ରାୟଗଡ଼ା,୨୩ା୧୨(ସ୍ବ.ପ୍ର.): ଶୀତଳ ଭଣ୍ଡାରରେ ରାୟଗଡ଼ା ରେଳ ଡିଭିଜନ। ୨୦୧୯ ରେ ରେଳ ଡିଭିଜନ ଘୋଷଣା ହୋଇଥିଲା। ଏହାମଧ୍ୟରେ ୩ ବର୍ଷ ବିତିଗଲାଣି। ଅନୁଦାନ ଗୃହୀତ ହୋଇଥିଲେ ମଧ୍ୟ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇପାରୁନି। ବିଭାଗୀୟ କର୍ତ୍ତୃପକ୍ଷଙ୍କ ଆନ୍ତରିକତା ଅଭାବ ଯୋଗୁ କାମ ସମ୍ପୂର୍ଣ୍ଣ ହୋଇପାରୁ ନାହିଁ। କୋରାପୁଟ ଏମ୍ପି ସପ୍ତଗିରି ଉଲାକା ରେଳ ଡିଭିଜନକୁ ନେଇ ପୁଣି ପାର୍ଲାମେଣ୍ଟରେ ପ୍ରଶ୍ନ ଉଠାଇଥିବାବେଳେ ରେଳମନ୍ତ୍ରୀ ଏହାର ଉତ୍ତର ରଖିଛନ୍ତି। ୨୦୧୯ ବଜେଟରେ କେନ୍ଦ୍ର ସରକାର ରାୟଗଡ଼ା ଠାରେ ରେଳ ଡିଭିଜନ ସ୍ଥାପନ ନେଇ ତତ୍କାଳୀନ ରେଳମନ୍ତ୍ରୀ ପୀୟୁଷ ଗୋଏଲ ଘୋଷଣା କରିଥିଲେ। ଘୋଷଣାର ଦୀର୍ଘ ୨ ବର୍ଷରୁ ଅଧିକ ସମୟ ପର୍ଯ୍ୟନ୍ତ ଏହା ପଡ଼ି ରହିଥିଲା। ୨୦୨୧ରେ ଅଶ୍ୱିନୀ ବୈଷ୍ଣବ ରେଳମନ୍ତ୍ରୀ ହେବା ଏବଂ ରାୟଗଡ଼ା ଗସ୍ତରେ ଆସିବା ପରେ ଡିଭିଜନ କାର୍ଯ୍ୟ ତ୍ୱରାନ୍ବିତ ହେବା ନେଇ ଆଶା ଉଜ୍ଜୀବିତ ହୋଇଥିଲା। ହେଲେ ଏ ପର୍ଯ୍ୟନ୍ତ ରେଳ ଡିଭିଜନ ପ୍ରକଳ୍ପ ନେଇ କୌଣସି କାର୍ଯ୍ୟ ଠିକ୍ରେ ହେଉ ନ ଥିବା ଜଣାପଡ଼ିଛି। ଏପରିକି ରାୟଗଡ଼ା ରେଳ ଡିଭିଜନ କାର୍ଯ୍ୟ ତଦାରଖ ପାଇଁ ନିଯୁକ୍ତ ହୋଇଥିବା ନୋଡାଲ ଅଫିସର ମାନେ ଏବେ ଅଛନ୍ତି କି ନାହିଁ ତାହାର ସୂଚନା ମଧ୍ୟ କାହା ନିକଟରେ ନାହିଁ। ରେଲଓ୍ବେ ପକ୍ଷରୁ ୧୭୦ କୋଟି ଟଙ୍କା ମଞ୍ଜୁର କରାଯାଇଥିବା ସୂଚନା ଦିଆଯିବା ସହ ପ୍ରସ୍ତାବିତ ରେଳ ଡିଭିଜନ କାର୍ଯ୍ୟାଳୟର ଥ୍ରୀ-ଡି ଚିତ୍ର ମଧ୍ୟ ସୋସିଆଲ ମିଡିଆରେ ଛଡ଼ାଯାଇଥିଲା। ହେଲେ ସ୍ଥିତିରେ କୌଣସି ପରିବର୍ତ୍ତନ ହୋଇନାହିଁ। ଜମି ଚିହ୍ନଟ କରି ମନ୍ତ୍ରୀଙ୍କ ଘୋଷଣା ପରେ ମଧ୍ୟ କାହିଁକି ରେଳ ଡିଭିଜନ କାର୍ଯ୍ୟ ତ୍ୱରାନ୍ବିତ ହୋଇପାରୁ ନାହିଁ ତାହା ସାଧାରଣରେ ସନ୍ଦେହ ସୃଷ୍ଟି କରୁଛି।
ବିଶାଖାପାଟଣା ଡିଭିଜନରୁ ଅଲଗା ହୋଇ ରାୟଗଡ଼ା ଏକ ନୂତନ ଡିଭିଜନ ହେବ। ଅବିଭକ୍ତ କୋରାପୁଟ ଜିଲାର ସମସ୍ତ ଷ୍ଟେଶନ ରାୟଗଡ଼ା ଡିଭିଜନ ଅଧୀନକୁ ଚାଲିଯିବ। ଏହାଦ୍ୱାରା ବିଶାଖାପାଟଣା ଡିଭିଜନର ଆର୍ଥିକ କ୍ଷତି ଘଟିବା ଆଶଙ୍କା ରହିଛି। ଏହି କାରଣରୁ ରାୟଗଡ଼ା ଡିଭିଜନ ନିର୍ମାଣରେ ବିଳମ୍ବ କରାଯାଉଛି ବୋଲି ରାୟଗଡ଼ା ଜିଲାର ବୁଦ୍ଧିଜୀବୀ ମତ ରଖିଛନ୍ତି। ଅପରପକ୍ଷେ ରେଳ ଡିଭିଜନ କାର୍ଯ୍ୟର ସ୍ଥିତି, ସାଉଥ୍କୋଷ୍ଟ ରେଳ ଜୋନ୍ ଏବଂ ରାୟଗଡ଼ା ରେଳ ଡିଭିଜନ ନିର୍ମାଣ ପାଇଁ ବ୍ୟୟବରାଦ ହୋଇଥିବା ୧୭୦ କୋଟି ଟଙ୍କା ବାବଦରେ ଏମ୍ପି ପାର୍ଲାମେଣ୍ଟରେ ପ୍ରଶ୍ନ ଉଠାଇଥିଲେ। ଏହାର ଉତ୍ତରରେ ରେଳମନ୍ତ୍ରୀ ରାମମୋହନ ନାଇଡ଼ୁ କିଞ୍ଜାରାପୁ ଉତ୍ତର ରଖି କହିଛନ୍ତି, ୨୦୨୦-୨୧ ଆର୍ଥିକ ବର୍ଷରେ ନିର୍ମାଣ କାର୍ଯ୍ୟ ପାଇଁ ୩ କୋଟି ଟଙ୍କା ଅନୁଦାନ ରହିଥିବା ବେଳେ କୌଣସି ଖର୍ଚ୍ଚ ହୋଇନାହିଁ। ସେହିଭଳି ୨୦୨୧-୨୨ ଆର୍ଥିକ ବର୍ଷରେ ୪୦ ଲକ୍ଷ ଟଙ୍କା ଖର୍ଚ୍ଚ ନେଇ ଅଟକଳ ରହିଥିବା ବେଳେ ୮ ଲକ୍ଷ ଟଙ୍କା ଖର୍ଚ୍ଚ ହୋଇଛି। ୨୦୨୨-୨୩ ଆର୍ଥିକ ବର୍ଷରେ ମଧ୍ୟ ୪୦ ଲକ୍ଷ ଟଙ୍କାର ବ୍ୟୟବରାଦ ରହିଥିବା ବେଳେ ମାତ୍ର ୬ ଲକ୍ଷ ଟଙ୍କା ଖର୍ଚ୍ଚ ହୋଇଛି। ସାଉଥ୍କୋଷ୍ଟ ରେଳ ଜୋନ୍ ହେଡ୍କ୍ୱାର୍ଟର ଏବଂ ରାୟଗଡ଼ା ରେଳ ଡିଭିଜନ ନିର୍ମାଣ ପାଇଁ ୨୦୨୨ ନଭେମ୍ବର ୧୦ ରେ ୧୦୬.୮୯ କୋଟି ଟଙ୍କାର ବଜେଟ ଗୃହୀତ ହୋଇଛି। ଜୋନାଲ ହେଡ୍କ୍ୱାର୍ଟର ପାଇଁ ସ୍ଥାନ ନିରୂପଣ ମଧ୍ୟ ସରିଛି। ସାଉଥ୍କୋଷ୍ଟ ଜୋନ୍ ଏବଂ ରାୟଗଡ଼ା ଡିଭିଜନ କାର୍ଯ୍ୟ ତ୍ୱରାନ୍ବିତ ପାଇଁ ଏକ କମିଟି ଗଠନ କରାଯାଇଛି। ରେଳ ଡିଭିଜନ କାର୍ଯ୍ୟ ସମ୍ପୂର୍ଣ୍ଣ ନେଇ ସେଭଳି କୌଣସି ସମୟସୀମା ଧାର୍ଯ୍ୟ କରାଯାଇନାହିଁ ବୋଲି ମନ୍ତ୍ରୀ ରାମମୋହନ ନାଇଡୁ ପ୍ରକାଶ କରିଛନ୍ତି। ହେଲେ ରାୟଗଡ଼ା ରେଳ ଡିଭିଜନ ନିର୍ମାଣ କାର୍ଯ୍ୟ ଆରମ୍ଭ ହୋଇ ନ ଥିବା ବେଳେ ୨୦୨୪ ସାଧାରଣ ନିର୍ବାଚନ ପୂର୍ବରୁ ଶେଷ ହେବାକୁ ନେଇ ସନ୍ଦେହ ସୃଷ୍ଟି ହୋଇଛି।