ନୂଆଦିଲ୍ଲୀ,୧୪ା୯(ପି.ଟି.): କୋଭିଡ୍ ମହାମାରୀର ଦ୍ୱିତୀୟ ଲହର ବେଳେ ହସ୍ପିଟାଲଗୁଡ଼ିକରେ ଅକ୍ସିଜେନ ଅଭାବରୁ ବହୁ ରୋଗୀଙ୍କ ମୃତ୍ୟୁ ଘଟିଥିଲା। ରାଜ୍ୟଗୁଡ଼ିକ ସହଯୋଗରେ ଉକ୍ତ ମୃତ୍ୟୁର ଅଡିଟ୍ କରିବା ଲାଗି ସଂସଦୀୟ କମିଟି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟକୁ ସୁପାରିସ କରିଛି। ଅକ୍ସିଜେନ ଅଭାବରୁ କେତେ କୋଭିଡ୍ ରୋଗୀଙ୍କ ଜୀବନ ଯାଇଥିଲା, ତାହାର ରିପୋର୍ଟ ମନ୍ତ୍ରଣାଳୟ ନିକଟରେ ନ ରହିବା ଦୁର୍ଭାଗ୍ୟଜନକ ବୋଲି କମିଟି କହିଛି। ଅକ୍ସିଜେନ ଅଭାବଜନିତ କୋଭିଡ୍ ମୃତ୍ୟୁର ଅତ୍ୟନ୍ତ ସତର୍କତାର ସହ ଯାଞ୍ଚ କରି ମୃତକଙ୍କ ପରିବାରକୁ ଉପଯୁକ୍ତ କ୍ଷତିପୂରଣ ଯୋଗାଇଦେବା ଆବଶ୍ୟକ। ଏଥିପାଇଁ ସରକାରୀ ସଂସ୍ଥାଗୁଡ଼ିକ ଅଧିକ ସ୍ବଚ୍ଛ ଓ ଉତ୍ତରଦାୟୀ ହେବା ଆବଶ୍ୟକ ବୋଲି ସ୍ବାସ୍ଥ୍ୟ ସମ୍ବନ୍ଧୀୟ ସଂସଦୀୟ କମିଟି କହିଛି। ସୋମବାର କମିଟି ଏହାର ୧୩୭ତମ ରିପୋର୍ଟ ରାଜ୍ୟ ସଭାରେ ଦାଖଲ କରିଛି। କୋଭିଡ୍ ପଜିଟିଭ୍ ମାମଲା ବୃଦ୍ଧି ସ୍ବାସ୍ଥ୍ୟ ଭିତ୍ତିଭୂମି ଉପରେ ଅତ୍ୟଧିକ ଚାପ ପକାଇଥିବା ରିପୋର୍ଟରେ ଦର୍ଶାଯାଇଛି। କମିଟି ତାଙ୍କର ୧୨୩ତମ ରିପୋର୍ଟରେ ଅକ୍ସିଜେନ ସିଲିଣ୍ଡର ଏବଂ ହସ୍ପିଟାଲଗୁଡ଼ିକୁ ଅକ୍ସିଜେନ୍ ଯୋଗାଣର ସମ୍ଭାବ୍ୟ ଅଭାବ ସମ୍ପର୍କରେ ସତର୍କ କରାଇଥିଲେ। ଅଥଚ ମନ୍ତ୍ରଣାଳୟ ୨୦୨୦ରେ ଦେଇଥିବା ରିପୋର୍ଟରେ ହସ୍ପିଟାଲଗୁଡ଼ିକରେ ପର୍ଯ୍ୟାପ୍ତ ଅକ୍ସିଜେନ ରହିଥିବା ଦର୍ଶାଇବା ଦୁଃଖଦାୟକ ବୋଲି କମିଟି କହିଛି।