ମୁମ୍ବାଇ: ବଲିଉଡ୍ ବାଦ୍ଶାହା ଅମିତାଭ ବଚ୍ଚନ ଏବଂ ରେଖାଙ୍କ ଯୋଡ଼ିକୁ କିଏ ବା ନ ଜାଣେ। ‘ମୁକଦ୍ଦର କା ସିକନ୍ଦର’ରୁ ‘ସିଲସିଲା’ ପର୍ଯ୍ୟନ୍ତ ଏହି ଯୋଡ଼ିକୁ ଦର୍ଶକେ ବେଶ୍ ପସନ୍ଦ କରିଥିଲେ। ଏହି ଯୋଡ଼ିଙ୍କ ଫିଲ୍ମ ଆସିବା ମାତ୍ରେ ବକ୍ସ ଅଫିସରେ ହିଟ୍ ହେଉଥିଲା। ଯଦିଓ ଏହି ଯୋଡ଼ି ଏବେ ଆଉ ଫିଲ୍ମରେ ଆସୁନାହାନ୍ତି ତଥାପି ତାଙ୍କ ଲୋକପ୍ରିୟତାକୁ ଦର୍ଶକ ବେଶ୍ ଭଲ ଭାବେ ଅନୁଭବ କରନ୍ତି।
୭୦ ଦଶକରେ ରେଖା-ଅମିତାଭ ସେମାନଙ୍କ ଫିଲ୍ମକୁ ନେଇ ଚର୍ଚ୍ଚାରେ ଥିଲେ। ଅନ୍ୟ ପଟେ, ଉଭୟ ନିଜ ପ୍ରେମ-ବ୍ୟକ୍ତିଗତ ଜୀବନକୁ ନେଇ ଅନେକ ଚର୍ଚ୍ଚାକୁ ଆସୁଥିଲେ। ବିବାହ ସତ୍ତ୍ୱେ ରେଖାଙ୍କ ସହିତ ଅମିତାଭଙ୍କ ନାମ ଯୋଡ଼ି ହୋଇଥିଲା। ଆଜି ବି ସେମାନଙ୍କ ସମ୍ପର୍କ ସମ୍ବନ୍ଧୀୟ କାହାଣୀ ଲୋକଙ୍କଠାରୁ ଶୁଣିବାକୁ ମିଳେ। ଆଜି ଦୁହିଁଙ୍କୁ ନେଇ ଏମିତି ଏକ କଥା ଅଛି ଯାହା ଖୁବ୍ କମ୍ ଲୋକ ଜାଣିଥିବେ।
ନିର୍ଦ୍ଦେଶକ ରଣଜିତ ଏକଥା ଏକ ସାକ୍ଷାତକାରରେ କହିଥିଲେ। ସେ କହିଥିଲେ, ‘ସାଓ୍ବନ ଭାଦୋ’ ଫିଲ୍ମରୁ ପ୍ରଥମ ଶୁଟ୍ରୁ ମୁଁ ଏବଂ ରେଖା ବହୁତ ଭଲ ବନ୍ଧୁ ହୋଇଥିଲୁ। ଯେତେବେଳେ ମୁଁ ଫିଲ୍ମ ‘କାରନାମା’ ପାଇଁ ରେଖାଙ୍କୁ ଅଫର୍ କଲି, ସେ ଫିଲ୍ମ କରିବାକୁ ପ୍ରସ୍ତୁତ ଥିଲେ। ପରେ ଯେତେବେଳେ ଫିଲ୍ମର ପ୍ରଥମ କାର୍ଯ୍ୟସୂଚୀ ସନ୍ଧ୍ୟାରେ ରଖାଗଲା, ରେଖା ସମସ୍ୟାର ସମ୍ମୁଖୀନ ହେବାକୁ ଲାଗିଲେ। ରଣଜିତଙ୍କ ଅନୁଯାୟୀ, ରେଖା ତାଙ୍କୁ ଡାକି ପଚାରିଥିଲେ ଯେ, ମୁଁ ଅମିତାଭ ବଚ୍ଚନଙ୍କ ସହ ସନ୍ଧ୍ୟା ବିତାଇବାକୁ ଚାହୁଁଥିବାରୁ ମୁଁ ସକାଳେ ଶୁଟିଂ ଜାରି ରଖିବି କି? ଏହା ପରେ ରଣଜିତ ତାଙ୍କୁ ବହୁତ ବୁଝାଇଥିଲେ। ମାତ୍ର ରେଖା ରାଜି ହୋଇ ନ ଥିଲେ। ଯେଉଁଥିପାଇଁ ତାଙ୍କୁ ଏହି ଫିଲ୍ମ ଛାଡ଼ିବାକୁ ପଡ଼ିଥିଲା। ପରେ ଫରାହ, କିମି ଏବଂ ବିନୋଦ ଖାନ୍ନାଙ୍କୁ ନେଇ ଫିଲ୍ମ କରିବାକୁ ପଡ଼ିଥିଲା ରଣଜିତଙ୍କୁ। ଖାଲି ଏତିକି ନୁହେଁ, ରେଖା ସାଇନ୍ କରିବା ସମୟରେ ନେଇଥିବା ଟଙ୍କା ବି ଫେରାଇ ଦେଇଥିଲେ।
