ନୂଆଦିଲ୍ଲୀ, ୭।୨- ଆସନ୍ତା ୧୨ ଓ ୧୩ ତାରିଖରେ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ମେଗା ନିଲାମରେ ପୂର୍ବତନ ଓ୍ବେଷ୍ଟଇଣ୍ଡିଜ ଅଧିନାୟକ ଜାସନ ହୋଲ୍ଡର ଅନ୍ୟତମ ଦାମୀ ଖେଳାଳି ସାବ୍ୟସ୍ତ ହୋଇପାରନ୍ତି। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ତାଙ୍କୁ ଅଧିକ ଅର୍ଥରେ କିଣିବା ସମ୍ଭାବନା ରହିଛି। ଏହି ଫ୍ରାଞ୍ଚାଇଜ୍ ବିରାଟ କୋହଲି, ଗ୍ଲେନ୍ ମ୍ୟାକ୍ସଓ୍ବେଲ ଏବଂ ମହମ୍ମଦ ସିରାଜଙ୍କୁ ରିଟେନ କରିସାରିଛି। ଏକ ଅଣଆନୁଷ୍ଠାନିକ ଆର୍ସିବିର ଅକ୍ସନ ଷ୍ଟ୍ରାଟେଜିକୁ ଯଦି ବିଶ୍ୱାସକୁ ନିଆଯାଏ, ତେବେ ଅଲରାଉଣ୍ଡ ପ୍ରଦର୍ଶନକୁ ଦୃଷ୍ଟିରେ ରଖି ଆର୍ସିବି ହୋଲ୍ଡରଙ୍କ ପାଇଁ ୧୨ କୋଟି ଟଙ୍କା ପର୍ଯ୍ୟନ୍ତ ବାଜି ଲଗାଇପାରେ।
”ବେନ୍ ଷ୍ଟୋକ୍ସ ଉପଲବ୍ଧ ନାହାନ୍ତି। ହାର୍ଦ୍ଦିକ ପାଣ୍ଡ୍ୟା ଓ ମାର୍କୁସ ଷ୍ଟୋଇନିସ୍ଙ୍କୁ ଅନ୍ୟ ଫ୍ରାଞ୍ଚାଇଜ୍ ନେଇସାରିଛନ୍ତି। ମିଚେଲ ମାର୍ଶ ଆହତ ସମସ୍ୟାରେ ଘେରି ହୋଇ ରହୁଥିବାରୁ ସମ୍ପୂର୍ଣ୍ଣ ଆଇପିଏଲରେ ତାଙ୍କର ଖେଳିବା ସମ୍ଭାବନା କମ୍ ରହିଛି। ଟି୨୦ ଫର୍ମାଟରେ ହୋଲ୍ଡରଙ୍କ ରେକର୍ଡ ବହୁତ ଭଲ। ତେଣୁ ଆରସିବି ହୋଲ୍ଡରଙ୍କୁ ନିଜ ପାଖକୁ ଆଣିବାକୁ ଉଦ୍ୟମ କରିବ“ ବୋଲି ଏହି ଫ୍ରାଞ୍ଚାଇଜ ସହ ଜଡ଼ିତ ସୂତ୍ରରୁ ପ୍ରକାଶ କରାଯାଇଛି।
ନିଲାମ ପାଇଁ ଆରସିବି ନିକଟରେ ୫୭ କୋଟି ଟଙ୍କା ଅର୍ଥ ଅଛି। ଏହି ଦଳ ଆଗାମୀ ନିଲାମରେ ହୋଲ୍ଡରଙ୍କ ସମେତ ପୂର୍ବତନ ଚେନ୍ନାଇ ସୁପର କିଙ୍ଗ୍ସ ବ୍ୟାଟର ଅମ୍ବାତି ରାୟୁଡ଼ୁ ଓ ରାଜସ୍ଥାନ ରୟାଲ୍ସ ପକ୍ଷରୁ ଖେଳିସାରିଥିବା ଯୁବ ବ୍ୟାଟର ରିୟାନ ପରାଗଙ୍କୁ ନିଜ ପାଖକୁ ଆଣିବାକୁ ଉଦ୍ୟମ କରିବ ବୋଲି ବିଚାର ଚାଲିଛି। ହୋଲ୍ଡରଙ୍କ ପାଇଁ ୧୨ କୋଟି, ରାୟୁଡ଼ୁଙ୍କ ଲାଗି ୮ ଏବଂ ପରାଗଙ୍କ ପାଇଁ ୭ କୋଟି ଖର୍ଚ୍ଚ କଲେ ବି ଆରସିବି ନିକଟରେ ଆହୁରି ୩୦ କୋଟି ବଳିବ। କୋହଲି, ମ୍ୟାକ୍ସଓ୍ବେଲ, ସିରାଜ, ହୋଲ୍ଡର, ରାୟୁଡ଼ୁ ଓ ପରାଗଙ୍କୁ ନେଇ ଦଳ ଗଠନ ଦିଗରେ ରହିଛି ଆର୍ସିବି। ହୋଲ୍ଡର, ପରାଗ ଓ ରାୟୁଡ଼ୁଙ୍କ ମଧ୍ୟରୁ ଅତିକମ୍ରେ ୨ ଜଣଙ୍କୁ ନେବା ଆଶାରେ ରହିଛି ଏହି ଫ୍ରାଞ୍ଚାଇଜ୍।