ନୟାଗଡ଼,୪।୧(ଲୋକନାଥ ମିଶ୍ର): ରାଜ୍ୟ ସରକାର ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା(ବିଏସ୍କେୱାଇ)ର ପରିସରକୁ ସମ୍ପ୍ରସାରିତ କରି ବିଏସ୍କେୱାଇ ନବୀନ ଓଡ଼ିଶା କାର୍ଡ ଯୋଜନାରେ ଗ୍ରାମୀଣ ପରିବାରକୁ ସାମିଲ କରିବାକୁ ନାମ ପଞ୍ଜୀକରଣ କରିବାକୁ ବ୍ୟବସ୍ଥା କରିଛନ୍ତି । ବିଏସ୍କେୱାଇ ଅର୍ନ୍ତଭୁକ୍ତ ହୋଇ ନ ଥିବା ସବୁ ଗ୍ରାମୀଣ ପରିବାର ଏହି ଯୋଜନାରରେ ସୁଫଳ ପାଇ ପାରିବେ । ତେବେ ଆବେଦନକାରୀ ୨୦୨୨-୨୩ ଆର୍ଥିକ ବର୍ଷରେ ଆୟକରଦାତା ହୋଇ ନ ଥିବେ । ସେହିଭଳି ପେନଶନ ଭୋଗୀ ଅଥବା ସରକାରୀ କର୍ମଚାରୀ ହୋଇ ନ ଥିବେ । ଯୋଜନାରେ ଅର୍ନ୍ତଭୁକ୍ତ ହେବା ପାଇଁ ଜାନୁଆରୀ ୬ରୁ ୧୬ ତାରିଖ ଭିତରେ ମୋ ସେବା କେନ୍ଦ୍ରରେ ଦେୟ ମୁକ୍ତ ନାମ ପଞ୍ଜୀକରଣ କରି ପାରିବେ । ଏନେଇ ନୟାଗଡ଼ ଜିଲାପାଳ ରବୀନ୍ଦ୍ର କୁମାର ସାହୁ ବୁଧବାର ଜିଲାପାଳଙ୍କ କାର୍ଯ୍ୟାଳୟରେ ଏକ ଖବରଦାତା ସମ୍ମିଳନୀ କରି ଏଭଳି ସୂଚନା ଦେଇଛନ୍ତି ।
ଜିଲାପାଳଙ୍କ ସୂଚନା ଅନୁସାରେ ୧୮ ବର୍ଷରୁ ଊର୍ଦ୍ଧ୍ୱ ଯେ କୌଣସି ସଦସ୍ୟ ବିଏସ୍କେୱାଇ ନବୀନ କାର୍ଡ ନିମନ୍ତେ ପରିବାର ପକ୍ଷରୁ ଆବେଦନ କରି ପାରିବେ। ଆବେଦନକାରୀଙ୍କ ସକ୍ରୀୟ ମୋବାଇଲ ନମ୍ବର ସହବନ୍ଧିତ ଆଧାରକାର୍ଡ ଥିବା ଦରକାର। ପୁଣି ଆବେଦନକାରୀଙ୍କ କେୱାସି ଓ ଭୋଟର ପରିଚୟ ପତ୍ର ରହିଥିବା ଦରକାର । ଆବେଦନକାରୀ ଓ ପରିବାର ମୁଖ୍ୟଙ୍କର ଫଟୋ ଦେବାକୁ ପଡିବ । ୫ ବର୍ଷରୁ କମ୍ ପିଲାଙ୍କ ସମେତ ସବୁ ସଦସ୍ୟଙ୍କ ଆଧାର କାର୍ଡ ଥିବା ଦରକାର । ଯଦି ୫ ବର୍ଷରୁ କମ୍ ପିଲାଙ୍କ ଆଧାର ନ ଥିବ ତେବେ ୩୦।୬।୨୦୨୪ ସୁଦ୍ଧା ସମ୍ପୃକ୍ତ ପିଲାଙ୍କର ଆଧାର ନମ୍ବର ଦାଖଲ ନିମନ୍ତେ ପ୍ରତିଜ୍ଞା ପତ୍ର(ଅଣ୍ଡର ଟେକିଂ) ଦିଆଯିବା ଦରକାର।
ମେ ୧ରୁ ବିଏସ୍କେୱାଇ ନବୀନ କାର୍ଡରେ ପରିବାର ପାଇଁ ବାର୍ଷିକ ୫ ଲକ୍ଷ ଓ ମହିଳା ସଦସ୍ୟଙ୍କ ପାଇଁ ୧୦ ଲକ୍ଷ ଟଙ୍କାର ଦେୟ ମୁକ୍ତ ଚିକିତ୍ସା ପ୍ରାବଧାନ ରହିଛି । ଘରୋଇ ହସ୍ପିଟାଲରେ ଚିକିତ୍ସା ଉପଲବ୍ଧ ହେବ । ଅନ୍ୟମାନଙ୍କ ମଧ୍ୟରେ ସିଡିଏମ୍ଓ ରମାକାନ୍ତ ପଣ୍ଡା ଓ ଜିଲା ସୂଚନା ଲୋକ ସମ୍ପର୍କ ଅଧିକାରୀ ସୁରେନ୍ଦ୍ର କୁମାର ସାହୁ ଖବରଦାତା ସମ୍ମିଳନୀରେ ଉପସ୍ଥିତ ଥାଇ ବିଏସ୍କେୱାଇ ଉପରେ ଟିପ୍ପଣୀ ରଖିଥିଲେ ।