ମୁମ୍ବାଇ,୨୩।୬: ବିଦ୍ରୋହୀ ଶିବସେନା ନେତା ଏକନାଥ ସିନ୍ଦେ ଏବଂ ଆସାମର ଗୁଆହାଟୀରେ ବସିଥିବା ତାଙ୍କ ସମର୍ଥକ ବିଧାୟକଙ୍କୁ ମୁମ୍ବାଇ ଫେରିବାକୁ ନିବେଦନ କରିଛି ଶିବସେନାର ବରିଷ୍ଠ ନେତା ସଞ୍ଜୟ ରାଉତ। ଗୁରୁବାର ରାଉତ କହିଛନ୍ତି, ମହାରାଷ୍ଟ୍ର ବାହାରେ ଥିବା ବିଧାୟକମାନେ ହିନ୍ଦୁତ୍ୱ ପ୍ରସଙ୍ଗ ଉଠାଇଛନ୍ତି। ଯେଉଁମାନେ ଚାହୁଁଛନ୍ତି ଶିବସେନା ମିଳିତ ମେଣ୍ଟରୁ ଓହରି ଯିବା ଉଚିତ୍, ସେମାନେ ସାହସର ସହିତ ଏଠାକୁ ଆସ ଏବଂ ଏକାଠି ବସି କଥା ହୁଅ। ଶିବସେନା ମଧ୍ୟ ମହାବିକାଶ ଅଗାଡିରୁ ବାହାରକୁ ଆସିବାକୁ ପ୍ରସ୍ତୁତ। ଯଦି ଫ୍ଲୋର୍ ଟେଷ୍ଟ କରାଯାଏ ତେବେ ଆମେ ନିଶ୍ଚୟ ଜିତିବା। ୨୪ ଘଣ୍ଟାରେ ମୁମ୍ବାଇକୁ ଆସ ଏବଂ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ସହ କଥା ହୁଅ।
ସଞ୍ଜୟ ରାଉତ ଦାବି କରିଛନ୍ତି ଯେ, ବିଦ୍ରୋହୀ ନେତା ଏକନାଥ ସିନ୍ଦେ ଦଳର ୨୧ ଜଣ ବିଧାୟକ ତାଙ୍କ ସହ ଯୋଗାଯୋଗ କରୁଛନ୍ତି। ଯେତେବେଳେ ବି ସୁଯୋଗ ଆସେ, ମିଳିତ ସରକାର ଏହାର ସଂଖ୍ୟାଗରିଷ୍ଠତା ପ୍ରମାଣ କରିବେ। ଖୁବଶୀଘ୍ର ଉଦ୍ଧବ ଠାକରେ ବର୍ଷା ବଙ୍ଗଳାକୁ ଫେରିବେ। ଉଦ୍ଧବ ଠାକରେ ବୁଧବାର ତାଙ୍କ ସରକାରୀ ବାସଭବନ ବର୍ଷା ଛାଡି ମାତୋଶ୍ରୀକୁ ଯାଇଥିଲେ।
ଉଦ୍ଧବ ଠାକୁରଙ୍କ ବୈଠକ ପୂର୍ବରୁ କ୍ୟାବିନେଟ ମନ୍ତ୍ରୀ ଏକନାଥ ସିନ୍ଦେଙ୍କ ନେତୃତ୍ୱରେ ବିଦ୍ରୋହୀ ଶିବିରରେ ଯୋଗଦେବା ପାଇଁ ଆଉ ତିନିଜଣ ଶିବସେନା ବିଧାୟକ ଗୁଆହାଟୀରେ ପହଞ୍ଚିଥିଲେ। ଏକନାଥ ୪୬ ଜଣ ବିଧାୟକଙ୍କ ସମର୍ଥନ ଦାବି କରିଛନ୍ତି।