ମୁମ୍ବାଇ,୧୨।୧୨: ମୁକେଶ ଅମ୍ବାନୀଙ୍କ ନେତୃତ୍ୱାଧୀନ ରିଲାଏନ୍ସ ଇଣ୍ଡଷ୍ଟ୍ରିଜ୍ ଲିମିଟେଡ୍ ୨୦୨୦-୨୧ ଆର୍ଥିକ ବର୍ଷରେ କର୍ପୋରେଟ୍ ସାମାଜିକ ଦାୟିତ୍ୱବୋଧ (ସିଏସ୍ଆର୍) ଯୋଗଦାନ କ୍ଷେତ୍ରରେ କମ୍ପାନୀର ଭୂମିକା ଅଗ୍ରଣୀ ରହିଛି। କୋଭିଡ୍ ମହାମାରୀରେ (୨୦୨୦-୨୧ ଆର୍ଥିକ ବର୍ଷ) କମ୍ପାନୀ ସମାଜସେବା କ୍ଷେତ୍ର ( ସାମାଜିକ କାର୍ଯ୍ୟକ୍ରମ ଓ ସହଯୋଗ)ରେ ପ୍ରାୟ ୯୨୨ କୋଟି ଟଙ୍କା ଖର୍ଚ୍ଚ କରିଥିବା ସୂଚନା ମିଳିଛି। ଏହି ସମୟ ମଧ୍ୟରେ ଭାରତୀୟ କମ୍ପାନୀଗୁଡିକ ଦ୍ୱାରା ସିଏସ୍ଆର୍ କାର୍ଯ୍ୟ ବାବଦକୁ ମୋଟ ୮୮୨୮.୧୧ କୋଟି ଟଙ୍କା ଖର୍ଚ୍ଚ କରାଯାଇଥିବା କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଛି। ଚଳିତ ଶୀତ ଅଧିବେଶନରେ ସଂସଦରେ ଉପସ୍ଥାପନ କରାଯାଇଥିବା ଏହି ତଥ୍ୟ ସର୍ବସାଧାରଣଙ୍କ ଉଦ୍ଦେଶ୍ୟରେ ପ୍ରକାଶ କରାଯାଇଛି। ୨୦୨୦-୨୧ ଆର୍ଥିକ ବର୍ଷରେ ଭାରତୀୟ କର୍ପୋରେଟ୍ ଜଗତ ଦ୍ୱାରା ସିଏସ୍ଆର୍ କ୍ଷେତ୍ରରେ କରାଯାଇଥିବା ମୋଟ ଖର୍ଚ୍ଚର ୧୦% ରିଲାଏନ୍ସ ଏକାକୀ ଦେଶବାସୀଙ୍କ ପାଇଁ ସହଯୋଗ କରିଛି। ସୂଚନାଯୋଗ୍ୟ ଯେ କମ୍ପାନୀଗୁଡିକ ନିମନ୍ତେ ବିଗତ ତିନିବର୍ଷର ନେଟ୍ ଲାଭର ୨% ସିଏସ୍ଆର୍ ବାବଦରେ ଖର୍ଚ୍ଚ କରିବାକୁ ବାଧ୍ୟତାମୂଳକ କରାଯାଇଛି। କୋଭିଡ୍ ମହାମାରୀ କାରଣରୁ ରିଲାଏନ୍ସ ଏହି ଧାର୍ଯ୍ୟ ୨% ଠାରୁ ଯଥେଷ୍ଟ ଅଧିକ ଖର୍ଚ୍ଚ କରିଛି। ତେବେ ମୋଟ ଉପରେ ଭାରତୀୟ କର୍ପୋରେଟ୍ ଜଗତ ପୂର୍ବବର୍ଷ ତୁଳନାରେ ଚଳିତ ଆର୍ଥିକ ବର୍ଷରେ ୬୪% କମ୍ ଖର୍ଚ୍ଚ କରିଥିବା ଜଣାଯାଇଛି। ରିଲାଏନ୍ସର ବିବିଧ ପ୍ରୟାସ ନିମନ୍ତେ ବାଧ୍ୟତାମୂଳକ ୨% ସିଏସ୍ଆର୍ ଖର୍ଚ୍ଚ ମଧ୍ୟରେ ସୀମିତ ନ ରହି ଏହାର ପ୍ରତିବଦ୍ଧତା ନିରନ୍ତର କାର୍ଯ୍ୟକାରୀ କରିଚାଲିଛି। ସେହିପରି ୨୦୨୦ମାର୍ଚ୍ଚରେ ସମଗ୍ର ଦେଶରେ କୋଭିଡ୍ଜନିତ ତାଲାବନ୍ଦ ଆରମ୍ଭ ହେବା ପୂର୍ବରୁ ରିଲାଏନ୍ସ ତ୍ୱରିତ ପଦକ୍ଷେପ ଗ୍ରହଣ କରି ମୁମ୍ବାଇରେ ଦେଶର ପ୍ରଥମ କୋଭିଡ୍ କେୟାର୍ ବ୍ୟବସ୍ଥା ସ୍ଥାପନ କରିଥିଲା। ପରେ ସମଗ୍ର ଦେଶକୁ ଏହି ସୁବିଧା ସହିତ ଅନ୍ୟାନ୍ୟ ସେବା ସମ୍ପ୍ରସାରିତ କରାଯାଇଥିଲା। ଦେଶର ବିଭିନ୍ନ ରାଜ୍ୟ ସରକାର ଏବଂ କେନ୍ଦ୍ର ସରକାରଙ୍କୁ ମହାମାରୀ ମୁକାବିଲା ଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ରିଲାଏନ୍ସ ୫୬୧ କୋଟି ଟଙ୍କା ପ୍ରଦାନ କରିଥିଲା। ଏସବୁ ସହିତ କମ୍ପାନୀ ଆହୁରି ଅନେକ ବିକାଶମୂଳକ କାର୍ଯ୍ୟ ହାତକୁ ନେଇ ଶିକ୍ଷା, ସ୍ବାସ୍ଥ୍ୟ, କ୍ରୀଡ଼ା ଭଳି ଅନେକ କ୍ଷେତ୍ରରେ ସହଯୋଗ କରିଆସୁଛି।