ଆଡିଲେଡ: ଅଷ୍ଟ୍ରେଲିଆର ପ୍ରଥମଶ୍ରେଣୀ ଘରୋଇ କ୍ରିକେଟ ପ୍ରତିଯୋଗିତା ଶେଫିଲ୍ଡ ଶିଲ୍ଡରେ ରେକର୍ଡ ପାର୍ଟନରଶିପ୍ ସୃଷ୍ଟି କରିଛନ୍ତି ଟେଷ୍ଟ ବ୍ୟାଟ୍ସମ୍ୟାନ ମାର୍କୁସ ହାରିସ ଓ ପ୍ରତିଭା ସମ୍ପନ୍ନ ଓ୍ବିଲ ପୁକୋଭସ୍କି। ସାଉଥ ଅଷ୍ଟ୍ରେଲିଆ ବିପକ୍ଷରେ ଏ ଦୁହେଁ ଭିକ୍ଟୋରିଆ ପକ୍ଷରୁ ଓପନିଂ ଯୋଡ଼ିରେ ୪୮୬ ରନର ଭାଗୀଦାରି ଗଢ଼ି ୩୦ ବର୍ଷ ତଳର ରେକର୍ଡ ଭାଙ୍ଗିଛନ୍ତି। ହାରିସ ୨୩୯ ରନରେ ଆଉଟ ହେବା ସହ ଏହି ପାର୍ଟନରଶିପ୍ ଭାଙ୍ଗିଥିଲା। ୩୦ ବର୍ଷ ପୂର୍ବେ ଅର୍ଥାତ୍ ୧୯୯୦ରେ ଓ୍ବ’ ବ୍ରଦର୍ସ ମାର୍କ ଓ ଷ୍ଟିଭ୍ ଓ୍ବେଷ୍ଟର୍ନ ଅଷ୍ଟ୍ରେଲିଆ ବିପକ୍ଷରେ ନ୍ୟୁ ସାଉଥ୍ ଓ୍ବେଲ୍ସ ପକ୍ଷରୁ ୪୬୪ ରନର ପାର୍ଟନରଶିପ୍ ଗଢ଼ି ରେକର୍ଡର ଅଧିକାରୀ ଥିଲେ। ୧୮୯୨ରେ ଶେଫିଲ୍ଡ ଶିଲ୍ଡ ଆରମ୍ଭ ହେବାଠାରୁ ହାରିସ ଓ ପୁକୋଭସ୍କିଙ୍କ ଭାଗୀଦାରି ସର୍ବଶ୍ରେଷ୍ଠ।
