ଦାରିଙ୍ଗବାଡ଼ି,୧୩ା୮(ଡି.ଏନ୍.ଏ.): କନ୍ଧମାଳ ଜିଲା ଦାରିଙ୍ଗବାଡ଼ିଠାରେ ଶନିବାର ହର ଘର ତ୍ରିରଙ୍ଗା ଜୋରଦାର କରାଯାଇଛି। ଆଜାଦୀ କା ଅମୃତ ମହୋତ୍ସବ ପାଳନ ଅବସରରେ ଅଞ୍ଚଳର ସମସ୍ତ ଘରେ ତ୍ରିରଙ୍ଗା ଉଡ଼େଇବା ପାଇଁ ଦେଶ ପ୍ରେମର ଭାବନା ସହ ସ୍ଥାନୀୟ ବଣିକ ସଂଘ ପକ୍ଷରୁ ଶୋଭାଯାତ୍ରାର ଆୟୋଜନ କରାଯାଇଥିଲା। ସମସ୍ତେ ହାତରେ ତ୍ରିରଙ୍ଗା ଧରି ବର୍ଷାକୁ ଖାତିର ନ କରି ବାଇକ୍ ଶୋଭାଯାତ୍ରା କରିଥିଲେ। ଶିବ ମନ୍ଦିରଠାରୁ ଶେଭାଯାତ୍ରା ବାହାରି ଦାରିଙ୍ଗବାଡ଼ି ସହରର ଡବେରି ସମେତ ରାଧାକୃଷ୍ଣ ମନ୍ଦିର ରୋହ୍,ତିନିଛକ, ଚାରିଛକ, ଲକ୍ଷ୍ମୀ ବଜାର, ବ୍ଳକ ଅଫିସ, ନିଳକନ୍ଦର ସାହି, ଗ୍ରୀନବାଡ଼ିର ହାଇସ୍କୁଲ ଛକ ତହସିଲ ଅଫିସ ଛକ, ବସ୍ଷ୍ଟାଣ୍ଡ ଆଦି ଅଞ୍ଚଳରେ ପହଞ୍ଚି ଲୋକଙ୍କୁ ଘରେ ଘରେ ତ୍ରିରଙ୍ଗା ଉଡାଇବା ପାଇଁ କୁହାଯାଇଥିଲା। ଶନିବାରଠାରୁ ସୋମବାର ସ୍ବାଧୀନତା ଦିବସ ପର୍ଯ୍ୟନ୍ତ ଏହି କାର୍ଯ୍ୟକ୍ରମକୁ ଧୂମ୍ଧାମରେ ପାଳନ କରାଯିବା ପାଇଁ ସଂଘ ପକ୍ଷରୁ ନିଷ୍ପତ୍ତି ଗ୍ରହଣ କରାଯାଇଥିବା ସଂଘର ଉପସଭାପତି ଦିଲ୍ଲୀପ କୁମାର ସାହୁ ସୂଚନା ଦେଇଛନ୍ତି। ଏହି କାର୍ଯ୍ୟକ୍ରମରେ ସଂଘର ସଭାପତି ଲଡୁକିଶୋର ସାହୁଙ୍କ ସମେତ ଉପସଭାପତି ସନ୍ତୋଷ କୁମାର ସାହୁ, ସିଏଚ୍.ଦୁର୍ଗା ପ୍ରସାଦ ସୁବୁଦ୍ଧି, ସମ୍ପାଦକ ଏସ୍.ରାମାରାଓ ସୁବୁଦ୍ଧି ପ୍ରମୁଖ ପରିଚାଳନା କରିଥିଲେ।