ରାୟଗଡ଼(ଗଜପତି),୨୪ା୧୦:ଗଜପତି ଜିଲା ରାୟଗଡ଼ ବ୍ଲକ ସାନତୁଣ୍ଡି ପଞ୍ଚାୟତର ରେମ୍ପୀ ଗ୍ରାମରେ ସ୍ବେଚ୍ଛାସେବୀ ଅନୁଷ୍ଠାନ ଗ୍ରାମ ବିକାଶ ପକ୍ଷରୁ ୧୯୯୮ରେ ଗ୍ରାମବାସୀଙ୍କ ଶ୍ରମଦାନରେ ପ୍ରାୟ ୩୦ଟି ପକ୍କାଘର ତିଆରି ହୋଇଥିଲା। ଉକ୍ତ ଗ୍ରାମରେ ୩୦ ପରିବାରର ପ୍ରାୟ ୨୦୮ ଜନସଂଖ୍ୟା ଥିବାବେଳେ ରହିବା ପାଇଁ ଭଲ ଘର ଖଣ୍ଡିଏ ନ ଥିବା ବେଳେ ଗ୍ରାମ ବିକାଶ ପକ୍ଷରୁ ଘର ତିଆରି ପାଇଁ ଉପକରଣ ଓ ସାମଗ୍ରୀ ମିଳିଥିବାରୁ ଲୋକଙ୍କ ଶ୍ରମଦାନରେ ଘରସବୁ ତିଆରି ହୋଇଥିଲା। ଗୃହ ନିର୍ମାଣ ସମୟରେ ଭାଗମାପରେ ଅନିୟମିତତା ଯୋଗୁ ତାହା ନିମ୍ନମାନର ହୋଇଥିଲା। ହିତାଧିକାରୀମାନେ ନିର୍ମିିତ ଘରେ ପ୍ରାୟ ୧୦ ବର୍ଷ ରହିବା ପରେ ଦିନକୁ ଦିନ ଅବସ୍ଥା ଶୋଚନୀୟ ହୋଇପଡିଛି। କାମ ଭଲ ହୋଇ ନ ଥିବାରୁ ଛାତଗୁଡିକ ବଙ୍କା ହୋଇ ଦବିଯାଇ ଫାଟିବା ସହିତ ଛାତ ଭିତରପଟୁ ପରସ୍ତ ପରସ୍ତ ବାହାରି ଲୁହାଛଡ଼ ଦେଖାଯାଉଛି। ବର୍ଷା ହେଲେ ଛାତରୁ ପାଣି ଗଳିବା ସହିତ ଘରଦ୍ୱାର ପାଣି ହୋଇଯାଉଥିବା ଅଭିଯୋଗ କରିଛନ୍ତି ଗ୍ରାମବାସୀ। ଅଧିକ ବର୍ଷା କିମ୍ବା ବନ୍ୟା ବାତ୍ୟା ହେଲେ ଘର ଛାଡ଼ି ନିକଟସ୍ଥ ସ୍କୁଲ କିମ୍ବା ଅଙ୍ଗନୱାଡ଼ି କେନ୍ଦ୍ରରେ ଯାଇ ରହିବାକୁ ପଡୁଛି। ଏନେଇ ବାରମ୍ବାର ଜିଲା ପ୍ରଶାସନଠାରୁ ଆରମ୍ଭ କରି ବ୍ଲକ ପ୍ରଶାସନ, ରାଜନେତାଙ୍କୁ ଗୁହାରି କରିବା ସତ୍ତ୍ୱେ କେହି ତାଙ୍କ କଥା ଶୁଣୁ ନ ଥିବା ଗ୍ରାମର ୱାର୍ଡ଼ସଭ୍ୟା ନୀଳା କୁମ୍ଭ, ପଦ୍ମା ଭୂୟାଁ, ବିନୋଦ ଚନ୍ଦ୍ର ଗୌର, କମଳ ବସୁପତି, ନରସିଂହ ଶବର, ମୋହନ ବସୁପତି, ଦିଲେଶ୍ୱର କୁମ୍ଭଙ୍କ ସମେତ ଗ୍ରାମବାସୀ ଅଭିଯୋଗ କରିଛନ୍ତି। ଗୃହଗୁଡିକ ବିପଦସଂକୁଳ ହୋଇଥିଲେ ବି ଆବାସ ଯୋଜନା ତଦନ୍ତ ନେଇ ଆସିଥିବା ଅଧିକାରୀମାନେ ଠିକ୍ ଭାବେ ନ ଦେଖି ହିତାଧିକାରୀ ତାଲିକାରୁ ବାଦ୍ ଦେଉଥିବା ସେମାନେ ପ୍ରକାଶ କରିଛନ୍ତି। ଏଥିସହ ରାଜନୈତିକ ପାତରଅନ୍ତର ମନୋଭାବର ଶିକାର ହେଉଥିବା ମଧ୍ୟ ସେମାନେ ଅଭିଯୋଗ କରିଛନ୍ତି। ତୁରନ୍ତ ପ୍ରଶାସନ ଏଥିପ୍ରତି ଦୃଷ୍ଟି ଦେଇ ସମସ୍ୟାର ସମାଧାନ ପାଇଁ ଗ୍ରାମବାସୀ ଦାବି କରିଛନ୍ତି। ଏ ସଂକ୍ରାନ୍ତରେ ବିଡିଓ ରାଜା ରଞ୍ଜିତ ପ୍ରତାପ ବଳଙ୍କୁ ଯୋଗାଯୋଗ କରାଯିବାରୁ ସେ କହିଛନ୍ତି, ଏ ବିଷୟରେ ମୁଁ ବୁଝିବା ପରେ କହିବି।