ନୂଆଦିଲ୍ଲୀ,୮।୧୦: ତାରକା ଖଚ୍ଚିତ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଏଥର ଆଇପିଏଲ୍ ଟ୍ରଫି ଜିତିବ। ଏଭଳି ପୂର୍ବନୁମାନ କରିଛନ୍ତି ପୂର୍ବତନ ଦକ୍ଷିଣ ଆଫ୍ରିକୀୟ କ୍ରିକେଟର ତଥା ବର୍ତ୍ତମାନ ଆଫଗାନିସ୍ତାନ ଦଳର ମୁଖ୍ୟ କୋଚ୍ ଲାନ୍ସ କ୍ଲୁଜନର। ବିରାଟ କୋହଲିଙ୍କ ନେତୃତ୍ୱଧୀନ ଆରସିବି ଚଳିତ ଆଇପିଏଲରେ ଭଲ ପ୍ରଦର୍ଶନ କରିବା ସହ କ୍ରମାଗତ ଦ୍ୱିତୀୟ ଥର ପାଇଁ ପ୍ଲେ-ଅପ୍ରେ ପ୍ରବେଶ କରିଛି।
”ମୁଁ ଚାହେଁ ଆରସିବି ତା’ର ପ୍ରଥମ ଟାଇଟଲ ହାସଲ କରୁ। ମୁଁ ସେମାନଙ୍କୁ ଟ୍ରଫି ଉଠାଉଥିବାର ଦେଖିବାକୁ ଚାହେଁ। କୋହଲି ଓ ଏବି ଡି’ଲିୟର୍ସଙ୍କ ଭଳି ଖେଳାଳି ଥିବା ସତ୍ତ୍ୱେ ଆର୍ସିବି କାହିଁକି ଆଇପିଏଲ ଜିତିପାରୁ ନାହିଁ। ମୁଁ ବହୁବାର ଏହା ଉପରେ ଚିନ୍ତା କରିଛି। କିନ୍ତୁ ତା’ର କାରଣ ଖୋଜି ପାଇନାହିଁ। ମୋ ମନ କହୁଛି ଚଳିତ ବର୍ଷ ଆରସିବି ଶେଷରେ ଆଇପିଏଲ୍ ଟ୍ରଫି ହାତେଇବ“ ବୋଲି କ୍ଲୁଜନର କହିଛନ୍ତି।
ଉଲ୍ଲେଖଯୋଗ୍ୟ, ଆରସିବି ୩ ଥର (୨୦୦୯, ୨୦୧୧ ଓ ୨୦୧୬) ଫାଇନାଲରେ ପ୍ରବେଶ କରିଥିଲା। ପ୍ରତ୍ୟେକ ଥର କୋହଲିଙ୍କୁ ଉପବିଜେତାରେ ସନ୍ତୁଷ୍ଟ ରହିବାକୁ ପଡ଼ିଛି। ୨୦୦୯ରେ ଡେକାନ ଚାଜର୍ସ ଠାରୁ ୬ ରନ୍ରେ ପରାସ୍ତ ହୋଇଥିଲା ବାଙ୍ଗାଲୋର। ଏହାର ଦୁଇ ବର୍ଷ ପରେ ଆଇପିଏଲ ଫାଇନାଲରେ ଆର୍ସିବିକୁ ଚେନ୍ନାଇ ସୁପର କିଙ୍ଗ୍ସ ୫୮ ରନ୍ରେ ହରାଇ ମ୍ୟାଚ୍ ଜିତିଥିଲା। ୨୦୧୬ରେ ଶେଷ ଥର ପାଇଁ ଫାଇନାଲରେ ପ୍ରବେଶ କରିଥିଲା ଆର୍ସିବି। ସେଥର ଦଳକୁ ସନରାଇଜର୍ସ ହାଇଦ୍ରାବାଦ୍ ଠାରୁ ୮ ରନ୍ରେ ପରାସ୍ତ ହେବାକୁ ପଡ଼ିଥିଲା।
