ନୂଆଦିଲ୍ଲୀ,୨୯।୧୨: ଏସିଆର ସବୁଠାରୁ ଧନୀ ବ୍ୟକ୍ତି ତଥା ରିଲାଏନ୍ସ ଇଣ୍ଡଷ୍ଟ୍ରିର ଚେୟାରମ୍ୟାନ ମୁକେଶ ଅମ୍ବାନୀ ନିଜର ଉତ୍ତରାଧିକାରକୁ ନେଇ ଏକ ମନ୍ତବ୍ୟ ଦେଇଛନ୍ତି। ରିଲାଏନ୍ସ ପ୍ରତିଷ୍ଠା କରିଥିବା ଧୀରଭାଇ ଅମ୍ବାନୀଙ୍କ ଜନ୍ମଦିନରେ ଆୟୋଜିତ ଏକ ସମାରୋହରେ ଯୋଗ ଦେଇ ସେ କହିଛନ୍ତି, ନୂଆ ପିଢ଼ି ନେତୃତ୍ୱ ପାଇଁ ପ୍ରସ୍ତୁତ। ଆକାଶ, ଇଶା ଏବଂ ଅନନ୍ତ ଆମ ଅପେକ୍ଷା ଭଲ କାମ କରୁଛନ୍ତି। ଏବେ ମୁଁ ଉତ୍ତରାଧିକାର ପ୍ରକ୍ରିୟାକୁ ତ୍ୱରାନ୍ବିତ କରିବାକୁ ଚାହୁଁଛି। ଆମେ ନୂତନ ପିଢିକୁ ମାର୍ଗଦର୍ଶନ କରିବା ଉଚିତ୍। ପ୍ରତିଦିନ ମୁଁ ରିଲାଏନ୍ସ ପାଇଁ ପିଲାମାନଙ୍କର ଉତ୍ସାହ, ପ୍ରତିବଦ୍ଧତା ଏବଂ ଉତ୍ସର୍ଗକୁ ଦେଖୁଛି ବୋଲି କହିଛନ୍ତି।
ମୁକେଶ ଅମ୍ବାନୀ କହିଛନ୍ତି, ରିଲାଏନ୍ସ ଇଣ୍ଡଷ୍ଟ୍ରିଜ ଲିମିଟେଡ ଆଗାମୀ ବର୍ଷରେ ଦୁନିଆର ଅନ୍ୟତମ ପ୍ରତିଷ୍ଠିତ ତଥା ଶକ୍ତିଶାଳୀ କମ୍ପାନୀ ହେବ। ଏଥିରେ, ସ୍ବଚ୍ଛ ଏବଂ ସବୁଜ ଶକ୍ତି କ୍ଷେତ୍ର ବ୍ୟତୀତ ଖୁଚୁରା ଏବଂ ଟେଲିକମ ବ୍ୟବସାୟ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ। ଆମ କମ୍ପାନୀର ଭବିଷ୍ୟତ ମୋ ପାଇଁ ପୂର୍ବ ଅପେକ୍ଷା ଅଧିକ ଉଜ୍ଜ୍ୱଳ ଦେଖାଯାଉଛି। ମୁଁ ଆତ୍ମବିଶ୍ୱାସ ସହିତ ଦୁଇଟି ଭବିଷ୍ୟବାଣୀ କରିପାରିବି। ପ୍ରଥମତଃ ଭାରତ ବିଶ୍ୱର ଶ୍ରେଷ୍ଠ ତିନୋଟି ଅର୍ଥନୀତି ମଧ୍ୟରୁ ଗୋଟିଏ ହେବ। ଦ୍ୱିତୀୟରେ, ରିଲାଏନ୍ସ ବିଶ୍ୱର ସବୁଠାରୁ ଶକ୍ତିଶାଳୀ ଏବଂ ପ୍ରତିଷ୍ଠିତ ଭାରତୀୟ ବହୁରାଷ୍ଟ୍ରୀୟ ଦେଶ ହେବ।
ସୂଚନାଯୋଗ୍ୟ, ରିଲାଏନ୍ସ ଚେୟାରମ୍ୟାନ ମୁକେଶ ଅମ୍ବାନୀଙ୍କୁ ୬୪ ବର୍ଷ ବୟସ ହୋଇଛି। ୨୦୦୨ରେ ପିତାଙ୍କ ମୃତ୍ୟୁ ପରେ ସେ ରିଲାଏନ୍ସ୍ର ଚେୟାରମ୍ୟାନ ଭାବରେ ଦାୟିତ୍ୱ ଗ୍ରହଣ କରିଥିଲେ। ତାଙ୍କର ତିନି ସନ୍ତାନ, ଆକାଶ, ଇଶା ଏବଂ ଅନନ୍ତ ରିଲାଏନ୍ସର ଟେଲିକମ ସହ ଜଡିତ ଅଛନ୍ତି।
