ନୂଆଦିଲ୍ଲୀ,୨୯।୧: ଦେଶର ପ୍ରମୁଖ ଟେଲିକମ୍ କମ୍ପାନୀ ରିଲାଏନ୍ସ ଜିଓ ଓଡ଼ିଶାରେ ଏକ ନମ୍ବର ଟେଲି ସେବା ପ୍ରଦାନକାରୀ ସଂସ୍ଥା ଭାବେ ଉଭା ହୋଇଛି। ଏପରି କି ଭାରତୀୟ ଟେଲିକମ୍ ନିୟାମକ କର୍ତ୍ତୃପକ୍ଷ (ଟ୍ରାଇ) ପକ୍ଷରୁ ପ୍ରକାଶିତ ସଦ୍ୟତମ ଟେଲିକମ୍ ଗ୍ରାହକ ତଥ୍ୟରେ ମଧ୍ୟ ଏ ନେଇ ଉଲ୍ଲେଖ କରାଯାଇଛି। ବିଶେଷ କରି ରିଲାଏନ୍ସ ଜିଓ ୨୦୨୨ ନଭେମ୍ବରରେ ସର୍ବାଧିକ ସଂଖ୍ୟକ ମୋବାଇଲ୍ ଗ୍ରାହକ ସମେତ ସର୍ବାଧିକ ଫିକ୍ସଡ୍-ଲାଇନ୍ ଗ୍ରାହକ ଯୋଡ଼ିଥିବା ବେଳେ କମ୍ପାନୀ ତା’ର ଏକ ନମ୍ବର ସ୍ଥିତିକୁ ଆହୁରି ସୁଦୃଢ଼ କରିବା ଦିଗରେ ଅଗ୍ରସର ହେଉଛି। ସେହିଭଳି ଟ୍ରାଇ ପକ୍ଷରୁ ପ୍ରକାଶିତ ଦୂରସଞ୍ଚାର ଗ୍ରାହକ ତଥ୍ୟ ଅନୁସାରେ ୨୦୨୨ ନଭେମ୍ବରରେ ରିଲାଏନ୍ସ ଜିଓ ରାଜ୍ୟରେ ସର୍ବାଧିକ ୫୪,୧୯୪ ମୋବାଇଲ୍ ଗ୍ରାହକ ଏବଂ ପ୍ରାୟ ୬୦୦୦ ଓୟାରଲାଇନ୍ ବା ଜିଓଫାଇବର୍ ଗ୍ରାହକ ଯୋଡ଼ିଛି। ଏହା ସହିତ ୨୦୨୨ ନଭେମ୍ବର ୩୦ ସୁଦ୍ଧା ସର୍ବାଧିକ ୧.୩୮କୋଟି ମୋବାଇଲ୍ ଗ୍ରାହକ ଏବଂ ସର୍ବାଧିକ ୧.୮୩ ଲକ୍ଷ ଜିଓଫାଇବର ଗ୍ରାହକଙ୍କୁ ନେଇ ଜିଓ ଓଡ଼ିଶାରେ ଏହାର ଅଗ୍ରଣୀ ସ୍ଥିତିକୁ ଆହୁରି ସୁଦୃଢ଼ କରିଛି। ଏପରି କି ଟ୍ରାଇ ତଥ୍ୟ ଅନୁଯାୟୀ ୨୦୨୨ ନଭେମ୍ବରରେ ଓଡ଼ିଶାର ମୋଟ ମୋବାଇଲ୍ ଗ୍ରାହକ ସଂଖ୍ୟାରେ ୯୫,୫୦୦ରୁ ଅଧିକ ବୃଦ୍ଧି ହୋଇଥିବା ବେଳେ ଓୟାରଲାଇନ୍ ଗ୍ରାହକ ସଂଖ୍ୟାରେ ୬,୧୬୭ ବୃଦ୍ଧି ଘଟିଛି। ସେହିପରି ଜାତୀୟ ସ୍ତରରେ ମଧ୍ୟ ଜିଓ ୧୪ଲକ୍ଷରୁ ଅଧିକ ନୂଆ ମୋବାଇଲ୍ ଗ୍ରାହକ ଯୋଡ଼ିଥିବା ବେଳେ ଉକ୍ତ ମାସରେ ୨.୧ ଲକ୍ଷରୁ ଅଧିକ ଓୟାରଲାଇନ୍ ଗ୍ରାହକ ଯୋଡ଼ି ଦେଶର ସର୍ବବୃହତ୍ ଓୟାରଲାଇନ୍ ସେବା ପ୍ରଦାନକାରୀ ଭାବେ ନିଜ ଅଗ୍ରଣୀ ସ୍ଥିତିକୁ ଆହୁରି ମଜଭୁତ କରିଛି।