ନୂଆଦିଲ୍ଲୀ/କାଠମାଣ୍ଡୁ,୨୨ ।୧: ନେପାଳ ବିମାନଦୁର୍ଘଟଣାକୁ ପ୍ରାୟ ଏକ ସପ୍ତାହ ବିତି ଗଲାଣି । ହେଲେ ଏହି ଦୁର୍ଘଟଣାରେ ପ୍ରାଣ ହରାଇଥିବା ୪ ଜଣ ଭାରତୀୟଙ୍କ ମୃତଦେହକୁ ଏବେବି ଅପେକ୍ଷା ରଖିଛନ୍ତି ସେମାନଙ୍କ ପରିଜନ । ନେପାଳି ଅଧିକାରୀମାନେ ମଙ୍ଗଳବାର ଅର୍ଥାତ୍ ୧୭ ଜାନୁୟାରୀରୁ ମୃତକଙ୍କ ପରିଜନଙ୍କୁ ସେମାନଙ୍କ ମୃତଦେହ ହସ୍ତାନ୍ତର କରିବା ଆରମ୍ଭ କରିଥିଲେ । ରବିବାର ନେପାଳର ପୋଖରାରେ ୟେତି ଏୟାରଲାଇନ୍ସର ବିମାନ ଦୁର୍ଘଟଣାଗ୍ରସ୍ତ ହୋଇଥିଲା, ଯେଉଁଥିରେ ୭୨ ଜଣଙ୍କ ମୃତ୍ୟୁ ହୋଇଥିଲା । ବିମାନଟି ଦୁର୍ଘଟଣାଗ୍ରସ୍ତ ହେବା ସମୟରେ ସେଥିରେ ୫୩ ଜଣ ନେପାଳିନାଗରିକ ଥିବା ବେଳେ ୫ ଭାରତୀୟ ଓ ୧୫ ବିଦେଶୀ ନାଗରିକଙ୍କ ସମେତ ଚାଳକ ଦଳର ୪ ସଦସ୍ୟ ଥିଲେ ।
ଏହି ବିମାନ ଦୁର୍ଘଟଣାରେ ଯେଉଁ ଭାରତୀୟଙ୍କ ମୃତ୍ୟୁ ହୋଇଛି ସେମାନଙ୍କ ପରିଚୟ ଉତ୍ତର ପ୍ରଦେଶର ଅଭିଶେକ କୁଶାବାହା(୨୫), ବିଶାଲ ଶର୍ମା(୨୨), ଅନିଲ କୁମାର ରାଜଭର(୨୭), ସୋନୁ ଜୟସୱାଲ(୩୫) ଓ ସଞ୍ଜୟ ଜୟସୱାଲ ବୋଲି ଜଣାପଡିଛି ।
ସମାଚାର ଏଜେନ୍ସି ପିଟିଆଇର ସୂଚନା ଅନୁଯାୟୀ, ସଞ୍ଜୟ ଜୟସୱାଲଙ୍କ ମୃତଦେହ ଶୁକ୍ରବାର ୨୦ ଜାନୁୟାରୀରେ ତାଙ୍କ ସମ୍ପର୍କୀୟଙ୍କୁ ହସ୍ତାନ୍ତର କରାଯାଇଥିଲା । ହେଲେ ଅନ୍ୟ ୪ ଜଣଙ୍କ ମୃତଦେହ ଏବେ ପର୍ଯ୍ୟନ୍ତ ତାଙ୍କ ପରିବାରକୁ ମିଳିନାହିଁ । ମୃତଦେହ ଆଣିବାକୁ ସମ୍ପର୍କୀୟ ତ୍ରିଭୁବନ ବିଶ୍ୱବିଦ୍ୟାଳୟ ଶିକ୍ଷାଦାନ ହସ୍ପିଟାଲରେ ପହଞ୍ଚିଥିଲେ ଏମାନଙ୍କ ମଧ୍ୟରେ ସୋନୁ ଜୟସୱାଲଙ୍କ ପିତା ରାଜେନ୍ଦ୍ର ପ୍ରସାଦ ଥିଲେ । ହେଲେ ହସ୍ପିଟାଲ ପକ୍ଷରୁ କୁହାଯାଇଛି କି ଶନିବାର ୨୧ ଜାନୁୟାରୀରେ ବିଶାଲ ଶର୍ମାଙ୍କ ମୃତଦେହକୁ ଚିହ୍ନଟ କରାଯାଇଛି ।
ରିପୋର୍ଟରେ କୁହାଯାଇଛି କି ଶୁକ୍ରବାର ୪୯ ମୃତଦେହର ପୋଷ୍ଟମର୍ଟମ କରାଯାଇ ସେମାନଙ୍କ ପରିଜନଙ୍କୁ ହସ୍ତାନ୍ତର କରାଯାଇଛି । ସେହିପରି ଶନିବାର ଆଉ ୧୫ ମୃତଦେହକୁ ସେମାନଙ୍କ ପରିଜନଙ୍କୁ ହସ୍ତାନ୍ତର କରାଯାଇଛି । ମୃତଦେହ ଚିହ୍ନଟରେ ଥିବା ଡାକ୍ତର କହିଛନ୍ତି ପରିବାର ସଦସ୍ୟ ମୃତଦେହ ଚିହ୍ନଟ ପାଇଁ ଯେଉଁ ଚିହ୍ନ କହିଥିଲେ ତାହା ପର୍ଯ୍ୟାପ୍ତ ନ ଥିଲା । ରବିବାର ଏହାର ଚିହ୍ନଟ ପ୍ରକ୍ରିୟା ଶେଷ ହେବା ପରେ ଯାଇ ମୃତହେଦକୁ ପରିଜନଙ୍କୁ ହସ୍ତାନ୍ତର କରାଯାଇପାରିବ ।
