ଏଏମ୍ଏନ୍ଏସ୍ ଇଣ୍ଡିଆର ଦକ୍ଷତା ବିକାଶ କାର୍ଯ୍ୟକ୍ରମ ଜରିଆରେ ନିଯୁକ୍ତି
06 ଭୁବନେଶ୍ୱର,୩୦।୫ (ଅଭୟ ଦାଶ): ଆର୍ସେଲର ମିତ୍ତଲ ନିପ୍ପନ ଷ୍ଟିଲ୍ ଇଣ୍ଡିଆ ଲିମିଟେଡ୍ ବା ଏଏମ୍ଏନ୍ଏସ୍ ଇଣ୍ଡିଆର ଦକ୍ଷତା ବିକାଶ କାର୍ଯ୍ୟକ୍ରମ ‘ଦକ୍ଷ’ ଜରିଆରେ ନିଯୁକ୍ତି ସୁଯୋଗ ଯୋଗାଇ ଦିଆଯାଉଛି। ଏପରିକି କମ୍ପାନୀର ଦକ୍ଷ କାର୍ଯ୍ୟକ୍ରମ ଅନୁଯାୟୀ ଜାତୀୟ ଦକ୍ଷତା ବିକାଶ ନିଗମ ସହାୟତାରେ କେନ୍ଦ୍ରାପଡ଼ାଠାରେ ଏକ ଡିଜିଟାଲ ଦକ୍ଷତା କେନ୍ଦ୍ର ପ୍ରତିଷ୍ଠା କରାଯାଇଥିଲାବେଳେ ସ୍ଥାନୀୟ ଯୁବତୀଯୁବକମାନେ ଏହି କେନ୍ଦ୍ରରୁ ନିଯୁକ୍ତିଭିତ୍ତିକ ଆଇଟି-ଆଇଟିଇଏସ୍ ତାଲିମ ସଫଳତାର ସହ ଗ୍ରହଣ କରିଛନ୍ତି। ସେହିଭଳି ପ୍ରଥମ ବ୍ୟାଚ୍ରେ ତାଲିମପ୍ରାପ୍ତ ୧୦୦ ଯୁବତୀଯୁବକଙ୍କ ମଧ୍ୟରୁ ୮୫ଜଣ ୱିପ୍ରୋ,ଟେକ୍-ମହିନ୍ଦ୍ରା,ଫ୍ଲିପ୍କାର୍ଟ ଏବଂ ତତ୍ତ୍ୱ ଟେକ୍ନୋଲୋଜି ଭଳି କମ୍ପାନୀରେ ଡୋମେଷ୍ଟିକ୍ ଡାଟା ଏଣ୍ଟ୍ରି ଅପରେଟର ଏବଂ ଡୋମେଷ୍ଟିକ୍ ଆଇଟି ହେଲ୍ପ ଡେସ୍କରେ ନିଯୁକ୍ତି ପାଇଛନ୍ତି। ଏହି ବ୍ୟାଚ୍ର ଯୁବତୀଯୁବକଙ୍କୁ ୧୦୦ରୁ ଅଧିକ ଚାକିରି ପ୍ରସ୍ତାବ ଦିଆଯାଇଥିଲା।
ଅପରପକ୍ଷରେ ସମ୍ପ୍ରଦାୟ ଏବଂ ଗ୍ରାମର ମୁରବିମାନଙ୍କ ସହ ବ୍ୟାପକ ପରାମର୍ଶ ପରେ ମହାକାଳପଡା ବ୍ଲକ୍ ଅଧୀନ ୧୧ଟି ଗ୍ରାମର ଯୁବତୀଯୁବକମାନଙ୍କୁ ତାଲିମ ପାଇଁ ମନୋନୀତ କରାଯାଇଥିଲା। ଏପରିକି ବୈଷୟିକ ତାଲିମ ବ୍ୟତୀତ ଯୋଗାଯୋଗ ଦକ୍ଷତା, ସାମଗ୍ରିକ ବ୍ୟକ୍ତିତ୍ୱ ବିକାଶ ଏବଂ ସାକ୍ଷାତ୍କାର କୌଶଳ ପ୍ରଭୃତି ଅଣବୈଷୟିକ ପାଠ୍ୟକ୍ରମରେ ନାମ ଲେଖାଇଥିବା ସମସ୍ତ ପ୍ରାର୍ଥୀଙ୍କୁ ସାମିଲ କରାଯାଇଥିଲା। ଉକ୍ତ ତାଲିମ କାର୍ଯ୍ୟକ୍ରମର ସଫଳ ସମାପ୍ତି ପରେ ପ୍ରଶିକ୍ଷାର୍ଥୀମାନଙ୍କୁ ବୃତ୍ତିଗତ ପ୍ରମାଣପତ୍ର ଏବଂ ନିଯୁକ୍ତିପତ୍ର ପ୍ରଦାନ କରାଯାଇଥିଲା। ନିକଟରେ ଦ୍ୱିତୀୟ ବ୍ୟାଚ୍ର ୧୦୦ ଯୁବତୀଯୁବକଙ୍କୁ ନିକଟସ୍ଥ ଗ୍ରାମରୁ ତାଲିମ ଦିଆଯିବ।
ଏ ସମ୍ପର୍କରେ ଏଏମ୍ଏନ୍ଏସ୍ ଇଣ୍ଡିଆର ସିଏସ୍ଆର୍ ମୁଖ୍ୟ ଡ. ବିକାଶ ୟାଦଭେନ୍ଦୁ ପାଠ୍ୟକ୍ରମ ସମାପ୍ତ ପରେ ସଫଳତାର ସହ ସ୍ଥାନିତ ହୋଇଥିବା ସମସ୍ତ ଯୁବତୀଯୁବକଙ୍କୁ ଅଭିନନ୍ଦନ ଜଣାଇ କହିଥିଲେ, ଦକ୍ଷତା ବିକାଶ କାର୍ଯ୍ୟକ୍ରମର ପ୍ରଥମ ବ୍ୟାଚ୍ରେ ୫୫% ସ୍ଥାନୀୟ ବାଳିକା ତାଲିମ ନେଇଥିଲେ ଏବଂ ଭବିଷ୍ୟତରେ ଆହୁରି ଅଧିକ ମାତ୍ରାରେ ବାଳିକା ଉକ୍ତ କାର୍ଯ୍ୟକ୍ରମରେ ଅଂଶଗ୍ରହଣ କରିବେ ବୋଲି ଆମେ ଆଶା ପ୍ରକାଶ କରୁଛୁ। ଏପରିକି ସ୍ଥାନୀୟ ବାସିନ୍ଦାଙ୍କୁ ଆବଶ୍ୟକ ସେବା ପ୍ରଦାନ ସହ ସମସ୍ତଙ୍କ ପାଇଁ ଉଜ୍ଜ୍ୱଳ ଭବିଷ୍ୟତ ଗଠନ ଦିଗରେ କାର୍ଯ୍ୟ କରିବାକୁ ଏଏମ୍ଏନ୍ଏସ୍ ଇଣ୍ଡିଆ ପ୍ରତିଶ୍ରୁତିବଦ୍ଧ ରହିଛି।
ଉଲ୍ଲେଖଯୋଗ୍ୟ, ଏଏମ୍ଏନ୍ଏସ୍ ଇଣ୍ଡିଆ ତା’ର ଅନ୍ୟ ଅପରେଟିଂ ସ୍ଥାନ ଜରିଆରେ ୮ଟି ଡିଜିଟାଲ ଦକ୍ଷତା କେନ୍ଦ୍ର ଚଳାଉଛି। ଏପରିକି ୧୫୦୦ରୁ ଅଧିକ ଶିକ୍ଷିତ ଏବଂ ବେକାର ଯୁବତୀଯୁବକଙ୍କୁ ତାଲିମ ଦିଆଯାଇଥିବାବେଳେ ୭୪% ଖ୍ୟାତିସମ୍ପନ୍ନ କମ୍ପାନୀରେ ସେମାନେ ଚାକିରି ସୁଯୋଗ ପାଇଛନ୍ତି।