କୋକସରା,୨୬ା୧୨ (ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ବ୍ଲକରେ ୧୩୫ ମିମି ବର୍ଷା ହୋଇଥିବା ସରକାରୀ ଭାବେ ରେକର୍ଡ କରାଯାଇଛି। ବର୍ଷା ଯୋଗୁ କୋକସରା ଗ୍ରାମର ଚାଷୀ ତୋଷନ ପ୍ରଧାନୀ, ଧର୍ମେନ୍ଦ୍ର ପ୍ରଧାନୀ, ଚିତ୍ତେଶ୍ୱରୀ ଶବର, ଭଜ ଶବର, କ୍ଷୀରସିନ୍ଧୁ ନେଗି ପ୍ରମୁଖଙ୍କ ଧାନ ପାଣିରେ ବୁଡି ରହିଛି। ଏହାବ୍ୟତୀତ ବ୍ଲକର ୨୨ ପଞ୍ଚାୟତର ଶତାଧିକ ଚାଷୀଙ୍କ ଫସଲ ନଷ୍ଟ ହୋଇଥିବା ଖବର ହସ୍ତଗତ ହୋଇଛି। ବିଭିନ୍ନ ମଣ୍ଡିରେ ବ୍ଲକର ୨୧୦ଜଣ ଚାଷୀଙ୍କ ୮୨୫୧.୯୭ କୁଇଣ୍ଟାଲ ଧାନ ବିକ୍ରି ନ ହୋଇ ପଡି ରହିଥିବା ବେଳେ ଲଗାଣ ବର୍ଷାରେ ଭିଜି ନଷ୍ଟ ହୋଇଥିବା ଜଣାପଡିଛି।
ଅନ୍ୟପଟେ ଅଣ ଜଳସେଚିତ ଜମିରେ ମୁଗ, ବିରି, ସୂର୍ଯ୍ୟମୁଖୀ, ଅଳସୀ, ବିରି, ହରଡ଼, ଶିମ୍ବ ଭଳି ଡାଲିଜାତୀୟ ଫସଲ କ୍ଷତିଗ୍ରସ୍ତ ହୋଇଥିବା ଚାଷୀ ଅଭିଯୋଗ କରିଛନ୍ତି। ବ୍ଲକର ଗମ୍ଭାରୀଗୁଡା, ଟେମରା, ଫୁପଗାଁ, ଚିକିଲି, କର୍ଲାଗୁଡା, ଗୋତମୁଣ୍ଡା, ପାତ୍ରବସା, ଡ଼ହଗାଁ, ସର୍ଗିଗୁଡା ଅଞ୍ଚଳରେ ବ୍ୟାପକ ଭାବେ ପନିପରିବା ଚାଷ ନଷ୍ଟ ହୋଇଥିବା ଦେଖିବାକୁ ମିଳିଛି। ଚାଷୀନେତା ଶିବ ପ୍ରସାଦ ପ୍ରଧାନୀ ଓ କୋକସରା ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲ କ୍ଷତିଗ୍ରସ୍ତ ଚାଷଜମି ଓ ବିଭିନ୍ନ ମଣ୍ଡିରେ ଚାଷୀଙ୍କୁ ଭେଟି ଆଲୋଚନା କରିଛନ୍ତି। କ୍ଷତିପୂରଣ ପାଇଁ କୋକସରା ତହସିଲଦାରଙ୍କୁ ଦାବିପତ୍ର ପ୍ରଦାନ କରାଯିବ ବୋଲି ଚାଷୀ ନେତା ପ୍ରଧାନୀ କହିଛନ୍ତି।