ମୁମ୍ବାଇ,୫।୪: ଆଇପିଏଲ୍ ଇତିହାସରେ ପ୍ରଥମ ଥର ଲାଗି ଚେନ୍ନାଇ ସୁପରକିଙ୍ଗ୍ସ ଟୁର୍ନାମେଣ୍ଟର ଲଗାତାର ତିନୋଟି ମ୍ୟାଚ୍ରେ ପରାଜିତ ହୋଇଛି। ଫଳରେ ଅଙ୍କ ତାଲିକାରେ ୯ମ ସ୍ଥାନରେ ରହିଛି ଦଳ। ଚଳିତ ସିଜନରେ ରବିନ୍ଦ୍ର ଜାଡେଜା ପ୍ରଥମ ଥର ଲାଗି ଦଳର ଅଧିନାୟକ ଭାବେ ଦାୟିତ୍ୱ ତୁଲାଉଥିବା ବେଳେ ତାଙ୍କ ନେତୃତ୍ୱରେ ଦଳ ପ୍ରଭାବୀ ପ୍ରଦର୍ଶନ କରିବାରେ ବିଫଳ ହୋଇଛି। ଏହାକୁ ନେଇ ଜାଡେଜା ଚାପରେ ଥିବା ନେଇ କୁହାଯାଉଛି। ଏସବୁ ମଧ୍ୟରେ ପଞ୍ଜାବ ବିପକ୍ଷ ମ୍ୟାଚ୍ ପରେ ନିଜେ ପ୍ରତିକ୍ରିୟା ରଖି ଜାଡେଜା କହିଛନ୍ତି, ‘ଧୋନୀ ଭାଇ କିଛି ମାସ ପୂର୍ବରୁ ଅଧିନାୟକ ପରିବର୍ତ୍ତନ ହେବା ନେଇ କହିଥିଲେ। ଏଣୁ ମୁଁ ସେଥିଲାଗି ପ୍ରସ୍ତୁତ ହେଉଥିଲି। ମାନସିକସ୍ତରରେ ପ୍ରସ୍ତୁତ ଥିବା କାରଣରୁ ମୋ ଉପରେ କୌଣସି ଚାପ ନ ଥିଲା, ନା ଅଛି। ଆମେ ଭାଗ୍ୟଶାଳୀ ଯେ ଧୋନୀ ଭାଇ ଆମ ସହ ଅଛନ୍ତି। ମୋର ଚିନ୍ତାଧାରାକୁ ନେଇ ମୁଁ ଏବେ କାମ କରୁଛି। ସେହିଭଳି ଭାବେ ଆଗକୁ ବଢ଼ିବାକୁ ଚାହୁଁଛି’ ବୋଲି ସେ କହିଛନ୍ତି।
