ନୂଆଦିଲ୍ଲୀ, ୫ା୩ (ପି.ଟି.)-ଯୁକ୍ତରାଷ୍ଟ୍ର ଆମେରିକାରେ ୩ ମାସ ଟ୍ରେନିଂ ସହ ବିଭିନ୍ନ ପ୍ରତିଯୋଗିତାରେ ଭାଗ ନେବେ ସନ୍ତରଣକାରୀ କୁଶାଗ୍ରା ରାଓ୍ବତ। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ(ସାଇ) ମିଶନ ଅଲିମ୍ପିକ ସେଲ୍ ଦ୍ୱାରା ଏହା ଅନୁମୋଦନ ଲାଭ କରିଛି। ରାଓ୍ବତ ହେଉଛନ୍ତି ଟାର୍ଗେଟ ଅଲିମ୍ପିକ ପୋଡିୟମ ସ୍କିମ୍ (ଟପ୍ସ) ଡେଭଲପମେଣ୍ଟ ଗ୍ରୁପ୍ର ଏକ ଅଂଶବିଶେଷ। ଆମେରିକାରେ ତାଙ୍କ ୩ ମାସ ରହଣିକାଳରେ ସେ ଡେଭ୍ କେଲସିମରଙ୍କ ସହିତ ଟ୍ରେନିଂ ନେବେ। ୨୦୧୬ ୟୁଏସ୍ଏ ଅଲିମ୍ପିକ ସୁଇମିଂ ଟିମ୍ର ସହକାରୀ ଓପନ ଓ୍ବାଟର ସୁଇମିଂ କୋଚ୍ ଭାବେ ସେ କାର୍ଯ୍ୟ କରିଛନ୍ତି। ରାଓ୍ବତ ଆମେରିକାରେ ଅଲିମ୍ପିକ ପାଇଁ ସିଧାସଳଖ ଯୋଗ୍ୟତା ହାସଲ କରିବା ଲାଗି ଅଲିମ୍ପିକ ଏ’ କଟ୍ ହାସଲ କରିବା ଲାଗି ଚେଷ୍ଟା କରିବେ। ଭାରତର ଏହି ଫ୍ରି-ଷ୍ଟାଇଲ ସୁଇମର ୨୦୨୦ରେ ଅଷ୍ଟ୍ରେଲିଆରେ ଏହି କୋଚ୍ଙ୍କ ଅଧୀନରେ ଟ୍ରେନିଂ ନେଇଥିଲେ। ରାଓ୍ବତ ଇତିମଧ୍ୟରେ ୪୦୦ ମିଟର, ୮୦୦ ମିଟର ଓ ୧୫୦୦ ମିଟର ଆଦି ତିନୋଟି ଇଭେଣ୍ଟରେ ଅଲିମ୍ପିକ ବି’ କଟ୍ ହାସଲ କରିସାରିଛନ୍ତି। ୟୁୁଏସ୍ଏରେ ଅଲିମ୍ପିକ ଏ’ କଟ୍ ହାସଲ କରିବା ନେଇ ସେ ଦୃଢ ଆଶାବାଦୀ। କେଲସିମର ବର୍ତ୍ତମାନ କାଲିଫର୍ନିଆର ସାଣ୍ଟା ମୋନିକା ଟିମ୍ର ମୁଖ୍ୟ କୋଚ୍ ଅଛନ୍ତି। ୨୦୧୭ ଓ ୨୦୧୯ ବିଶ୍ୱ ଚାମ୍ପିୟନଶିପ୍ ପାଇଁ ସେ ୟୁୂଏସ୍ଏ ସୁଇମିଂ କୋଚ୍ ରହିଥିଲେ। ସେ ବହୁ ସଂଖ୍ୟାରେ ଅଲିମ୍ପିଆନଙ୍କୁ ଟ୍ରେନିଂ ଦେଇଛନ୍ତି। ସେମାନଙ୍କ ମଧ୍ୟରେ ଅଛନ୍ତି ଜୋର୍ଡାନ ଓ୍ବିଲିମୋଭସ୍କି। ସେ ୨୦୧୬ ରିଓ ଅଲିମ୍ପିକ୍ସରେ ୧୫୦୦ ମିଟରରେ ଚତୁର୍ଥ ଏବଂ ୧୦୦୦୦ମିଟରରେ ୫ମସ୍ଥାନ ଅଧିକାର କରିଥିଲେ।