ବ୍ରହ୍ମପୁର ଅଫିସ,୧୪ା୧: ଖଲ୍ଲିକୋଟ ବିଶ୍ୱବିଦ୍ୟାଳୟ ଖେଳ ପଡିଆଠାରେ ଶୁକ୍ରବାର ଆଞ୍ଚଳିକ କୃଷି ମହୋତ୍ସବ ଓ ଗଞ୍ଜାମ ଜିଲା କୃଷି ଯନ୍ତ୍ରପାତି ମେଳା ଉଦ୍ଘାଟିତ ହୋଇଛି। ଆସନ୍ତା ୧୭ ତାରିଖ ଯାଏ ଚାଲିବାକୁ ଥିବା ଏହି ମେଳାରେ ୧୦୦ଟି ଷ୍ଟଲ ରହିଛି। ଉନ୍ନତ କୃଷି ଯନ୍ତ୍ରପାତିର ପ୍ରଦର୍ଶନ ଓ ବିକ୍ରୟ, କୃଷି ଯନ୍ତ୍ରପାତି ପାଇଁ ଋଣ ସୁବିଧା ଆଦି ଲକ୍ଷ୍ୟରେ ଏହି ମେଳା ଚାଲିଛି। ଉଦଘାଟନୀ କାର୍ଯ୍ୟକ୍ରମରେ ଗୃହ ଓ ନଗର ଉନ୍ନୟନ ବିଭାଗ ମନ୍ତ୍ରୀ ଉଷା ଦେବୀ ମୁଖ୍ୟ ଅତିଥି ରୂପେ ଯୋଗ ଦେଇଥିଲେ। ବ୍ରହ୍ମପୁର ଏମ୍ପିି ଚନ୍ଦ୍ରଶେଖର ସାହୁ, ବ୍ରହ୍ମପୁର ବିଧାୟକ ବିକ୍ରମ କୁମାର ପଣ୍ଡା, ବିଇଏମ୍ସି ମେୟର ସଂଘମିତ୍ରା ଦଳେଇ, ଡେପୁଟି ମେୟର ଇ. ବିବେକ ରେଡ୍ଡୀ, ଜିଲାପାଳ ଦିବ୍ୟଜ୍ୟୋତି ପରିଡା, ଏସଏଲଏଫ-ଏମଏମଟିସି ନିର୍ଦ୍ଦେଶକ ମୁକ୍ତିକାନ୍ତ ମହାପାତ୍ର, ଜିଲା ମୁଖ୍ୟ କୃଷି ଅଧିକାରୀ ଦିଲୀପ କୁମାର ଖୁଣ୍ଟିଆ ଓ ନିର୍ବାହୀ ଯନ୍ତ୍ରୀ ଆଲୋକ ଦାଶ ଯୋଗ ଦେଇଥିଲେ। ଏହି ଅବସରରେ ଜିଲାର ହିଞ୍ଜିଳିକାଟୁ, ସାନଖେମୁଣ୍ଡି, ଛତ୍ରପୁର, ଚିକିଟି, ଖଲ୍ଲିକୋଟ ଓ ପୁରୁଷୋତ୍ତମପୁର ଅଞ୍ଚଳର ଚାଷୀଙ୍କୁ ପ୍ରୋଜେକ୍ଟ ନିମନ୍ତେ ସବସିଡି ପ୍ରଦାନ କରାଯାଇଥିଲା। ୧୪ ଏସଏଚଜିଙ୍କୁ ମିଲେଟ ମିଶନ ମାଧ୍ୟମରେ ମାଣ୍ଡିଆ ଅମଳ ମେଶିନ ପ୍ରଦାନ କରାଯାଇଥିଲା। ୬ ଜଣ ଏସଏଚଜିଙ୍କୁ ରାଗି ମେସିନ ପ୍ରଦାନ କରାଯାଇଥିଲା। ଗଜପତି ଜିଲା ରାୟଗଡା ବ୍ଲକର ଚାଷୀ ପୀତାମ୍ବର ନାୟକଙ୍କୁ ଡ୍ରୋନ ମାଧ୍ୟମରେ କୀଟନାଶକ ସିଞ୍ଚନ ମେଶିନ ସବସିଡି ଆକାରରେ ପ୍ରଦାନ କରାଯାଇଥିଲା।