଟ ନେଇଥିଲେ। ନିକଟରେ ଅଷ୍ଟ୍ରେଲିଆ ଗସ୍ତରେ ସେ ୧୨ ଉଇକେଟ ନେଇ ସେ ଫର୍ମରେ ମଧ୍ୟ ଅଛନ୍ତି। ଏବେ ସେ ଟେଷ୍ଟ କ୍ରିକେଟରେ ୪୦୦ ଉଇକେଟର ଉପଲବ୍ଧିରୁ ୨୩ ଉଇକେଟ ଦୂରରେ ଅଛନ୍ତି। ଯଦି ପୂର୍ବଥର ଭଳି ଇଂଲଣ୍ଡ ବିପକ୍ଷରେ ଭଲ ପ୍ରଦର୍ଶନ କରନ୍ତି ତେବେ ସେ ଏହି ଉପଲବ୍ଧି ହାସଲ କରିପାରନ୍ତି। ମୁଥୟା ମୁରଲୀଧରନ୍ଙ୍କ ପରେ ସବୁଠାରୁ ଦ୍ରୁତଗତିରେ ୪୦୦ ଉଇକେଟର ଉପଲବ୍ଧି ହାସଲ କରିବା ୨ୟ ଖେଳାଳି ସେ ପାଲଟିବ। ମୁରଲୀଧରନ ନିଜର ୭୨ ଟେଷ୍ଟ ମ୍ୟାଚ୍ରେ ଏହା ହାସଲ କରିଥିଲେ।
