ନୂଆଦିଲ୍ଲୀ: ବର୍ତ୍ତମାନ ସାରା ଦେଶରେ କରୋନା ସଂକ୍ରମଣ ବଢ଼ିଚାଲିଛି। କରୋନାର ଦ୍ୱିତୀୟ ଲହର ବଢ଼ିବାରୁ ସ୍ଥିତି ଚ୍ୟାଲେଞ୍ଜିଂ ହୋଇଛି। ସଂକ୍ରମଣକୁ ନିୟନ୍ତ୍ରଣ କରିବା ଲାଗି ଦେଶର ବିଭିନ୍ନ ପ୍ରାନ୍ତରେ ଲକ୍ଡାଉନ ଆରମ୍ଭ ହୋଇଗଲାଣି। ଯଦି ଅଧିକ ରାଜ୍ୟରେ ଲକ୍ଡାଉନ ହୁଏ ତେବେ ଯାନବାହନ ଚଳାଚଳ ସହ ଅର୍ଥ ବ୍ୟବସ୍ଥା ଉପରେ ଏହାର ଚାପ ପଡିବ। ଯଦି ଆଞ୍ଚଳିକ ସ୍ତରରେ ବେଶି ସ୍ଥାନରେ ଲକ୍ଡାଉନ ହୁଏ ତେବେ ଦେଶର ପ୍ରମୁଖ ଅର୍ଥନୈତିକ ହବ୍ଗୁଡିକ ସାପ୍ତାହିକ ୯,୩୯୧ କୋଟି ଟଙ୍କାର କ୍ଷତି ସହିବେ ବୋଲି ଏକ ଆକଳନ କରାଯାଇଛି।
ଚଳିତ ଆର୍ଥତ୍କ ବର୍ଷ ପ୍ରଥମ ତ୍ରୈମାସରେ ଦେଶର ମୋଟ ଘରୋଇ ଉତ୍ପାଦ(ଜିଡିପି)ରୁ ଏହା ୧୪୦ ବେସିସ୍ ପଏଣ୍ଟ ପୋଛିନେବ ବୋଲି ଆଶଙ୍କା କରାଯାଇଛି। ମେ ଶେଷ ଯାଏ ଯଦି ସ୍ଥିତି ସାଂଘାତିକ ହୁଏ ତେବେ ଦେଶ ୧୦.୫ ବିଲିୟନ ଡଲାର ( ପ୍ରାୟ ୮୯ ହଜାର କୋଟି) ଟଙ୍କାର କ୍ଷତି ସହିବ ବୋଲି ବ୍ରିଟିଶ ବ୍ରୋକରେଜ ଫାର୍ମ ବାର୍କଲେଜ ପକ୍ଷରୁ ଏକ ରିପୋର୍ଟରେ ପ୍ରକାଶ ପାଇଛି।
ଭାରତ ଦୈନିକ ସଂକ୍ରମଣରେ ବର୍ତ୍ତମାନ ସବୁ ରେକର୍ଡକୁ ଟପିଯାଇଛି। ବର୍ତ୍ତମାନ ୧.୩୭ କୋଟି ଲୋକ କରୋନାରେ ସଂକ୍ରମିତ ହୋଇଛନ୍ତି। ଦୈନିକ ହେଉଥିବା ମୋଟ ସଂକ୍ରମଣର ପ୍ରାୟ ୪୮% ମହାରାଷ୍ଟ୍ରରୁ ହେଉଥିବା ନଜରକୁ ଆସିଛି। ଅର୍ଥନୈତିକ କାର୍ଯ୍ୟକଳାପରେ ଦେଶର ୮ ପ୍ରମୁଖ ରାଜ୍ୟରେ ପ୍ରାୟ ୮୧% ମାମଲା ସାମ୍ନାକୁ ଆସିଛି। ଗତ ମାସରେ ଏହି ବ୍ରୋକରେଜ ସଂସ୍ଥା କହିଥିଲା, ଯାନବାହନ ଚଳାଚଳ ଉପରେ କଟକଣା ଲାଗିଲେ ଅର୍ଥ ବ୍ୟବସ୍ଥାକୁ ୫.୨ ବିଲିୟନ ଡଲାର କ୍ଷତି ସହିବାକୁ ପଡିବ।
