ନୂଆଦିଲ୍ଲୀ,୭ା୪: ଜଳବାୟୁ ସ୍ଥିତିର ପ୍ରତିକୂଳ ପ୍ରଭାବ ସତ୍ତ୍ୱେ ୨୦୨୪ ଆର୍ଥିକ ବର୍ଷରେ ମୁଦ୍ରାସ୍ଫୀତି ହାର ୫.୨ ପ୍ରତିଶତ ରହିବ ବୋଲି ଭାରତର ରିଜର୍ଭ ବ୍ୟାଙ୍କ (ଆର୍ବିଆଇ) ଆକଳନ କରିଛି। ଗତ ଫେବୃୟାରୀ ମୁଦ୍ରାନୀତି ଘୋଷଣା ବେଳେ ମୁଦ୍ରାସ୍ଫୀତି ହାର ୫.୩ ପ୍ରତିଶତ ରହିବ ବୋଲି ପୂର୍ବାନୁମାନ କରାଯାଇଥିବାବେଳେ ଏହାକୁ ୫.୨ ପ୍ରତିଶତକୁ ହ୍ରାସ କରାଯାଇଛି। ତେବେ ଆର୍ବିଆଇ ଗଭର୍ନର ଶକ୍ତିକାନ୍ତ ଦାସ କ୍ରମାଗତ ମୂଲ୍ୟ ଅପରିବର୍ତ୍ତିତ ରହିବା, ପ୍ରତିକୂଳ ଜଳବାୟୁ ସ୍ଥିତି ଏବଂ ବିଶ୍ୱ ବଜାରରେ ବିଭିନ୍ନ ସାମଗ୍ରୀର ଦରକୁ ନେଇ ଚିନ୍ତା ପ୍ରକଟ କରିଥିଲେ।
ରବି ଫସଲ ଉତ୍ପାଦନ ଭଲ ହେବ ବୋଲି ଆଶା କରାଯାଉଥିବାରୁ ଖାଦ୍ୟଶସ୍ୟ ଦର ହ୍ରାସ ପାଇବ। ତେବେ ଗ୍ରୀଷ୍ମଋତୁରେ ଯୋଗାଣଠାରୁ ଚାହିଦା ଅଧିକ ରହିବା ସହ ଗୋଖାଦ୍ୟ ଦର ବୃଦ୍ଧି ଯୋଗୁ କ୍ଷୀର ଦର ଉଚ୍ଚା ରହିବ ବୋଲି ଆର୍ବିଆଇ କହିଛି। ତୈଳ ରପ୍ତାନିକାରୀ ରାଷ୍ଟ୍ରଗୁଡ଼ିକ(ଓପେକ୍) ଉତ୍ପାଦନ ହ୍ରାସ କରିବା ଲାଗି ହଠାତ୍ ଘୋଷଣା କରିବା ଫଳରେ ଅଶୋଧିତ ତୈଳ ଦର ବୃଦ୍ଧି ପାଇଛି। ଅଶୋଧିତ ତୈଳ ବ୍ୟାରେଲ ପ୍ରତି ବାର୍ଷିକ ହାରାହାରି ଦର ୮୫ ବିଲିୟନ ଡଲାର ରହିବ ବୋଲି ଆକଳନ କରାଯାଇଛି। ତେବେ ଯଦି ମୌସୁମୀ ସ୍ବାଭାବିକ ହୁଏ, ତେବେ ଚଳିତ ଆର୍ଥତ୍କ ବର୍ଷରେ ମୁଦ୍ରାସ୍ଫୀତି ୫.୨ ପ୍ରତିଶତରେ ସୀମିତ ରହିବ ବୋଲି ଆର୍ବିଆଇ ଗଭର୍ନର କହିଛନ୍ତି। ମାର୍ଚ୍ଚ ୩୧ରେ ଶେଷ ହୋଇଥିବା ଆର୍ଥତ୍କ ବର୍ଷ ଲାଗି ବାର୍ଷିକ ଖୁଚୁରା ମୁଦ୍ରାସ୍ଫୀତି ୬.୫ ପ୍ରତିଶତ ପୂର୍ବାନୁମାନ କରାଯାଇଥିଲା।
