ଭୁବନେଶ୍ୱର,୧୬ା୧୨(ଅନୁରାଧା ମହାରଣା): କ୍ରମାଗତ ଭାବେ ଦେଶର ରାଷ୍ଟ୍ରାୟତ୍ତ ବ୍ୟାଙ୍କ ଗୁଡିକର କାରବାର ବେଶ ଉତ୍ସାହ ଜନକ ରହିଛି। ଏପରିକି ବ୍ୟାଙ୍କ ଗୁଡିକର ଲାଭ ପୂର୍ବପେକ୍ଷା ବୃଦ୍ଧି ପାଇଛି। ଗତ ଆର୍ଥିକ ବର୍ଷରେ ରାଷ୍ଟ୍ରାୟତ୍ତ ବ୍ୟାଙ୍କ ଗୁଡିକ ସର୍ବାଧିକ ୧.୪୧ ଲକ୍ଷ କୋଟି ଟଙ୍କାର ନେଟ୍ ଲାଭକରି ଏକ ଉଲ୍ଲେଖନୀୟ ସଫଳତା ହାସଲ କରିଛି। ଅପରପକ୍ଷରେ ଏହାର ଗ୍ରସ୍ ନନ୍ପର୍ଫମିଂ ଆସେଟସ୍ (ଜିଏନ୍ପିଏ) ଉଲ୍ଲେଖନୀୟ ହ୍ରାସ ଘଟି ୨୦୨୪ ସେପ୍ଟେମ୍ବରରେ ୩.୧୨%କୁ ଖସି ଆସିଛି। ଏପରିକି ଏହାର କ୍ରମାଗତ ପ୍ରଦର୍ଶନ ସହ ୮୫,୫୨୦ କୋଟିର ନେଟ୍ ଲାଭ ହାସଲ କରିଛି। ଏହା ବ୍ୟତୀତ ଗତ ୩ବର୍ଷ ମଧ୍ୟରେ ମୋଟ ୯, ୬୧,୯୬୪ କୋଟି ଡିଭିଡେଣ୍ଡ ଦେଇ ଶେୟାର ହୋଲ୍ଡର ରିଟର୍ନରେ ଯଥେଷ୍ଟ ଅବଦାନ ରଖିଛି। ଏହି ଗୁରୁତ୍ୱପୂର୍ଣ୍ଣ ଆର୍ଥିକ ଅଭିବୃଦ୍ଧି କ୍ଷେତ୍ରର କାର୍ଯ୍ୟକ୍ଷମ ଦକ୍ଷତା, ଉନ୍ନତ ସମ୍ପତ୍ତି ଗୁଣବତ୍ତା ଏବଂ ଦୃଢ଼ ପୁଞ୍ଜି ଆଧାରକୁ ସୂଚିତକରେ। ସେମାନଙ୍କର ଆର୍ଥିକ ସଫଳତା ବ୍ୟତୀତ ଏହି ବ୍ୟାଙ୍କଗୁଡିକ ଆର୍ଥିକ ଅନ୍ତର୍ଭୁକ୍ତିକୁ ପ୍ରୋତ୍ସାହିତ କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି । ଅଟଳ ପେନ୍ସନ ଯୋଜନା ଏବଂ ପ୍ରଧାନମନ୍ତ୍ରୀ ଜ୍ୟୋତି ବୀମା ଯୋଜନା ଭଳି ଗୁରୁତ୍ୱପୂର୍ଣ୍ଣ ସରକାରୀ ଯୋଜନା ମଧ୍ୟ କାର୍ଯ୍ୟକାରୀ କରିଛନ୍ତି।
ପବ୍ଲିକ୍ ସେକ୍ଟର ବ୍ୟାଙ୍କଗୁଡ଼ିକର ମୋଟ ଏନ୍ପିଏ ଅନୁପାତରେ ଏକ ଉଲ୍ଲେଖନୀୟ ଉନ୍ନତି ହୋଇଛି। ୨୦୧୮ ମାର୍ଚ୍ଚରେ ଏହା ୧୪.୫୮% ଥିବାବେଳେ ୨୦୨୪ ସେପ୍ଟେମ୍ବର ମଧ୍ୟରେ ୩.୧୨% କୁ ହ୍ରାସ ପାଇଛି। ୨୦୧୫ରେ ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ସମ୍ପତ୍ତି ଗୁଣବତ୍ତା ସମୀକ୍ଷା (ଏକ୍ୟୁଆର୍) ପ୍ରବର୍ତ୍ତନ କରିଥିବାବେଳେ ବ୍ୟାଙ୍କଗୁଡିକରେ ଲୁକ୍କାୟିତ ଚାପକୁ ଚିହ୍ନଟକରିବା ଏବଂ ସମାଧାନ କରିବା ସହ ଅନ୍ୟାନ୍ୟ ଦିଗରେ ଏହା ସହାୟକ ହୋଇଥିଲା। ଅନ୍ୟପଟେ ପବ୍ଲିକ୍ ସେକ୍ଟର ବ୍ୟାଙ୍କଗୁଡ଼ିକର ସିଆର୍ଏଆର୍ ୨୦୧୪-୧୫ ତୁଳନାରେ ୩୯% ବୃଦ୍ଧି ପାଇଛି । ୨୦୨୪ ସେପ୍ଟେମ୍ବରରେ ୧୫.୪୩% କୁ ବୃଦ୍ଧି ପାଇଛି, ଯାହା ମାର୍ଚ୍ଚ ୨୦୧୫ ରେ ୧୧.୪୫% ଥିଲା। ଏହି ସିଆର୍ଏଆର୍ ଆର୍ବିଆଇର ସର୍ବନିମ୍ନ ଆବଶ୍ୟକତାଠାରୁ ୧୧.୫% ଠାରୁ ବହୁତ ଅଧିକ। ଏହା ଅନୁଷ୍ଠାନଗୁଡ଼ିକର ଆର୍ଥିକ ସୁଦୃଢ଼ତାକୁ ଦର୍ଶାଉଛି।
ପିଏମ୍ ମୁଦ୍ରା, ଷ୍ଟାଣ୍ଡ ଅପ୍ ଇଣ୍ଡିଆ, ପିଏମ୍-ସ୍ବନିଧି, ପିଏମ୍ ବିଶ୍ୱକର୍ମା ଆଦି ପ୍ରମୁଖ ଆର୍ଥିକ ଅନ୍ତର୍ଭୁକ୍ତୀକରଣ ଯୋଜନା ଅଧୀନରେ ୫୪ କୋଟି ଜନଧନ ଆକାଉଣ୍ଟ ଏବଂ ୫୨ କୋଟି ଟଙ୍କାରୁ ଅଧିକ ଋଣ ମଞ୍ଜୁର କରାଯାଇଛି। ୨୦୧୪ ମାର୍ଚ୍ଚରେ ବ୍ୟାଙ୍କ ଶାଖା ସଂଖ୍ୟା ୧,୧୭,୯୯୦ ଥିବାବେଳେ ସେପ୍ଟେମ୍ବରରେ ଏହି ସଂଖ୍ୟା ୧,୬୦,୫୦୧କୁ ବୃଦ୍ଧି ପାଇଛି। ସେଥିମଧ୍ୟରୁ ୧,୦୦,୬୮୬ ଶାଖା ଗ୍ରାମୀଣ ଏବଂ ଅର୍ଦ୍ଧ ସହରୀ ଅଞ୍ଚଳରେ ଅଛି। ସେହିପରି କିଷାନ କ୍ରେଡିଟ କାର୍ଡ (କେସିସି) ମାଧ୍ୟମରେ କୃଷକମାନଙ୍କୁ ସ୍ବଳ୍ପକାଳୀନ ଫସଲ ଋଣ ଯୋଗାଇଦିଆଯାଉଛି। ସେହିପରି କ୍ରମାଗତ ଭାବରେ ଏମ୍ଏସ୍ଏମ୍ଇ କ୍ଷେତ୍ରକୁ ପ୍ରୋସତ୍ାହିତ କରାଯାଉଛି। ଗତ ୩ ବର୍ଷ ମଧ୍ୟରେ ୧୫% ସିଏଜିଆର୍ ପଞ୍ଜୀକୃତ ହୋଇଛି। ୨୦୨୪ ମାର୍ଚ୍ଚ ଶେଷ ସୁଦ୍ଧା ମୋଟ ଅଗ୍ରଗତି ୨୮.୦୪ ଲକ୍ଷ କୋଟିରେ ପହଞ୍ଚିଛ। ଏହା ବାର୍ଷିକ ୧୭.୨% ଅଭିବୃଦ୍ଧି ଦର୍ଶାଉଛି। ୨୦୦୪-୨୦୧୪ ମଧ୍ୟରେ ଧାର୍ଯ୍ୟ ବାଣିଜି୍ୟକ ବ୍ୟାଙ୍କଗୁଡିକର ମୋଟ ଅଗ୍ରଗତି ୮.୫ ଲକ୍ଷ କୋଟିରୁ ୬୧ ଲକ୍ଷ କୋଟିକୁ ବୃଦ୍ଧି ପାଇଛି, ଯାହା ମାର୍ଚ୍ଚ ୨୦୨୪ ସୁଦ୍ଧା ୧୭୫ ଲକ୍ଷ କୋଟି ଟଙ୍କାକୁ ବୃଦ୍ଧି ପାଇବ ବୋଲି ଆଶା କରାଯାଉଛି।