ବାଲେଶ୍ୱର ଅଫିସ,୨୮ା୫: ଏକକାଳୀନ ସର୍ବାଧିକ ପରିମାଣର ବ୍ରାଉନ୍ସୁଗାର ଜବତ କରି ସହଦେବଖୁଣ୍ଟା ମଡ଼େଲ ଥାନା ପୋଲିସ ଜଣେ ଆନ୍ତଃରାଜ୍ୟ ବ୍ରାଉନ୍ସୁଗାର ବେପାରୀଙ୍କ ସହ ଅରଡ଼ବଜାର ଅଞ୍ଚଳର ୫ ଅଭିଯୁକ୍ତଙ୍କୁ ଗିରଫ କରି ୨୦୨୨ ମେ’ ୨୮ରେ କୋର୍ଟଚାଲାଣ କରିଥିଲା। ଶନିବାର ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ ଅରଡ଼ବଜାର ଅଞ୍ଚଳର ୫ଜଣ ଜାମିନରେ ଜେଲ୍ରୁ ବାହାରୁଥିବା ବେଳେ ପୁଣି ସହଦେବଖୁଣ୍ଟା ପୋଲିସ ସେମାନଙ୍କୁ ପୁଣି ଗିରଫ କରିବା ଘଟଣା ଚର୍ଚ୍ଚାର ବିଷୟ ହୋଇଛି।
ସହର ଫୁଲାଡ଼ିସ୍ଥିତ କାସିମପୁର ନିକଟସ୍ଥ ପଡ଼ିଆରେ ବ୍ରାଉନ୍ସୁଗାର ନେଣଦେଣ ହେଉଥିବା ବେଳେ ଖବରପାଇ ସହଦେବଖୁଣ୍ଟା ମଡ଼େଲ ଥାନା ପୋଲିସ ପକ୍ଷରୁ ଚଢ଼ାଉ କରିଥିଲା। ଏଥିରେ ୧୦କେଜି ଓଜନର ବ୍ରାଉନ୍ସୁଗାର (ଯାହାର ମୂଲ୍ୟ ୧୧କୋଟି ଟଙ୍କା)ଜବତ କରିବା ସହ ଜଣେ ଆନ୍ତଃରାଜ୍ୟ ବ୍ରାଉନ୍ସୁଗାର ବେପାରୀ ଏବଂ ୫ଜଣ ଅରଡ଼ବଜାର ଅଞ୍ଚଳର ଅଭିଯୁକ୍ତଙ୍କୁ ଗିରଫ କରାଯାଇଥିଲା। ମୁଖ୍ୟ ଅଭିଯୁକ୍ତ ମଧ୍ୟପ୍ରଦେଶ ରାଜ୍ୟର ଆୟୁବ (୫୨)ଙ୍କୁ ଜାମିନ ମିଳି ନ ଥିବା ବେଳେ ଅରଡ଼ବଜାର ଅଞ୍ଚଳର ସେକ ହୁସେନ, ସେକ ସଫିକ, ସେକ ରାଜୁ, ସେକ ସମୀର, ରିଣ୍ଟୁ ତରେଇଙ୍କୁ ଜାମିନ ମିଳିଥିଲା। ମାତ୍ର ପ୍ରତ୍ୟେକଙ୍କ ନାମରେ ପୂର୍ବରୁ ଏସ୍ଟିଏଫ୍ ଏବଂ ବିଭିନ୍ନ ଥାନାରେ ୫ରୁ ଊର୍ଦ୍ଧ୍ୱ ବ୍ରାଉନ୍ସୁଗାର କାରବାର ଭଳି ଅପରାଧିକ ମାମଲା ଥିବାରୁ ପୋଲିସ ସେମାନଙ୍କୁ ଜେଲ୍ ଆଗରୁ ଗିରଫ କରିଛି। ଏନେଇ ଅଭିଯୁକ୍ତ ପକ୍ଷଙ୍କ ଆଇନଜୀବୀ ଗୁରୁପ୍ରସାଦ ବେହେରା କହନ୍ତି, ପୋଲିସ ଯେତେବେଳେ ବ୍ରାଉନ୍ସୁଗାର ଜବତ କରିଥିଲା ସେତେବେଳେ ଗିରଫକାରୀଙ୍କ ମଧ୍ୟରୁ କେତେଜଣ ଘଟଣାସ୍ଥଳରେ ନ ଥିବା ବେଳେ ପୋଲିସ ଆକ୍ରୋଶମୂଳକ ଭାବେ ସେମାନଙ୍କୁ ମାମଲାରେ ଭର୍ତ୍ତି କରି କୋର୍ଟଚାଲାଣ କରିଥିଲା। ଏଥିସହିତ ଗିରଫ କରାଯାଇଥିବା ଯୁବକମାନଙ୍କୁ ବିଭିନ୍ନ ଆଳ ଦେଖାଇ ମାମଲାର ୨୪ଘଣ୍ଟା ପରେ କୋର୍ଟଚାଲାଣ କରାଯାଇଥିଲା। ବିଭିନ୍ନ ପ୍ରକାର ପୋଲିସର ତ୍ରୁଟିକୁ ପ୍ରମାଣ କରିବା ପରେ ହାଇକୋର୍ଟ ଗିରଫ ୫ ଯୁବକଙ୍କ ଜାମିନ ମଞ୍ଜୁର କରିଥିଲେ। ଏଥିସହିତ ଥାନାର ଉପରିସ୍ଥ ଅଧିକାରୀମାନଙ୍କ କାର୍ଯ୍ୟକଳାପକୁ ନିନ୍ଦା କରିବା ସହ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ନିର୍ଦ୍ଦେଶ ଦେଇଛନ୍ତି। ଏନେଇ ସହଦେବଖୁଣ୍ଟା ଥାନା ଅଧିକାରୀଙ୍କଠାରୁ ମିଳିଥିବା ସୂଚନା ଅନୁସାରେ, ବ୍ରାଉନ୍ସୁଗାର ମାମଲାରେ ଗିରଫ ହୋଇ ଶନିବାର ଜେଲ୍ରୁ ବାହାରୁଥିବା ଅରଡ଼ବଜାର ଅଞ୍ଚଳର ୫ଯୁବକଙ୍କ ନାମରେ ଏସ୍ଟିଏଫ୍ ସମେତ ବିଭିନ୍ନ ଥାନାରେ ବହୁ ମାମଲା ଥିବାରୁ ସେମାନଙ୍କୁ ଗିରଫ କରାଯାଇଛି।