କାବୁଲ,୨୬।୮: ଆଫଗାନିସ୍ତାନ ଶରଣାର୍ଥୀ ସଙ୍କଟ ଧିରେ ଧିରେ ବଢ଼ିବାରେ ଲାଗିଛି। ଏତେ ସଂଖ୍ୟକ ଲୋକଙ୍କୁ ଥଇଥାନ କରାଯିବା ବିଶ୍ୱସ୍ତରରେ ଏକ ଆହ୍ବାନ ସୃଷ୍ଟି କରିଛି। ଜୀବନ ବିକଳରେ ଭିଟାମାଟି ଛାଡିଥିବା ଲୋକଙ୍କ ଦୟନୀୟ ଫଟୋ ଏବଂ ଭିଡ଼ିଓ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଏହା ତାଲିବାନର ଆତଙ୍କକୁ ନେଇ ଲୋକଙ୍କ ମଧ୍ୟରେ ଏକ ବିରୋଧାଭାସ ସୃଷ୍ଟି କରୁଛି। ଆଫଗାନିସ୍ତାନରୁ ପଳାୟନ କରୁଥିବା ଶରଣାର୍ଥୀଙ୍କ ସଂଖ୍ୟା ଏବେ କ୍ରମାଗତ ଭାବେ ବୃଦ୍ଧି ପାଉଛି। ଆମେରିକା ଅନୁଯାୟୀ, ଅଗଷ୍ଟ ୧୫ ତାରିଖଠାରୁ ବିମାନ ମାଧ୍ୟମରେ ୮୦ ହଜାରରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି। ସେହିଭଳି ବ୍ରିଟେନ, ଫ୍ରାନ୍ସ, ଜର୍ମାନୀ, ୟୁକ୍ରେନ ସମେତ ଅନ୍ୟ ସମସ୍ତ ଦେଶ ସେମାନଙ୍କ ନାଗରିକଙ୍କ ସହିତ ଏବଂ ଆଫଗାନିସ୍ତାନୀଙ୍କୁ ସେଠାରୁ ସୁରକ୍ଷିତ ସ୍ଥାନାନ୍ତର କରୁଛନ୍ତି। ସେଠାରେ ଫସି ରହିଥିବା ଭାରତୀୟ ଏବଂ ଆଫଗାନିସ୍ତାନ ଶିଖ ଏବଂ ହିନ୍ଦୁମାନଙ୍କୁ ଥଇଥାନ କରିବା ପାଇଁ ଭାରତ ପକ୍ଷରୁ ଏକ ବଡ ଉଦ୍ଧାର କାର୍ଯ୍ୟ ଜାରି ରହିିଛି। ପ୍ରତିଦିନ ଦୁଇଟି ବିମାନ ଦୋହା ଅଭିମୁଖେ ଯାତ୍ରା କରୁଛନ୍ତି ଏବଂ ଦୋହା ଦେଇ ଭାରତୀୟମାନଙ୍କୁ ଆଫଗାନିସ୍ତାନରୁ ବାହାର କରାଯାଉଛି। ଗୋଟିଏ ପଟେ ଲୋକଙ୍କୁ କାବୁଲ ବିମାନବନ୍ଦରରୁ ସ୍ଥାନାନ୍ତର କରାଯାଉଥିବା ବେଳେ ଅନ୍ୟ ପଟେ ଆଫଗାନିସ୍ତାନବାସୀ ସେମାନଙ୍କ ପରିବାର ସହିତ ପଡୋଶୀ ଦେଶ ସୀମାରେ ବହୁ ସଂଖ୍ୟାରେ ଆଶ୍ରୟ ନେବାକୁ ଯାଉଛନ୍ତି। ଏହି ଶରଣାର୍ଥୀମାନଙ୍କୁ ଆମେରିକା, କାତାର, ବ୍ରିଟେନ, ଜର୍ମାନୀ, ୟୁଏଇ ସମେତ ଅନେକ ଦେଶରେ ରଖାଯାଉଛି। ଆଫଗାନିସ୍ତାନ ସହିତ ଇରାନ, ପାକିସ୍ଥାନ, ଉଜବେକିସ୍ତାନ, ତୁର୍କମେନିସ୍ତାନ ଏବଂ ତାଜିକିସ୍ତାନ ଆଦି ୫ ଟି ଦେଶର ସୀମା ଲାଗିଛି। ଜୀବନ ଭୟରେ ଲୋକେ ପଡୋଶୀ ଦେଶର ସୀମା ଆଡକୁ ମୁହାଁଇଛନ୍ତି। ଜାତିସଂଘ ଶରଣାର୍ଥୀ ଉଚ୍ଚାୟୁକ୍ତ(ୟୁଏନ୍ଏଚ୍ସିଆର୍)ଅନୁସାରେ ତାଲିବାନ ଦଖଲ ପୂର୍ବରୁ ୨୨ ଲକ୍ଷ ଆଫଗାନିସ୍ତାନ ଶରଣାର୍ଥୀ ପଡୋଶୀ ଦେଶରେ ଆଶ୍ରୟ ନେଇଥିବାବେଳେ ୩୫ ଲକ୍ଷ ଲୋକ କାବୁଲ-କାନ୍ଦାହାର ଭଳି ସହରର ପଳାଇ ଆସିଥିଲେ। ତାଲିବାନ ଶାସନ ସହିତ ତାଜିକିସ୍ତାନ, ଇରାନ, ଉଜବେକିସ୍ତାନ ସୀମାରେ ଜନସମାଗମ ଆରମ୍ଭ ହୋଇଥିଲା। ଆଫଗାନିସ୍ତାନ ଶରଣାର୍ଥୀଙ୍କୁ ରୋକିବା ପାଇଁ ପଡୋଶୀ ଦେଶ ତୁର୍କୀରେ ସୀମାରେ କାନ୍ଥ ନିର୍ମାଣ କରାଯାଇଛି। ଇରାନର ଆଫଗାନିସ୍ତାନ ସୀମାରେ ଥିବା ତିନୋଟି ପ୍ରଦେଶରେ ଜରୁରୀକାଳୀନ ତମ୍ବୁ ସ୍ଥାପନ କରାଯାଇଛି। ଶରଣାର୍ଥୀଙ୍କୁ ଜରୁରୀକାଳୀନ ସହାୟତା ଦିଆଯାଉଛି। ଇରାନ ଆଶା କରୁଛି ଯେ ଯେତେବେଳେ ଆଫଗାନିସ୍ତାନରେ ସ୍ଥିତିରେ ସୁଧାର ଆସିବ, ସେମାନଙ୍କୁ ପୁନର୍ବାର ପଠାଇ ଦିଆଯିବ। ତାଜିକିସ୍ତାନ ସୀମାରେ ୧ ଲକ୍ଷରୁ ଅଧିକ ଲୋକ ଆଶ୍ରୟ ନେଇଛନ୍ତି। ସେମାନଙ୍କ ମଧ୍ୟରେ ବହୁ ସଂଖ୍ୟକ ଆଫଗାନିସ୍ତାନ ସେନା ଏବଂ ବାୟୁସେନା କର୍ମଚାରୀ ମଧ୍ୟ ଅଛନ୍ତି। ଉଜବେକିସ୍ତାନର ସୀମାରେ ମଧ୍ୟ ଶରଣାର୍ଥୀ ସମସ୍ୟା ଦେଖାଦେଇଛି। ଆମେରିକା, ବ୍ରିଟେନ, ଫ୍ରାନ୍ସ, ଭାରତ ଆଦି ଦେଶରେ ଶରଣାର୍ଥୀଙ୍କୁ ଆଶ୍ରୟ ମିଳିଛି। ୟୁଏନ୍ଏଚ୍ସିଆର୍ର ରିପୋର୍ଟ ଅନୁସାରେ ଆଫଗାନିସ୍ତାନ ଶରଣାର୍ଥୀଙ୍କ ସଙ୍କଟ ୧୨ ଦେଶ ପାଇଁ ସତର୍କ ଘଣ୍ଟି ସୃଷ୍ଟି କରିଛି। ଏହା ପାକିସ୍ତାନକୁ ଅଧିକ ପ୍ରଭାବିତ କରୁଛି । ପାକିସ୍ତାନରେ ୧୪ ଲକ୍ଷ ୫୦ ହଜାରରୁ ଅଧିକ ଆଫଗାନିସ୍ତାନୀ ଆଶ୍ରୟ ନେଇଛନ୍ତି। ସେହିପରି ୭ ଲକ୍ଷ ୮୦ ହଜାର ଶରଣାର୍ଥୀ ଇରାନରେ ପହଞ୍ଚିଛନ୍ତି। ଜର୍ମାନୀରେ ଶରଣାର୍ଥୀଙ୍କ ସଂଖ୍ୟା ୧ ଲକ୍ଷ ୮୧ ହଜାର, ତୁର୍କୀରେ ୧ ଲକ୍ଷ ୨୯ ହଜାର, ଅଷ୍ଟ୍ରିଆରେ ୪୬ ହଜାର, ଫ୍ରାନ୍ସରେ ୪୫ ହଜାର, ଗ୍ରୀସରେ ୪୧ ହଜାର, ସ୍ବିଡ଼େନରେ ୩୧ ହଜାର, ସ୍ବିଜରଲାଣ୍ଡରେ ୧୫ ହଜାର, ଭାରତରେ ୧୫ ହଜାର,ଇଟାଲୀରେ ୧୩ ହଜାର,ବ୍ରିଟେନ୍ରେ ୧୨ ହଜାର ରହିଛି। ଏସବୁ ୧୨ ଦେଶରେ ଶରଣାର୍ଥୀଙ୍କ ଯୋଗୁ ଆଗାମୀ ଦିନରେ ବିଭିନ୍ନ ସମସ୍ୟା ଉପୁଜିବାର ଆଶଙ୍କା ବଢ଼ିବାରେ ଲାଗିଛି।