କଟକ ଅଫିସ,୩୦ା୩: ରାଜ୍ୟରେ କନ୍ଷ୍ଟେବଲ ନିଯୁକ୍ତି ପ୍ରକ୍ରିୟାକୁ ଚ୍ୟାଲେଞ୍ଜ କରି ହାଇକୋର୍ଟରେ ଦାଏର ୫ଟି ମାମଲାର ଏକତ୍ର ଶୁଣାଣି ବୁଧବାର ହୋଇଛି। ବିଚାରପତି ଆଦିତ୍ୟ କୁମାର ମହାପାତ୍ରଙ୍କ ଖଣ୍ଡପୀଠ ମାମଲାଗୁଡ଼ିକର ଶୁଣାଣି କରି ହାଇକୋର୍ଟଙ୍କ ରାୟ ଉପରେ କନ୍ଷ୍ଟେବଲ ନିଯୁକ୍ତି ପ୍ରକ୍ରିୟା ଚୂଡ଼ାନ୍ତ ହେବ ବୋଲି ନିର୍ଦ୍ଦେଶ ଦେଇଛନ୍ତି। ଆସନ୍ତା ୩ରେ ମାମଲାର ପରବର୍ତ୍ତୀ ଶୁଣାଣି ହେବ। ଆବେଦନକାରୀଙ୍କ ପକ୍ଷରୁ ଆଇନଜୀବୀ ରାଜୀବ ରଥ ମାମଲା ପରିଚାଳନା କରୁଥିଲେ।
ମାମଲାର ବିବରଣୀରୁ ପ୍ରକାଶ, ରାଜ୍ୟରେ ୪୭୯୦ କନ୍ଷ୍ଟେବଲ ପଦବୀରେ ନିଯୁକ୍ତି ପାଇଁ ଗୃହ ବିଭାଗ ପକ୍ଷରୁ ୨୦୨୨ ଡିସେମ୍ବର ୩୦ରେ ବିଜ୍ଞପ୍ତି ପ୍ରକାଶ ପାଇଥିଲା। ଆବେଦନକାରୀଙ୍କ ମଧ୍ୟରେ ଲିଖିତ ପରୀକ୍ଷା ଅନୁଷ୍ଠିତ ହୋଇଥିଲା। ପୁରୀ ସମେତ ୪ଟି ଜିଲାରେ ହୋମଗାର୍ଡ ଭାବେ କାର୍ଯ୍ୟରତ କେତେଜଣ ଆବେଦନକାରୀ ଏହି ଲିଖିତ ପରୀକ୍ଷା ଦେଇଥିଲେ। ସେମାନେ ୩ରୁ ୬ ବର୍ଷ ପର୍ଯ୍ୟନ୍ତ ହୋମଗାର୍ଡ ଭାବେ ଚାକିରି କରିଥିଲେ ବି ତାଙ୍କୁ କନ୍ଷ୍ଟେବଲ ପଦବୀରେ ନିଯୁକ୍ତି ପ୍ରକ୍ରିୟାରୁ ବାଦ୍ ଦିଆଯାଇଥିଲା। କନ୍ଷ୍ଟେବଲ ନିଯୁକ୍ତିରେ ହୋମଗାର୍ଡ ଓ ଗ୍ରୁପ୍-ଡି କର୍ମଚାରୀଙ୍କ ନିମନ୍ତେ ୧୦% ଲେଖାଏ ସଂରକ୍ଷଣ ରହିବା କଥା, ଯାହା ଏଠାରେ ହୋଇନାହିଁ। ୨୦୨୨ ଜାନୁୟାରୀ ୧ ତାରିଖ ସୁଦ୍ଧା ହୋମଗାର୍ଡମାନଙ୍କ ବୟସ ୨୮ ବର୍ଷରୁ ଅଧିକ ହୋଇ ନ ଥିବା ଏବଂ ଗ୍ରୁପ୍-ଡି କର୍ମଚାରୀଙ୍କ ବୟସ ୪୩ରୁ ଅଧିକ ହୋଇ ନ ଥିବା ନିୟମ ରହିଛି। ତେବେ ସାରା ରାଜ୍ୟରୁ ପୋଲିସ ବିଭାଗରେ କାର୍ଯ୍ୟରତ ଗ୍ରୁପ୍-ଡି କର୍ମଚାରୀମାନେ ଏଥି ନିମନ୍ତେ ଆବେଦନ କରିଥିଲେ। ହେଲେ ଲିଖିତ ପରୀକ୍ଷା ପରେ କଟ୍ ଅଫ୍ ମାର୍କ ରହିବା କଥା, ମାତ୍ର ଏଠାରେ କଟ୍ ଅଫ୍ ମାର୍କ ପରୀକ୍ଷା ପୂର୍ବରୁ ରଖାଯାଇଛି। ତେଣୁ ଏହି ନିଯୁକ୍ତି ପ୍ରକ୍ରିୟା ନିମନ୍ତେ ହୋଇଥିବା ଗାଇଡ୍ ଲାଇନ୍ ଓ ପଦ୍ଧତି ତ୍ରୁଟିପୂର୍ଣ୍ଣ ଥିବା ଦର୍ଶାଇ ସେମାନଙ୍କୁ କନ୍ଷ୍ଟେବଲ ନିଯୁକ୍ତି ପ୍ରକ୍ରିୟାରେ ସାମିଲ କରିବା ନିମନ୍ତେ ନିର୍ଦ୍ଦେଶ ଦେବାକୁ ନିବେଦନ କରି ସେମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ରାଜ୍ୟ ସରକାରଙ୍କ ପ୍ରମୁଖ ଶାସନ ସଚିବ, ଡିଜିପି, ଆଇଜି ପୋଲିସ ଏବଂ ଓଡ଼ିଶା ଷ୍ଟେଟ୍ ସିଲେକସନ୍ ବୋର୍ଡର ଚେୟାରମ୍ୟାନ୍ଙ୍କୁ ମାମଲାରେ ପକ୍ଷଭୁକ୍ତ କରାଯାଇଛି।