ନନ୍ଦିଆଲା: ୨୦୧୨ରେ ମୁକ୍ତିଲାଭ କରିଥିବା ସୁପରଷ୍ଟାର ପଓ୍ବନ୍ କଲ୍ୟାଣଙ୍କ ଫିଲ୍ମ ‘କ୍ୟାମେରାମ୍ୟାନ୍ ଗଙ୍ଗାଥୋ ରାମବାବୁ’ ପୁଣି ଥରେ ପ୍ରେକ୍ଷାଳୟରେ ମୁକ୍ତିଲାଭ କରିଛି। ପ୍ରସିଦ୍ଧ ନିର୍ଦ୍ଦେଶକ ପୁରୀ ଜଗନ୍ନାଦ୍ଙ୍କ ନିର୍ଦ୍ଦେଶନାରେ ତିଆରି ହୋଇଥିବା ଏହି ଫିଲ୍ମରେ ପୱନ୍ କଲ୍ୟାଣଙ୍କ ସହ ତମନ୍ନା ଭାଟିଆ ମୁଖ୍ୟ ଭୂମିକାରେ ନଜର ଆସିଥିଲେ। ତେବେ ପୱନ୍ଙ୍କର ଏହି ଚଳଚ୍ଚିତ୍ର ନନ୍ଦିଆଲାର ଏକ ଥିଏଟର ମାଲିକଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି । ନିଜ ପ୍ରିୟ ତାରକାଙ୍କ ଚଳଚ୍ଚିତ୍ରର ପୁନଃ ରିଲିଜ ଅବସରରେ ଏକ ଆକ୍ସନ ସିନ୍କୁ ଭିତ୍ତିକରି ପଓ୍ବନଙ୍କ କେତେଜଣ ପ୍ରଶଂସକ ଉତ୍ସାହିତ ହୋଇ ଥିଏଟର ଭିତରେ ନିଆଁ ଲଗାଇ ଦେଇଥିଲେ, ଯାହାର ଭିଡିଓ ଏବେ ସାମାଜିକ ଗଣମାଧ୍ୟମରେରେ ଭାଇରାଲ ହେବାରେ ଲାଗିଛି। ତେବେ ଏଭଳି ଘଟଣା ପୱନ୍ଙ୍କ ଫ୍ୟାନ୍ ମାନେ ପ୍ରଥମ ଥର ପାଇଁ କରିନାହାନ୍ତି। ୨୦୨୧ ମସିହାରେ, ଯେତେବେଳେ ପୱନ୍ଙ୍କର ଏକ ଚଳଚ୍ଚିତ୍ର ବୈଷୟିକ ତ୍ରୁଟି ହେତୁ ଜୋଗୁଲମ୍ବା ଗାଡୱାଲର ଏକ ଥିଏଟରରେ ପ୍ରଦର୍ଶିତ ହୋଇପାରିଲା ନାହିଁ ସେତେବେଳେ ତାଙ୍କ ପ୍ରଶଂସକ ମାନେ ସମ୍ପୃକ୍ତ ଥିଏଟରରେ ଭଙ୍ଗାରୁଜା କରିଥିଲେ। ସେହିପରି ୨୦୨୩ ମସିହାରେ ପଓ୍ବନ୍ଙ୍କ ପ୍ରଶଂସକମାନେ ନିଶାସକ୍ତ ଅବସ୍ଥାରେ ବିଜୟୱାଡାର ଏକ ଥିଏଟରକୁ ଭଙ୍ଗାରୁଜା କରିଥିଲେ, ଯାହା ଫଳରେ ପୋଲିସ ସେମାନଙ୍କୁ ଗିରଫ କରିଥିଲା। ‘କ୍ୟାମେରାମ୍ୟାନ୍ ଗଙ୍ଗାଥୋ ରାମବାବୁ’ ଏକ ରାଜନୈତିକ ଆକ୍ସନ୍ ଫିଲ୍ମ, ଯେଉଁଥିରେ ପୱନ କଲ୍ୟାଣ ରାମବାବୁଙ୍କ ଚରିତ୍ରରେ ଅଭିନୟ କରିଥିଲେ, ଯିଏ ଜଣେ ବୈଦ୍ୟୁତିକ ଗଣମାଧ୍ୟମ ସାମ୍ବାଦିକ ଥିଲେ। ପ୍ରକାଶ ରାଜ ମଧ୍ୟ ଏହି ଚଳଚ୍ଚିତ୍ରରେ ଏକ ଗୁରୁତ୍ୱପୂର୍ଣ୍ଣ ଭୂମିକାରେ ଅଭିନୟ କରିଥିଲେ।