ମୁମ୍ବାଇ,୫।୧୨: ନ୍ୟୁଜିଲାଣ୍ଡ ବିପକ୍ଷରେ ଚାଲିଥିବା ଦ୍ୱିତୀୟ ତଥା ମୁମ୍ବାଇ ଟେଷ୍ଟର ତୃତୀୟ ଦିନରେ ୩ ଉଇକେଟ ନେଇ ଚଳିତ ବର୍ଷ ଟେଷ୍ଟ ଫର୍ମାଟରେ ୫୦ ଉଇକେଟ ପୂରଣ କରିଛନ୍ତି ଭାରତୀୟ ଅଫ୍ ସ୍ପିନର ରବିଚନ୍ଦ୍ରନ ଅଶ୍ୱିନ। ଏହାକୁ ମିଶାଇ ଅଶ୍ୱିନ କ୍ୟାରିୟରରେ ଚତୁର୍ଥ ଥର ପାଇଁ ବର୍ଷକୁ ୫୦ ଉଇକେଟ ନେଇଛନ୍ତି। ଏଥିପୂର୍ବରୁ ସେ ୨୦୧୫ରେ (୬୨ ଉଇକେଟ), ୨୦୧୬ (୭୨) ଓ ୨୦୧୭ (୫୬)ରେ ସେ ୫୦ରୁ ଅଧିକ ଟେଷ୍ଟ ଉଇକେଟ ହାତେଇଥିଲେ।
ଏହି ତାଲିକାରେ ଅଶ୍ୱିନ କିମ୍ବଦନ୍ତୀ ଲେଗ୍ ସ୍ପିନର ତଥା ପୂର୍ବତନ ଭାରତୀୟ ଅଧିନାୟକ ଅନିଲ କୁମ୍ବଲେ ଏବଂ ହରଭଜନ ସିଂ(ଭଜି)ଙ୍କୁ ପଛରେ ପକାଇ ଦେଇଛନ୍ତି। ଦୁଇ ପୂର୍ବତନ ଭାରତୀୟ ସ୍ପିନର ତିନି ଥର ବର୍ଷକୁ ୫୦ରୁ ଅଧିକ ଉଇକେଟ ନେଇଥିଲେ। ଭେଟେରାନ ସ୍ପିନର ଭଜି ୨୦୦୧, ୨୦୦୨ ଓ ୨୦୦୮ରେ ୫୦ରୁ ଅଧିକ ଉଇକେଟ ନେଇଥିବା ବେଳେ କୁମ୍ବଲେ ୧୯୯୯, ୨୦୦୪ ଓ ୨୦୦୬ରେ ଏହି ସଫଳତା ପାଇଥିଲେ। ଏହି ତାଲିକାରେ ରହିଛନ୍ତି ପୂର୍ବତନ ଭାରତୀୟ ଅଧିନାୟକ କପିଳ ଦେବ। ସେ ୧୯୭୯ ଓ ୧୯୮୩ରେ ୫୦ରୁ ଅଧିକ ଟେଷ୍ଟ ଉଇକେଟ ହାସଲ କରିଥିଲେ।