ନୂଆଦିଲ୍ଲୀ,୪।୯: ଦେଶର ୧୨ଟି ହାଇକୋର୍ଟରେ ବିଚାରପତିଙ୍କୁ ନିଯୁକ୍ତ କରାଯିବାଲାଗି ସୁପ୍ରିମ୍କୋର୍ଟଙ୍କ ଦ୍ୱାରା ଗଠିତ ହୋଇଥିବା ୩ ଜଣିଆ କଲେଜିୟମ୍ ୬୮ଜଣଙ୍କ ନାମ ସୁପାରିଶ କରିଛନ୍ତି। ପ୍ରଧାନ ବିଚାରପତି ଏନ.ଭି ରମନାଙ୍କ ନେତୃତ୍ୱରେ ଏକ ତିନି ଜଣିଆ ସୁପ୍ରିମକୋର୍ଟ କଲେଜିୟମ ପକ୍ଷରୁ ନିଷ୍ପତ୍ତି ଗ୍ରହଣ କରାଯାଇଛି। କଲେଜିୟମ୍ରେ ଜଷ୍ଟିସ ୟୁ .ୟୁ. ଲଲିତ ଏବଂ ଜଷ୍ଟିସ ଏ.ଏମ. ଖାନୱିଲକର ମଧ୍ୟ ସାମିଲ ରହିଛନ୍ତି।
ଆହ୍ଲାବାଦ, ରାଜସ୍ଥାନ, କୋଲକାତା, ଝାଡଖଣ୍ଡ, ଜମ୍ମୁ-କଶ୍ମୀର, ମାଡ୍ରାସ, ମଧ୍ୟପ୍ରଦେଶ, କର୍ନାଟକ, ପଞ୍ଜାବ ଏବଂ ହରିୟାଣା, କେରଳ, ଛତିଶଗଡ ଏବଂ ଆସାମ ଆଦି ହାଇକୋର୍ଟରେ ଏସବୁ ବିଚାରପତିମାନେ ନିଯୁକ୍ତ ହେବେ।
ଅଗଷ୍ଟ୨୫ ଏବଂ ସେପ୍ଟେମ୍ବର ୧ ରେ ଅନୁଷ୍ଠିତ ବୈଠକରେ କଲେଜିୟମ ୧୧୨ ଜଣ ପ୍ରାର୍ଥୀଙ୍କ ନାମ ଉପରେ ବିଚାର କରିଥିଲେ। ସେଥିମଧ୍ୟରେ ବାରରୁ ୮୨ ଜଣ ଏବଂ ନ୍ୟାୟିକ ସେବାରୁ ୩୧ ଜଣ ରହିଥିଲେ। ସୁପାରିଶ ହୋଇଥିବା ନାମଗୁଡିକ ମଧ୍ୟରେ ୪୪ ଜଣ ବାରରୁ ଥିବାବେଳେ ଏବଂ ୨୪ ଜଣ ଜୁଡିସିଆଲ ସର୍ଭିସରୁ ରହିଛନ୍ତି।
ଅନୁସୂଚିତ ଜନଜାତିର ଜଣେ ମହିଳା ନ୍ୟାୟିକ ଅଧିକାରୀ ମାର୍ଲୀ ଭାନକଙ୍ଗଙ୍କୁ ଗୌହାଟି ହାଇକୋର୍ଟକୁ ପଦୋନ୍ନତ୍ତି କରିବା ପାଇଁ କଲେଜିୟମ ଦ୍ୱାରା ସୁପାରିଶ କରାଯାଇଛି। ସେ ମିଜୋରାମର ପ୍ରଥମ ହାଇକୋର୍ଟ ବିଚାରପତି ହେବେ। ତାଲିକାରେ ୧୦ ଜଣ ମହିଳା ଅଛନ୍ତି ଯେଉଁମାନଙ୍କର ପଦୋନ୍ନତ୍ତି ଲାଗି ସୁପାରିଶ କରାଯାଇଛି।