ମସ୍କୋ,୨୧।୮ : ରୁଷିଆ ଏବଂ ୟୁକ୍ରେନ ମଧ୍ୟରେ ଚାଲିଥିବା ଯୁଦ୍ଧ କେବେ ଶେଷ ହେବ ତାହା ପୂର୍ବାନୁମାନ କରିବା ଅତ୍ୟନ୍ତ କଷ୍ଟକର ହୋଇ ପଡ଼ିଛି। ଭାରତ ସମେତ ଅନେକ ବଡ ଦେଶର ଶାନ୍ତି ଆବେଦନ ପରେ ମଧ୍ୟ ଏଥିରୁ କୌଣସି ଫଳାଫଳ ବାହାରି ନାହିଁ। ଏହି ସମୟରେ, ରୁଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ଅଧିକାରୀମାନଙ୍କୁ ଆପଲ ଉପକରଣ ସମେତ ବିଦେଶୀ ଶବ୍ଦ, ବିଦେଶୀ ନିର୍ମିତ କାର ଏବଂ ପାଶ୍ଚାତ୍ୟ ପ୍ରଯୁକ୍ତିବିଦ୍ୟା ବ୍ୟବହାର ନ କରିବାକୁ ନିର୍ଦ୍ଦେଶ ଦେଇଛନ୍ତି।
ଏକ ରିପୋର୍ଟରେ କୁହାଯାଇଛି ଅଧିକାରୀମାନେ ପୁଟିନଙ୍କ କଥା ମାନୁ ନାହାଁନ୍ତି। ବାରଣ ପରେ, ରୁଷିଆର ପୂର୍ବତନ ରାଷ୍ଟ୍ରପତି ଦିମିତ୍ରୀ ମେଡଭେଡେଭ ଏହି ସପ୍ତାହରେ ଏକ ବିଳାସପୂର୍ଣ୍ଣ ମର୍ସିଡିଜ ବ୍ୟବହାର କରି ବିଦେଶରେ ନିର୍ମିତ ଗାଡିର ମୋଟରକେଡରେ ଏକ ଇଭେଣ୍ଟରେ ପହଞ୍ଚିଥିବାର ନଜର ଆସିଥିଲେ। ରିପୋର୍ଟରେ କୁହାଯାଇଛି ଏହା କେବଳ ଏକ ଘଟଣା ନୁହେଁ। ଏଭଳି ବହୁ କ୍ଷେତ୍ରରେ ଅଧିକାରୀମାନେ ବିଦେଶୀ ଗାଡ଼ି ବ୍ୟବହାର କରୁଛନ୍ତି।
ଖାଲି ସେତିକି ନୁହେଁ, ରାଷ୍ଟ୍ରପତି ଭ୍ଲାଦିମିର ପୁଟିନ ଅଧିକାରୀମାନଙ୍କୁ କାର ବ୍ୟବହାର ଇତ୍ୟାଦି ବନ୍ଦ କରିବାକୁ ନିର୍ଦ୍ଦେଶ ଦେବା ପରେ ରୁଷିଆର ସରକାରୀ ଏଜେନ୍ସିମାନେ ସପ୍ତାହରେ ବିଦେଶୀ କାର ପାଇଁ ୫୩ ମିଲିୟନ ରୁବେଲରୁ ଅଧିକ ଟଙ୍କା ଆବଣ୍ଟନ କରିଥିଲେ। ଜୁଲାଇରେ ଜାରି କରାଯାଇଥିବା ନିଷେଧାଦେଶ ସତ୍ତ୍ୱେ ରୁଷିଆର ପ୍ରତିରକ୍ଷା ମନ୍ତ୍ରଣାଳୟ, କୃଷି ମନ୍ତ୍ରଣାଳୟ ଏବଂ ରାଜ୍ୟ ପ୍ରଯୁକ୍ତିବିଦ୍ୟା ନିଗମ ରୋଷ୍ଟେକର ଅଧିକାରୀମାନେ କିପରି ଆପଲ ଉତ୍ପାଦ ବ୍ୟବହାର କରୁଛନ୍ତି ତାହା ଏକ ରିପୋର୍ଟରୁ ଜଣାପଡିଛି।