ବଲାଙ୍ଗୀର ଅଫିସ,୨୫ା୧୦: ୫ ଦିନିଆ ରିମାଣ୍ଡରେ ଅଣାଯାଇଥିବା ମମିତା ମେହେର ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ଗୋବିନ୍ଦ ସାହୁଙ୍କୁ ବଲାଙ୍ଗୀର ପୋଲିସ ବଙ୍ଗୋମୁଣ୍ଡା ଜେଏମ୍ଏଫ୍ସି କୋର୍ଟ ଜଜ୍ଙ୍କ ଆବାସରେ ସୋମବାର ସକାଳ ପ୍ରାୟ ୮ଟାରେ ହାଜର କରିଥିଲା। ସେଠାରୁ ତାଙ୍କୁ କଣ୍ଟାବାଞ୍ଜି ଜେଲକୁ ପଠାଯାଇଛି। ବଲାଙ୍ଗୀର ପୋଲିସ ଅତ୍ୟନ୍ତ ଗୋପନୀୟ ଭାବେ ଭୋର ୪ଟାରୁ ଗୋବିନ୍ଦଙ୍କୁ କୋର୍ଟରେ ହାଜର କରିବାକୁ ନେଇଥିବା ଜଣାପଡିଛି। ଏସ୍ପି ଅଫିସର ପଛପଟ ଗେଟ୍ରୁ ଗୋବିନ୍ଦଙ୍କୁ ମନୋହାରପୁର ରିଜର୍ଭ ପୋଲିସ ବାରାକ୍କୁ ନିଆଯାଇଥିଲା। ସେଠାରେ କିଛି ଘଣ୍ଟା ରଖିବା ପରେ ଭୋର ୪ଟାରୁ କଡ଼ା ସୁରକ୍ଷା ମଧ୍ୟରେ ବଲାଙ୍ଗୀରରୁ ୯୫ କିଲୋମିଟର ଦୂର ବଙ୍ଗୋମୁଣ୍ଡା ନିଆଯାଇଥିଲା। ପରେ ସେଠାରୁ ୧୫ କିଲୋମିଟର ଦୂର କଣ୍ଟାବାଞ୍ଜି ଜେଲକୁ ନିଆଯାଇ ଗୋବିନ୍ଦଙ୍କୁ ଛଡାଯାଇଛି। କୋର୍ଟରେ ହାଜର କରିବା ପାଇଁ ଗୋବିନ୍ଦଙ୍କୁ ଗଣମାଧ୍ୟମ ଆଢୁଆଳରେ ନିଆଯାଇଛି। ୫ ଦିନିଆ ରିମାଣ୍ଡ ଅବଧିରେ ଅଭିଯୁକ୍ତ ଗୋବିନ୍ଦ ପୋଲିସକୁ କ’ଣ ସୂଚନା ଦେଇଛନ୍ତି, ସେହି ସୂଚନା ଆଧାରରେ ପୋଲିସ ତଦନ୍ତକୁ କେତେ ଗତିଶୀଳ କରିଛି ଏବଂ କ’ଣ ପ୍ରମାଣ ଯୋଗାଡ଼ କରିଛି ସେନେଇ ଗଣମାଧ୍ୟମକୁ ଆଦୌ ସୂଚନା ଦିଆଯାଉନାହିଁ।