ନୂଆଦିଲ୍ଲୀ,୨୧।୧୧: ଭାରତର ଅନୁଭବୀ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ ପାକିସ୍ତାନର ଜଣେ ଖେଳାଳିଙ୍କ ପ୍ରଶଂସା କରିଛନ୍ତି। ତାଙ୍କର ଏଭଳି ବୟାନ ଏବେ ଭାଇରାଲ ହେଉଛି।
ପାକିସ୍ତାନ ଟିମ୍ର ଅଧିନାୟକ ତଥା ବ୍ୟାଟ୍ସମ୍ୟାନ୍ ବାବର ଆଜମଙ୍କ ପ୍ରଶଂସା କରି ଅଶ୍ୱିନ କହିଛନ୍ତି, ଜଣେ ଉଚ୍ଚ ମାନର ଖେଳାଳି ଦୀର୍ଘ ସମୟ ପରେ ପାକିସ୍ତାନୀ ଦଳରେ ଯୋଗ ଦେଇଛନ୍ତି। ତାଙ୍କ ନାମ ବାବର। ସେ ଜଣେ ‘ମିଲିୟନ ଡଲାର ପ୍ଲେୟାର’ ବୋଲି ଲାଗୁଛନ୍ତି। ତାଙ୍କର ଖେଳ ଦେଖିବାକୁ ଭଲ ଲାଗୁଛି ବୋଲି ସେ କହିଛନ୍ତି।
ବାବରଙ୍କ ଖେଳକୁ ଯଦି ଦେଖାଯାଏ ତେବେ, ଏହି ଖେଳାଳି ଏଯାବତ ୨୯ ଟେଷ୍ଟ ମ୍ୟାଚ୍ରେ ୨୦୪୫ ରନ୍, ୭୭ ଏକଦିବସୀୟ ମ୍ୟାଚ୍ରେ ୩୫୮୦ ଏବଂ ୪୪ ଟି-୨୦ ମ୍ୟାଚ୍ରେ ୧୬୮୧ ରନ୍ କରିଛନ୍ତି। ଏଥିରେ ୧୭ଟି ଶତକ ଏବଂ ୪୭ ଅର୍ଦ୍ଧଶତକ ରହିଛି। ଅନେକ ଥର ତାଙ୍କର ତୁଳନା ଭାରତର ଅଧିନାୟକ ବିରାଟ କୋହଲୀଙ୍କ ସହ କରାଯାଇଛି। ହେଲେ ବାସ୍ତବିକ ଦେଖିବାକୁ ଗଲେ ବିରାଟଙ୍କ ସମକକ୍ଷ ହେବାକୁ ହେଲେ ବାବରଙ୍କୁ ଆହୁରି ପରିଶ୍ରମ କରିବାକୁ ପଡ଼ିବ।