ଚାଇନାରେ ଅସଲି ସ୍କ୍ବିଡ୍ ଗେମ୍, ବର୍ଷକୁ ଲକ୍ଷେ ଲୋକଙ୍କର ହାର୍ଟ-ଲିଭର-କିଡ୍ନୀ କାଢ଼ି ନେଉଛନ୍ତି ସରକାର…
01 ବେଜିଂ,୧୮।୧୦: ଦକ୍ଷିଣ କୋରିଆର ହରର ଡ୍ରାମା ସିରିଜ ସ୍କ୍ବିଡ୍ ଗେମ୍ ନେଟଫ୍ଲିକ୍ସରେ ସମସ୍ତ ରେକର୍ଡ ଭାଙ୍ଗିଛି। ଏହି ଶୋ’ରେ, ଯେଉଁମାନେ ଋଣଗ୍ରସ୍ତ ହୋଇଥିବା ଲୋକଙ୍କୁ ଟଙ୍କାର ପ୍ରଲୋଭନ ଦିଆଯାଇଛି। ଫଳରେ ପରସ୍ପର ମଧ୍ୟରେ ରକ୍ତାକ୍ତ ଲଢ଼େଇ କରି ୪୫୫ ଜଣ ଲୋକଙ୍କର ଜଣଙ୍କ ପରେ ଜଣେ ମୃତ୍ୟୁ ମୁହଁରେ ପଡୁଛନ୍ତି। ଶେଷରେ ଜଣେ ବ୍ୟକ୍ତି ୩୮.୭ ମିଲିୟନ ଡଲାଲ ପୁରସ୍କାର ପାଉଛନ୍ତି। ଏଥିରେ ମାନବ ଅଙ୍ଗ ଚୋରା ଚାଲାଣର ଖେଳ ମଧ୍ୟ ଦେଖାଯାଇଛି। ଏହା ଖେଳରେ ହୋଇଛି।
ମାତ୍ର ଚାଇନାରେ ରାଷ୍ଟ୍ରପତି ଶି ଜିନ୍ପିଙ୍ଗ ସରକାରଙ୍କ ଗୁପ୍ତ ନିର୍ଦ୍ଦେଶରେ ଟଙ୍କା ଲୋଭ ପାଇଁ ମଣିଷକୁ ହତ୍ୟା କରିବାର ବୀଭତ୍ସ ଖେଳ ଚାଲିଛି। ଲୋକଙ୍କୁ ହତ୍ୟା କରି ସେମାନଙ୍କର ହାର୍ଟ, ଲିଭର, କିଡନୀ ଏବଂ ଅନ୍ୟାନ୍ୟ ଅଙ୍ଗ ବାହାର କରାଯାଇ କଳା ବଜାରରେ ବିକ୍ରି ଚାଲିଛି।
ଏକ ମାନବାଧିକାର ଗୋଷ୍ଠୀଙ୍କ ପକ୍ଷରୁ ଏଭଳି ଅଭିଯୋଗ ଅଣାଯାଇଛି। ଏକଛତ୍ରବାଦୀ ସରକାର ବର୍ଷକୁ ଏଥିପାଇଁ ଲକ୍ଷେ ଲୋକଙ୍କୁ ହତ୍ୟା କରୁଛନ୍ତି। ଅସନ୍ତୁଷ୍ଟ ଏବଂ ରାଜନୈତିକ ବନ୍ଦୀମାନଙ୍କୁ ହତ୍ୟା କରି ହାର୍ଟ, କିଡନୀ, ଲିଭର ଏବଂ ଆଖି ଚୋରି କରାଯାଉଛି। ସରକାର ମାନବ ଅଙ୍ଗ ଚୋରା ଚାଲାଣର ଏକ ନେଟୱାର୍କ ଚଳାଉଥିବା ଅଭିଯୋଗ ଅଣାଯାଇଛି।
ଚଳିତ ବର୍ଷ ଜୁନ ମାସରେ ଜାତିସଂଘର ଏକ ସ୍ବତନ୍ତ୍ର ବିଶେଷଜ୍ଞ ଦଳ ପକ୍ଷରୁ ଚାଇନାରେ ସଂଖ୍ୟାଲଘୁ ଗୋଷ୍ଠୀଙ୍କୁ ହତ୍ୟା ପରେ ଶରୀରରୁ ଅତ୍ୟାବଶ୍ୟକ ଅଙ୍ଗ କାଢ଼ି ନିଆଯାଉଥିବାକୁ ନେଇ ଉଦ୍ବେଗ ପ୍ରକାଶ କରାଯାଇଥିଲା। ଏସବୁ ଅଙ୍ଗ ପାଇଁ ମୁସଲମାନ ବନ୍ଦୀମାନଙ୍କୁ ଚାଇନା ସରକାର ହତ୍ୟା କରୁଛନ୍ତି। ଏନେଇ ବିଶେଷଜ୍ଞମାନେ ଦାବି କରିଛନ୍ତି ଯେ ସେମାନେ ଏନେଇ ସୂଚନା ପାଇଛନ୍ତି ଯେ ସଂଖ୍ୟାଲଘୁ କଏଦୀମାନଙ୍କର ଜବରଦସ୍ତ ରକ୍ତ ପରୀକ୍ଷାଙ୍, ଏକ୍ସ-ରେ ଏବଂ ଅଲଟ୍ରାସାଉଣ୍ଡ କରାଯାଉଛି। ଏଥିପାଇଁ କଏଦୀମାନଙ୍କଠାରୁ କୌଣସି ସ୍ବୀକୃତି ମଧ୍ୟ ନିଆଯାଉ ନାହିଁ।
ଅପରପକ୍ଷରେ, ଅଣ ମୁସଲମାନ କଏଦୀମାନଙ୍କର କୌଣସି ଯାଞ୍ଚ୍ କରାଯାଉ ନାହିଁ। ବିଶେଷଜ୍ଞମାନେ କହିଛନ୍ତି ଯେ ପୂର୍ବତନ ବନ୍ଦୀମାନଙ୍କ ଅଭିଯୋଗ ରହିଛି ଯେ ହାର୍ଟ, କିଡନୀ, ଲିଭର ଏବଂ ଆଖି ଇତ୍ୟାଦି କାଢ଼ି ନିଆଯାଉଛି। ଗତ ମାର୍ଚ୍ଚରେ ଖବର ଆସିଥିଲା ଯେ ଚାଇନା ମୁସଲମାନ କଏଦୀମାନଙ୍କୁ ହତ୍ୟା କରୁଛି ଯାହା ଦ୍ୱାରା କରୋନାରେ ପୀଡିତ ରୋଗୀଙ୍କ ଚିକିତ୍ସା ପାଇଁ ସେମାନଙ୍କ ଅଙ୍ଗକୁ ବ୍ୟବହାର କରାଯାଇପାରିବ।
ଚାଇନାର ସରକାରଙ୍କ ଏଭଳି ବୀଭତ୍ସ କାର୍ଯ୍ୟ ବିରୋଧରେ ପ୍ରଚାର କରୁଥିବା ବିଟର୍ ଓ୍ବିଣ୍ଟର ପତ୍ରିକା ଲେଖିଛି ଯେ ଖୁବ କମ ସମୟ ମଧ୍ୟରେ ଚାଇନାରେ ମେଳ ଖାଉଥିବା ଅଙ୍ଗ ମିଳିଥିଲା। ଏହାଦ୍ୱାରା ଅଙ୍ଗ ଚୋରା ଚାଲାଣ ହେବାର ଆଶଙ୍କା ବଢ଼ିବାରେ ଲାଗିଛି। ପ୍ରକୃତ ପକ୍ଷେ ମେଳ ଖାଉଥିବା ଅଙ୍ଗ ଖୋଜିବା ପାଇଁ ଅନେକ ବର୍ଷ ଲାଗିଥାଏ। ଜଣେ ଅନୁସନ୍ଧାନକାରୀ ଗଣମାଧ୍ୟମ ପ୍ରତିନିଧି ଦାବି କରିଛନ୍ତି ଯେ ଚାଇନାରେ କରୋନା ଭାଇରସ ରୋଗୀଙ୍କ ଜୀବନ ବଞ୍ଚାଇବାକୁ ଲାଗି ଉଇଗର ମୁସଲମାନ କଏଦୀମାନଙ୍କୁ ହତ୍ୟା କରାଯାଇଛି।