ନୂଆଦିଲ୍ଲୀ,୧୨।୧୦: ଭାରତର ରିଜର୍ଭ ବ୍ୟାଙ୍କ (ଆର୍ବିଆଇ) ମୁଦ୍ରାସ୍ଫୀତିକୁ ନିୟନ୍ତ୍ରଣରେ ରଖିବାରେ ବିଫଳ ହୋଇଛନ୍ତି। ସେପ୍ଟେମ୍ବରରେ ଖାଉଟି ମୂଲ୍ୟସୂଚୀ (ସିପିଆଇ) ଆଧାରିତ ମୁଦ୍ରାସ୍ଫୀତି ୭.୪୧ ପ୍ରତିଶତକୁ ବୃଦ୍ଧି ପାଇଛି, ଯାହାକି ଗତ ୫ ମାସ ମଧ୍ୟରେ ସର୍ବାଧିକ। କ୍ରମାଗତ ତୃତୀୟ ତ୍ରୈମାସିକରେ ମୁଦ୍ରାସ୍ଫୀତି ସହ୍ୟ ସ୍ତର ୨-୬%ରୁ ଅଧିକ ରହିଛି।
ପରିସଂଖ୍ୟାନ ଓ କାର୍ଯ୍ୟକ୍ରମ ରୂପାୟନ ମନ୍ତ୍ରଣାଳୟ ପକ୍ଷରୁ ବୁଧବାର ଜାରି ତଥ୍ୟ ଅନୁଯାୟୀ ସେପ୍ଟେମ୍ବର ମାସରେ ମୁଦ୍ରାସ୍ଫୀତି ୭.୪୧%କୁ ବୃଦ୍ଧି ପାଇଛି। ଖାଦ୍ୟ ସାମଗ୍ରୀଗୁଡ଼ିକର ଦରଦାମ୍ ବୃଦ୍ଧି ଯୋଗୁ ଅଗଷ୍ଟରେ ମୁଦ୍ରାସ୍ଫୀତି ୭.୦୦ ପ୍ରତିଶତକୁ ବଢ଼ିଥିଲା। ମୁଦ୍ରାସ୍ଫୀତିକୁ ୨ରୁ ୪ ପ୍ରତିଶତ ମଧ୍ୟରେ ସୀମିତ ରଖିବା ଲାଗି ସରକାର ଆର୍ବିଆଇ ଉପରେ ଦାୟିତ୍ୱ ନ୍ୟସ୍ତ କରିଛନ୍ତି। ଏଥିରେ ୨ ପ୍ରତିଶତ ବେଶୀ କିମ୍ବା କମ୍ ହୋଇପାରେ। ତେବେ ଗତ ଏପ୍ରିଲ ମାସରୁ ମୁଦ୍ରାସ୍ଫୀତି ଏହାଠାରୁ ଅଧିକ ରହିଆସିଛି। ଏହାକୁ ହ୍ରାସ କରିବାକୁ ଯାଇ ରିଜର୍ଭ ବ୍ୟାଙ୍କ କ୍ରମାଗତ ଭାବେ ରେପୋ ରେଟ୍ ବଢ଼ାଇ ଚାଲିଛନ୍ତି। ଏହା ସତ୍ତ୍ୱେ ମୁଦ୍ରାସ୍ଫୀତି କମୁ ନ ଥିବାରୁ ଆଗାମୀ ଦିନରେ ସୁଧହାର ପୁଣି ବଢ଼ିବା ସମ୍ଭାବନା ସୃଷ୍ଟି ହୋଇଛି। ସୁଧ ହାର ବଢ଼ିଲେ ସାଧାରଣ ଲୋକଙ୍କ ଉପରେ ଅଧିକ ଆର୍ଥିକ ବୋଝ ପଡ଼ିବ।
ରିଜର୍ଭ ବ୍ୟାଙ୍କ ମୁଦ୍ରାନୀତି କମିଟି (ଏମ୍ପିସି) ପ୍ରତି ଦୁଇ ମାସରେ ମୁଦ୍ରାନୀତିର ସମୀକ୍ଷା କରିଥାନ୍ତି। ମୁଦ୍ରାନୀତି ନିର୍ଦ୍ଧାରଣ ବେଳେ ଖୁଚୁରା ମୁଦ୍ରାସ୍ଫୀତି ସଂଖ୍ୟାକୁ ବିଚାରକୁ ନିଆଯାଇଥାଏ। ମୁଖ୍ୟତଃ ଇନ୍ଧନ ଓ ଖାଦ୍ୟସାମଗ୍ରୀ ମୂଲ୍ୟ ବୃଦ୍ଧି ଯୋଗୁ ମୁଦ୍ରାସ୍ଫୀତି ବଢ଼ୁଛି। ଗତ ଫେବୃୟାରୀ ୨୪ରୁ ରୁଷିଆ ୟୁକ୍ରେନ୍ ଉପରେ ଆକ୍ରମଣ କରିବା ପରେ ଏହାର ପ୍ରଭାବ ବଜାର ଦର ଉପରେ ପଡ଼ିଛି। ଏହାକୁ ନିୟନ୍ତ୍ରଣକୁ ଆଣିବା ଲାଗି ଦୀର୍ଘ ସମୟ ଲାଗିବ ବୋଲି କୁହାଯାଉଛି। ଖୁଚୁରା ମୁଦ୍ରାସ୍ଫୀତି ବଢ଼ିବାରେ ଖାଦ୍ୟସାମଗ୍ରୀ ଦରବୃଦ୍ଧି ୪୦ ପ୍ରତିଶତ ଦାୟୀ। ସେପ୍ଟେମ୍ବରରେ ଖାଦ୍ୟ ମୁଦ୍ରାସ୍ଫୀତି ୮.୬୦ ପ୍ରତିଶତରେ ପହଞ୍ଚତ୍ଛି, ଯାହାକି ପୂର୍ବ ମାସରେ ୭.୬୨ ପ୍ରତିଶତ ରହିଥିଲା। ସେହିପରି ଗତବର୍ଷ ସେପ୍ଟେମ୍ବରରୁ ଚଳିତ ବର୍ଷ ସେପ୍ଟେମ୍ବର ମଧ୍ୟରେ ଇନ୍ଧନ ଓ ବିଦ୍ୟୁତ୍ ଦର ୧୧.୪୪ ପ୍ରତିଶତ ବଢ଼ିଛି। ଅନ୍ୟପକ୍ଷରେ ଡଲାର ତୁଳନାରେ ଟଙ୍କା ଦୁର୍ବଳ ହେବାରେ ଲାଗିଛି। ଗତ ସପ୍ତାହରେ ଏକ ଡଲାରର ବିନିମୟ ମୂଲ୍ୟ ୮୨ ଟଙ୍କା ୩୨ ପଇସାରେ ପହଞ୍ଚତ୍ଛି। ଆଗାମୀ ୬ ମାସ ଯାଏ ଏହି ଚାପ ରହିବ ବୋଲି ଆଶଙ୍କା କରାଯାଉଛି।