ମୁମ୍ବାଇ,୨୭।୧୧ : ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ତାଙ୍କ ସମର୍ଥକ ବିଧାୟକ, ଏମ୍ପି ଏବଂ ସେମାନଙ୍କ ପରିବାର ଶନିବାର ଆସାମର ଗୁଆହାଟୀରେ ପହଞ୍ଚିଛନ୍ତି। ଏହି ଗସ୍ତ ସହିତ ତାଙ୍କ ଶିବିରରେ ବିଦ୍ରୋହର ସ୍ବର ସୃଷ୍ଟି ହୋଇଛି। ବିରୋଧୀମାନେ ଶିନ୍ଦେଙ୍କୁ ଘେରିବାର କୌଣସି ସୁଯୋଗ ଛାଡୁ ନାହାଁନ୍ତି। କାରଣ ତାଙ୍କ ଶିବିରର ୬ ଜଣ ବିଧାୟକ ତାଙ୍କ ଗସ୍ତରୁ ନିଜକୁ ଦୂରେଇ ରଖିଛନ୍ତି। ମନ୍ତ୍ରୀ ହୋଇ ନ ଥିବାରୁ ସେମାନଙ୍କ ମଧ୍ୟରୁ କେତେକ ଅସନ୍ତୁଷ୍ଟ ରହିଥିବା ବୋଲି ଚର୍ଚ୍ଚା ହେଉଛି। ଦ୍ୱିତୀୟ ଥର ପାଇଁ ଶିନ୍ଦେ ତାଙ୍କର ୪୦ ଜଣ ବିଧାୟକ ଏବଂ କିଛି ସ୍ବାଧୀନ ବିଧାୟକ ଦର୍ଶନ ପାଇଁ କାମାକ୍ଷା ମନ୍ଦିରରେ ପହଞ୍ଚିଛନ୍ତି।
ଏହାପୂର୍ବରୁ ଚଳିତ ବର୍ଷ ଜୁନରେ ଉଦ୍ଧବ ଠାକରେଙ୍କ ବିରୋଧରେ ବିଦ୍ରୋହ ପରେ ସେ ବିଦ୍ରୋହୀମାନଙ୍କ ସହ ଗୁଆହାଟୀରେ ଏକାଠି ହୋଇଥିଲେ। ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବ ସରମାଙ୍କୁ ଭେଟିବା ପୂର୍ବରୁ ଶିନ୍ଦେ କହିଛନ୍ତି, ଆମେ ମହାରାଷ୍ଟ୍ରର ଲୋକଙ୍କ ପାଇଁ କାମାକ୍ଷୀ ଦେବୀଙ୍କ ପାଖରେ ସୁଖ ସମୃଦ୍ଧି ପ୍ରାର୍ଥନା କରିଛୁ। ମହାରାଷ୍ଟ୍ର ଏବଂ ଆସାମର ଏକ ଭିନ୍ନ ସମ୍ପର୍କ ଅଛି ବୋଲି ସେ କହିଛନ୍ତି।
ଆସାମରେ ଭାଜପା ସରକାର ଶିନ୍ଦେ ଏବଂ ତାଙ୍କ ଦଳର ବିଧାୟକମାନଙ୍କୁ ରାଜ୍ୟ ଅତିଥି ଭାବେ ଘୋଷଣା କରିଛନ୍ତି। ସେମାନଙ୍କୁ ବିଶେଷ ପ୍ରକାରର ସୁରକ୍ଷା ଦିଆଯାଇଛି। କଳ୍ପନାଜଳ୍ପନା ଚାଲିଛି ଯେ ପ୍ରଥମ କ୍ୟାବିନେଟ ସମ୍ପ୍ରସାରଣରେ ଅନ୍ତର୍ଭୁକ୍ତ ନହେବା କାରଣରୁ ଶିନ୍ଦେଙ୍କ ଶିବସେନାର କେତେକ ବିଧାୟକ ଅସନ୍ତୋଷ ପ୍ରକାଶ କରିଛନ୍ତି। ତିନିଜଣ ମନ୍ତ୍ରୀଙ୍କ ସହ ୬ ଜଣ ବିଧାୟକ ନିଜକୁ ଏହି ତୀର୍ଥଯାତ୍ରା ଠାରୁ ଦୂରରେ ରଖିଛନ୍ତି। ସେମାନଙ୍କ ମଧ୍ୟରେ ତାନଜୀ ସାୱନ୍ତ, ଗୁଲା ରାଓ ପାଟିଲ, ଅବଦୁଲ ସତ୍ତାର, ସଞ୍ଜୟ ଗାଇକୱାଡ, ଚନ୍ଦ୍ରକାନ୍ତ ପାଟିଲ, ମହେନ୍ଦ୍ର ଡାଲଭି ପ୍ରମୁଖ ଅଛନ୍ତି।