ନୂଆଦିଲ୍ଲୀ, ୧୯।୧୨(ପି.ଟି.): କେନ୍ଦ୍ରର ନୂଆ କୃଷି ଆଇନକୁ ନେଇ ଚାଷୀମାନେ ଆନ୍ଦୋଳନ ଚଳାଇଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ସେମାନଙ୍କ ଆଗରେ ମୁଣ୍ଡ ନୁଆଇବା ସହ ସମସ୍ତ ପ୍ରସଙ୍ଗରେ ଆଲୋଚନା ପାଇଁ ପ୍ରସ୍ତୁତ ବୋଲି ଶୁକ୍ରବାର କହିଛନ୍ତି। ଭିଡିଓ କନ୍ଫରେନ୍ସ ଜରିଆରେ ମଧ୍ୟପ୍ରଦେଶର କିଷାନ ମହାସମ୍ମିଳନୀକୁ ଉଦ୍ବୋଧନ ଦେଇ ମୋଦି କହିଥିଲେ, ଚାଷୀଙ୍କ କଲ୍ୟାଣ ପାଇଁ ସରକାର ପ୍ରତିଶ୍ରୁତିବଦ୍ଧ। ୩ କୃଷି ଆଇନ କୃଷକଙ୍କ ଜୀବନକୁ ଉନ୍ନତ କରିବ। ତରବରିଆ ଭାବେ ଉକ୍ତ ଆଇନ ପାର୍ଲାମେଣ୍ଟରେ ଗୃହୀତ ହୋଇନାହିଁ, ଦୀର୍ଘ ଦଶନ୍ଧି ଧରି ଏହା ଉପରେ ଆଲୋଚନା ଚାଲିଥିଲା। ଏବେ ଏହି ଆଇନକୁ ବିରୋଧ କରଥିବା ଦଳଗୁଡ଼ିକ ନିର୍ବାଚନୀ ଇସ୍ତାହାରରେ କୃଷି ସଂସ୍କାର ପାଇଁ ପ୍ରତିଶ୍ରୁତି ଦେଇଥିଲେ।
ନୂତନ କୃଷି ଆଇନକୁ ନେଇ ମିଛ ପ୍ରଚାର ଚାଲିଛି। ଏହାକୁ ବିଶ୍ୱାସ କରନ୍ତୁ ନାହିଁ। ଏହା ପରେ ଯଦି କୃଷକମାନଙ୍କର କୌଣସି ଚିନ୍ତା ରହିଛି, ତେବେ ସରକାର ନତମସ୍ତକ ହୋଇ ସେମାନଙ୍କ କଥା ଶୁଣିବେ। ଚାଷୀଙ୍କ ଲାଭ ହିଁ ସରକାରଙ୍କ ପ୍ରାଥମିକତା। ଏହି ଅବସରରେ ମୋଦି ବିରୋଧୀ ଦଳକୁ କଡ଼ା ସମାଲୋଚନା କରିଥିଲେ। ସେମାନେ କୃଷି ଆଇନକୁ ନେଇ ମିଥ୍ୟା ଗୁଜବ ପ୍ରଚାର କରୁଛନ୍ତି। ସେ ତାଙ୍କ ସରକାରର କୃଷି ରିପୋର୍ଟ କାର୍ଡ ସହ ପୂର୍ବ ସରକାରର ରିପୋର୍ଟ କାର୍ଡକୁ ତୁଳନା କରିଥିଲେ। ବିରୋଧୀ ଦଳଗୁଡ଼ିକ ପରାଜିତ କ୍ଷେତ୍ରରେ ସ୍ଥିତି ସୁଧାରିବାକୁ କୃଷକଙ୍କୁ ବିଭ୍ରାନ୍ତ କରୁଛନ୍ତି। କେନ୍ଦ୍ରକୁ ଟାର୍ଗେଟ କରିବାକୁ ଯାଇ କୃଷକଙ୍କ କାନ୍ଧକୁ ବିରୋଧୀ ବ୍ୟବହାର କରୁଛନ୍ତି।