ମାଟି, ପାଣି, ପବନ, ଗଛଲତା, ପଶୁପକ୍ଷୀଙ୍କ ସୁରକ୍ଷା ସହ ଏକ ସୁସ୍ଥ ପରିବେଶ ପାଇଁ କ’ଣ ଆବଶ୍ୟକ ସେ କଥା ସେ ବେଶ୍ ଭଲରେ ବୁଝିଛନ୍ତି। ସେଥିପାଇଁ ତ ପିଲାଟିଦିନୁ ସେ ନିଜ ଜୀବନକୁ ପ୍ରକୃତି ସୁରକ୍ଷା ପ୍ରତି ଉତ୍ସର୍ଗ କରିଦେଇଛନ୍ତି। କେତେବେଳେ ତୃଷାର୍ତ୍ତ ପକ୍ଷୀଙ୍କ ତୃଷ୍ଣା ମେଣ୍ଟାଉଛନ୍ତି ତ କେତେବେଳେ ପରିବେଶ ସୁରକ୍ଷା ପ୍ରତି ଲୋକଙ୍କୁ କରାଉଛନ୍ତି ସଚେତନ। ତେବେ ଏହି ପ୍ରକୃତିପ୍ରେମୀ ଯୁବକ ହେଉଛନ୍ତି ଢେଙ୍କାନାଳ ଜିଲାର ମା’ ରାଜଲକ୍ଷ୍ମୀ ଏବଂ
ବାପା ଉଦୟନାଥ ଶତପଥୀଙ୍କ ପୁଅ ଶୁଭ୍ରାଂଶୁ।
ବାପା ଜଣେ ବନ ଅଧିକାରୀ ହୋଇଥିବାରୁ ତାଙ୍କ ପିଲା ବେଳ କଟିଛି ବଣଜଙ୍ଗଲରେ। ତେଣୁ ପ୍ରକୃତି ପ୍ରତି ଭଲ ପାଇବା ତାଙ୍କର ପିଲାଦିନୁ । ବୃକ୍ଷ ରୋପଣ ହେଉ ଅବା ଅନ୍ୟାନ୍ୟ ପରିବେଶ ସୁରକ୍ଷା ଲାଗି ସେ ସର୍ବଦା ବ୍ରତୀ। ଖରାଦିନେ କିପରି ପଶୁପକ୍ଷୀ ନିଜ ଶୋଷ ମେଣ୍ଟାଇ ପାରିବେ, ସେନେଇ ସେ ଘରର ଛାତ, ଅଗଣା, ବାରିଆଡ଼େ ମାଟିପାତ୍ରରେ ପାଣି ରଖିବାର ବ୍ୟବସ୍ଥା କରିଛନ୍ତି। ଆଉ ନିଜ ସାହି ପଡ଼ିଶାରୁ ଆରମ୍ଭ କରି ବୁଲିବୁଲି ସ୍କୁଲ, କ୍ଲବ ଓ ବିଭିନ୍ନ ଅନୁଷ୍ଠାନର ଲୋକଙ୍କୁ ଏ ସମ୍ପର୍କରେ ସଚେତନ କରାଉଛନ୍ତି। ଏପର୍ଯ୍ୟନ୍ତ ପ୍ରାୟ ୩୧ ହଜାରରୁ ଅଧିକ ମାଟିପାତ୍ର ପ୍ରଦାନ କରି ମହାମହିମ ରାଜ୍ୟପାଳଙ୍କଠାରୁ ‘ବାର୍ଡମ୍ୟାନ’ ସମ୍ମାନ ମଧ୍ୟ ଗ୍ରହଣ କରିଛନ୍ତି। ପ୍ରତିବର୍ଷ ଦୀପାବଳିରେ ଇକୋ ବା ଗ୍ରୀନ୍ ଦୀପାବଳି ନେଇ ସ୍କୁଲରେ କର୍ମଶାଳା ଆୟୋଜନ କରିଥା’ନ୍ତି। ରକ୍ଷାବନ୍ଧନରେ ଗଛଗୁଡ଼ିକରେ ରାଖୀ ବାନ୍ଧି ଗଛକଟା ରୋକିବା ସହ ଏକ ସବୁଜ ବଳୟ ସୃଷ୍ଟି କରି ପରିବେଶ ସୁରକ୍ଷା ନେଇ ବାର୍ତ୍ତା ଦେଇଥାନ୍ତି ଶୁଭ୍ରାଂଶୁ। ସେ ବହୁ ବର୍ଷ ଧରି ବିଭିନ୍ନ ମଞ୍ଜି ସଂଗ୍ରହ କରି ଏହାକୁ ମାଟିଗୁଳାରେ ଭର୍ତ୍ତି କରି ସିଡ୍ ବଲ ପ୍ରସ୍ତୁତ କରି ରାସ୍ତାର ଉଭୟ ପାର୍ଶ୍ୱ ଏବଂ ଜଙ୍ଗଲକୁ ଫିଙ୍ଗିଥା’ନ୍ତି। ଏପର୍ଯ୍ୟନ୍ତ ୧ ଲକ୍ଷରୁ ଊଦ୍ଧର୍ବ ସିଡ୍ ବଲ୍ ନିର୍ମାଣ କରିଥିବା ବେଳେ ରାଜ୍ୟରେ ପ୍ରଥମ ଥର ଡ୍ରୋନ୍ ଯୋଗେ ସିଡ୍ ବଲ୍ ଅପହଞ୍ଚ ଇଲାକାରେ ପହଞ୍ଚାଇ ପାରିଛନ୍ତି। ୨୦୦୮ ମସିହାରେ ପ୍ରଥମ ଥର ପାଇଁ ସେ ଆରମ୍ଭ କରିଥିଲେ ସିଡ୍ ବଲ୍ ଏବଂ ମାଟିପାତ୍ର ଭିତ୍ତିକ କର୍ମଶାଳା। ସେବେଠୁ ପ୍ରତିବର୍ଷ ସଫଳତାର ସହ ଏହା କରିଆସୁଛନ୍ତି।
ଓ୍ବାଇଲ୍ଡ ଲାଇଫ୍ ଫଟୋଗ୍ରାଫିରେ ମଧ୍ୟ ତାଙ୍କର ବେଶ୍ ରୁଚି ରହିଛି। କେତେବେଳେ ସେ ନିର୍ବାକ୍ ଜୀବଜନ୍ତୁଙ୍କ ଫଟୋ ଉଠାନ୍ତି ତ କେତେବେଳେ ଫିଲ୍ମ ଜରିଆରେ କରନ୍ତି ସେମାନଙ୍କ ପାଇଁ ସ୍ବର ଉତ୍ତୋଳନ। ଏପରିକି ସଂରକ୍ଷିତ ଜଙ୍ଗଲ ଓ ପଶୁପକ୍ଷୀଙ୍କ ସୁରକ୍ଷା ନିମନ୍ତେ ବିଭିନ୍ନ ଲେଖା ମାଧ୍ୟମରେ ଲୋକଙ୍କୁ ସଚେତନ କରାଇଥା’ନ୍ତି। ତେବେ ୨୦୧୦ରେ ସେ ‘ଦେ ରିଏଲୀ ନିଡ୍ ଅସ୍’ ନାମକ ପରିବେଶ ସୁରକ୍ଷା ଭିତ୍ତିକ ପ୍ରାମାଣିକ ଚଳଚ୍ଚିତ୍ର ନିର୍ମାଣ କରିଥିଲେ, ଯେଉଁଥିପାଇଁ ସେ ବିଶ୍ବ ଦରବାରରେ ପରିଚିତ ହୋଇପାରିଥିଲେ। ଜଣେ ଯୁବ ଫିଲ୍ମ ମେକର ଭାବେ ନିଜର ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିଲେ। ଏହି ଫିଲ୍ମ ପାଇଁ ୨୦୧୨ ବସୁଧା ନ୍ୟାଶନାଲ୍ ଫେଷ୍ଟିଭାଲ୍ରେ ଏବଂ ଇଣ୍ଟରନ୍ୟାଶନାଲ୍ ଷ୍ଟୁଡେଣ୍ଟସ୍ ଫିଲ୍ମ ଫେଷ୍ଟିଭାଲରେ ତାଙ୍କୁ ମିଳିଛି ବେଷ୍ଟ ଡାଇରେକ୍ଟର ଆଓ୍ବାର୍ଡ। ୫ମ ଦାଦାସାହେବ ଫିଲ୍ମ ଫେଷ୍ଟିଭାଲ୍-୨୦୧୬ରେ ସ୍କ୍ରିନିଂ ଆଓ୍ବାର୍ଡ ସହିତ ତାଙ୍କୁ ମିଳିଥିଲା ଅନେକ ଜାତୀୟ ଓ ଅନ୍ତର୍ଜାତୀୟ ସ୍ତରରେ ସମ୍ମାନ ଏବଂ ପୁରସ୍କାର। ସେହିପରି ୨୦୧୪ରେ ‘ଲେଟ୍ ଦେମ୍ ବ୍ରିଥ୍’ ନାମକ ଆଉ ଏକ ଫିଲ୍ମ ପାଇଁ ମଧ୍ୟ ସେ ଅନେକ ପୁରସ୍କାରର ଅଧିକାରୀ ହୋଇପାରିଛନ୍ତି। ଏହି ସମାଜଧର୍ମୀ କାର୍ଯ୍ୟ ପାଇଁ ଯୁବପିଢିଙ୍କ ପାଇଁ ଉଦାହରଣ ପାଲଟିଛନ୍ତି ଶୁଭ୍ରାଂଶୁ।
– ପୌର୍ଣ୍ଣମାସୀ