ଭାରତ ଏବଂ ଇଂଲଣ୍ଡ ମଧ୍ୟରେ ଟେଷ୍ଟ ସିରିଜ ଶେଷ ହୋଇଛି। ୪ଟି ମ୍ୟାଚରେ ୩୨ ଉଇକେଟ ଏବଂ ଗୋଟିଏ ଶତକ ମାରିଥିବା ରବିଚନ୍ଦ୍ରନ ଅଶ୍ୱିନଙ୍କୁ ମ୍ୟାନ ଅଫ ଦି ସିରିଜ ପୁରସ୍କାର ପ୍ରଦାନ କରାଯାଇଥିଲା। ଏବେ ଅଶ୍ୱିନ ନିଜ ଘରକୁ ଫେରିବାକୁ ପ୍ରସ୍ତୁତ ହେଉଥିବାବେଳେ ତାଙ୍କ ସ୍ତ୍ରୀ ପ୍ରୀତି ନାରାୟଣନ ମଧ୍ୟ ଉତ୍ସାହର ସହିତ ଅପେକ୍ଷା କରିଛନ୍ତି। ପ୍ରୀତି ଅଶ୍ୱିନଙ୍କ ଏକ ଫଟୋ ସହ ଟୁଇଟ୍ କରି ଲେଖିଛନ୍ତି, ଶୀଘ୍ର ବାୟୋ ବବୁଲ୍ ଭାଙ୍ଗି ଘରକୁ ଆସ। ଏଥିରୁ ସ୍ବାମୀଙ୍କୁ କେତେ ସେ ମିସ୍ କରୁଛନ୍ତି ତାହା ସ୍ପଷ୍ଟ ହୋଇଛି।ଚତୁର୍ଥ ଟେଷ୍ଟ ପରେ ରବିଚନ୍ଦ୍ରନ ଅଶ୍ୱିନ କହିଛନ୍ତି ଯେ ବାୟୋ-ବବୁଲରେ ରହିବା ଅତ୍ୟନ୍ତ ଆହ୍ବାନପୂର୍ଣ୍ଣ୍। କାରଣ ଦୈନନ୍ଦିନ ଆବଶ୍ୟକତା ପାଇଁ ତୁମକୁ ଲଢିବାକୁ ପଡିବ ଏବଂ ଅଷ୍ଟ୍ରେଲିଆରେ ବେଳେବେଳେ ଭାରତୀୟ ଦଳକୁ ଏପରି ହୋଟେଲ ରୁମରେ ରହିବାକୁ ପଡିଥିଲା, ଯେଉଁଠାରେ ଝରକା ମଧ୍ୟ ଖୋଲା କରିବା ନିଷେଧ ଥିଲା। ୧୪ ରୁ ୨୫ ଦିନ ପର୍ଯ୍ୟନ୍ତ ଝରକା ନ ଖୋଲି ରହିବା ବହୁତ କଷ୍ଟସାଧ୍ୟ ବୋଲି ଅଶ୍ୱିନ କହିଛନ୍ତି।
ସୂଚନାଯୋଗ୍ୟ, ଭାରତୀୟ ଦଳର ଅନେକ ଖେଳାଳିଙ୍କ ସହ ରବିଚନ୍ଦ୍ରନ ଅଶ୍ୱିନ ମଧ୍ୟ ଗତ ବର୍ଷ ଅଗଷ୍ଟରୁ ୟୁଏଇରେ ଆଇପିଏଲ ୨୦୨୦ରୁ ବାୟୋ-ବବୁଲରେ ରହୁଥିଲେ। ଏହା ପରେ ଅଷ୍ଟ୍ରେଲିଆ ଗସ୍ତ ଏବଂ ଏବେ ଭାରତ-ଇଂଲଣ୍ଡ ସିରିଜ୍ରେ ମଧ୍ୟ ବାୟୋ-ବବୁଲରେ ରହୁଥିଲେ।