ନୂଆଦିଲ୍ଲୀ,୩୦।୧ : ଭାରତରେ ଉଚ୍ଚଶିକ୍ଷାରେ ଡ୍ରପଆଉଟ ହାର ଧୀରେ ଧୀରେ ହ୍ରାସ ପାଉଛି। ଚଳିତ ବର୍ଷ ଏଥିରେ ରେକର୍ଡ ସୃଷ୍ଟି ହୋଇଛି। ପ୍ରଥମ ଥର ପାଇଁ ୪.୧୪ କୋଟିରୁ ଅଧିକ ଛାତ୍ରୀଛାତ୍ର ନାମ ଲେଖାଇଛନ୍ତି। ସେଥିମଧ୍ୟରେ ଦୁଇ କୋଟିରୁ ଅଧିକ ଛାତ୍ରୀ ଅଛନ୍ତି।
ମୋଟ ନାମଲେଖା ଅନୁପାତ ୨୦୧୪ ବର୍ଷ ତୁଳନାରେ ୨୧ ପ୍ରତିଶତ ବୃଦ୍ଧି ପଞ୍ଜିକୃତ କରିଛି। ଯେଉଁଠାରେ, ୧୮ ରୁ ୨୩ ବର୍ଷ ବୟସ ପାଇଁ ଜିଇଆର ୨୭.୩ ପ୍ରତିଶତରେ ପହଞ୍ଚିଛି। ଶିକ୍ଷା ମନ୍ତ୍ରଣାଳୟ ଦ୍ୱାରା ରବିବାର ବିଳମ୍ବିତ ରାତିରେ ପ୍ରକାଶିତ ଅଲ ଇଣ୍ଡିଆ ସର୍ଭେ ୨୦୨୦-୨୧ର ରିପୋର୍ଟରେ ଏହା ପ୍ରକାଶ ପାଇଛି।
ଦେଶର ଉଚ୍ଚଶିକ୍ଷା ପ୍ରତିଷ୍ଠାନଗୁଡ଼ିକୁ ଅନ୍ତର୍ଭୁକ୍ତ କରୁଥିବା ଶିକ୍ଷା ମନ୍ତ୍ରଣାଳୟ ୨୦୧୧ ମସିହାରୁ ଉଚ୍ଚଶିକ୍ଷାର ଅଲ ଇଣ୍ଡିଆ ସର୍ଭେ କରିଆସୁଛି। ଏହି ସର୍ଭେ ଛାତ୍ର ନାମଲେଖା, ଶିକ୍ଷକ ତଥ୍ୟ, ଭିତ୍ତିଭୂମି ସୂଚନା, ଆର୍ଥିକ ସୂଚନା ଇତ୍ୟାଦି ବିଭିନ୍ନ ପାରାମିଟର ଉପରେ ବିସ୍ତୃତ ସୂଚନା ସଂଗ୍ରହ କରିଥାଏ।
ବିଶେଷ କଥା ହେଉଛି ଏସଟି ବର୍ଗରେ ସର୍ବାଧିକ ଛାତ୍ରୀଙ୍କ ସଂଖ୍ୟା ୬୩.୪ ପ୍ରତିଶତରେ ପହଞ୍ଚିଛି। ଉନ୍ନତ ପ୍ରଦର୍ଶନ ଯୋଗୁଁ ଉତ୍ତରପ୍ରଦେଶ, ମହାରାଷ୍ଟ୍ର, ତାମିଲନାଡୁ, ମଧ୍ୟପ୍ରଦେଶ, କର୍ନାଟକ, ରାଜସ୍ଥାନ ଶ୍ରେଷ୍ଠ ୬ ଶ୍ରେଣୀରେ ଯୋଗ ଦେଇଛନ୍ତି। ଜାତୀୟ ଶିକ୍ଷା ନୀତିର ସବୁଠାରୁ ଗୁରୁତ୍ୱପୂର୍ଣ୍ଣ ଯୋଜନା ହେଉଛି ଉଚ୍ଚଶିକ୍ଷାରେ ଛାତ୍ରୀଛାତ୍ରଙ୍କ ନାମଲେଖା ବୃଦ୍ଧି କରିବା, ଯାହା ଦ୍ୱାରା ଛାତ୍ରୀଛାତ୍ରମାନେ ଦ୍ୱାଦଶ ପରେ ଅଧ୍ୟୟନ ଜାରି ରଖିପାରିବେ। ଏଥିପାଇଁ ବିଭିନ୍ନ ଯୋଜନା ପ୍ରସ୍ତୁତ କରାଯାଉଛି।