ଜଗତସିଂହପୁର ଅଫିସ, ୯ା୫: ଜଗତ୍ସିଂହପୁର ପୌର ପରିଷଦ ପକ୍ଷରୁ ଆଦାୟ ହେଉଥିବା ରାଜସ୍ବ ମଧ୍ୟରୁ ଘର ଭଡା ଅନ୍ୟତମ। ଏହି ପୌରାଞ୍ଚଳର ବିଭିନ୍ନ ସ୍ଥାନରେ ୭୫ ଘର ଭଡ଼ାରେ ଲାଗିଛି । ଏସବୁ ଘରୁ ମାସିକ ପାଖାପାଖି ୨୬ ହଜାର ଟଙ୍କା ଭଡା ଧାର୍ଯ୍ୟ କରାଯାଇଛି । ସେଥିରୁ ୪୨ ଘରୁ ମାସିକ ଘର ପିଛା ୫୦ରୁ ୧୧୦ ଟଙ୍କା ଲେଖାଏ ଭଡା ସୂତ୍ରରେ ଦିଆଯାଇଛି। ଦୀର୍ଘ ୧୫ ବର୍ଷରୁ ଅଧିକ ସମୟ ହେବ ଅଧିକାଂଶ ଘର ଭଡ଼ା ବୃଦ୍ଧି ହୋଇ ନ ଥିବା ଜଣାପଡ଼ିଛି। ଏହାଛଡ଼ା କେତେଜଣଙ୍କ ଉପରେ ଭଡା ବାକି ଅଛି ତାହା ପରିଷଦ ପକ୍ଷରୁ ସ୍ପଷ୍ଟ କରାଯାଇନାହିଁ । ଏନେଇ ଜଗତ୍ସିଂହପୁର ପୌରାଧ୍ୟକ୍ଷା ଅର୍ଚ୍ଚନା ସିଂହ ଅସନ୍ତୋଷବ୍ୟକ୍ତ କରିବା ସହ କହିଛନ୍ତି, ଯେଉଁମାନଙ୍କୁ ଦୀର୍ଘ ବର୍ଷ ଧରି ଘର ଭଡା ଦିଆଯାଇଛି ସେମାନଙ୍କ ମଧ୍ୟରୁ ଅନେକ ଭଡା ଦେଇ ଅର୍ଥ ରୋଜଗାର କରୁଥିବା ଅଭିଯୋଗ ହେଉଛି। ଏହା ଉପରେ ଅନୁଧ୍ୟାନ କରାଯାଇ ପରବର୍ତ୍ତୀ ପଦକ୍ଷେପ ନିଆଯିବ। ଆଗାମୀ ବୈଠକରେ ଭଡା ବୃଦ୍ଧି ସହ ବକେୟା ଆଦାୟ ଉପରେ ଚୂଡାନ୍ତ ନିଷ୍ପତ୍ତି ନିଆଯିବ ବୋଲି ସେ କହିଛନ୍ତି ।
ଜଗତ୍ସିଂହପୁର ପୌର ପରିଷଦରୁ ମିଳିଥିବା ସୂଚନା ଅନୁଯାୟୀ, ଟାଉନ ହଲ୍ ବିଲ୍ଡିଂର ଆଗ ଓ ଉପର ମହଲାରେ ୫ଟି ଘର ଭଡ଼ାରେ ଲାଗିଛି । ସେଥିରୁ ଗୋଟିଏ ବିବାଦ ଯୋଗୁ ନ୍ୟାୟାଳୟରେ ବିଚାରାଧୀନ ରହିଛି। ଜିଲା ଅଡିଟ୍ ଅଫିସ ସର୍ବାଧିକ ୭,୨୭୬ ଟଙ୍କା ଭଡା ଦେଉଛି। ଅବଶିଷ୍ଟ ୩ଟିରୁ ମାସିକ ୫୦୦ ଟଙ୍କା ଲେଖାଏ ଭଡା ସ୍ଥିର ହୋଇଛି। ସେହିପରି ବଙ୍ଗଳା ଛକ ପାର୍ଶ୍ୱରେ ମୋଚିମାନଙ୍କୁ ୧୦ଟି ଘର ଭଡାରେ ଦିଆଯାଇଛି । ସେଥିରୁ ଗୋଟିଏ ୩୦୦ ଓ ୯ଟି ୨୦୦ ଟଙ୍କା ଲେଖାଏ ଭଡା ଦେବା ପାଇଁ ଧାର୍ଯ୍ୟ ହୋଇଛି। ଆଦିକବି ସାରଳା ଦାସ ସଂସ୍କୃତି ଭବନ ପାର୍ଶ୍ୱ ଅଳକାରେ ମାସିକ ୨୭୯୬ ଟଙ୍କା ଭଡ଼ା ଲାଗିଛି। ମାସିକ ବେସରକାରୀ ବସ ମାଲିକ ସଂଘ ୧୦୦୦ ଓ ଓମଫେଡ ଷ୍ଟଲଟି ୬୦୦ ଟଙ୍କା ଦେବା ପାଇଁ ସ୍ଥିର ହୋଇଛି । କଲେଜ ଛକରେ ୮ଟି ଘର ଭଡ଼ାରେ ଲାଗିଛି । ସେଗୁଡିକ ମଧ୍ୟରୁ ମାସିକ ୬୦୦ ଟଙ୍କା ହିସାବରେ ୨ଟି, ୫୦୦ ଟଙ୍କାରେ ୩ ଓ ୫୦ ଟଙ୍କା ହିସାବରେ ୨ଟି ଘର ଭଡା ଲାଗିଛି । ଜାଗଧାରୀସ୍ଥିତ ନୂଆ ବସ୍ଷ୍ଟାଣ୍ଡ ନିକଟରେ ୬ଟି ଘର ଭଡା ଲାଗିଥିବାବେଳେ ପ୍ରତ୍ୟେକରୁ ମାସିକ ୩୦୦ ଟଙ୍କା ଲେଖାଏ ଭଡା ଆଦାୟ ନିଷ୍ପତ୍ତି ହୋଇଛି । ସହରର ପ୍ରମୁଖ ସ୍ଥାନ କୁହାଯାଉଥିବା ଜିଲାପାଳଙ୍କ କାର୍ଯ୍ୟାଳୟ ଓ ଷ୍ଟେଟ୍ ବ୍ୟାଙ୍କ ସମ୍ମୁଖ ମାର୍କେଟ୍ ବିଲ୍ଡିଂର ସର୍ବାଧିକ ୪୦ଟି ଘର ଭଡାରେ ଲାଗିଛି । ସେଗୁଡିକ ମଧ୍ୟରୁ ୧୨ଟିରୁ ମାସିକ ୭୦ ଟଙ୍କା (ଘର ପିଛା) ହିସାବରେ ଭଡା ଆଦାୟ ବ୍ୟବସ୍ଥା ହୋଇଛି । କେବଳ ଏତିକି ନୁହେଁ ଘର ପିଛା ୮୦ ଟଙ୍କା ହିସାବରେ ୧୬ଟି, ୯୦ ଟଙ୍କା ହିସାବରେ ୪ଟି, ୧୦୦ ଟଙ୍କା ହିସାବରେ ୨ଟି ଓ ୧୧୦ ଟଙ୍କା ହିସାବରେ ୪ଟି ଘର ଦୀର୍ଘ ବର୍ଷ ହେବ ଭଡା ସୂତ୍ରରେ ଦିଆଯାଇଛି । ଏ ସମ୍ପର୍କରେ ସ୍ଥାନୀୟ କେତେଜଣଙ୍କ କହିବା କଥା ହେଲା ଯେଉଁମାନଙ୍କୁ ଘର ଭଡା ଦିଆଯାଇଛି ପ୍ରତ୍ୟେକ ବ୍ୟବସାୟ କରୁନାହାନ୍ତି। ଭଡା ଦେଇ ଅର୍ଥ ରୋଜଗାର କରିବା ଦୁର୍ଭାଗ୍ୟଜନକ କଥା। ତେଣୁ ଏହା ଉପରେ ଅନୁଧ୍ୟାନ କରାଯାଇ, ଯେଉଁମାନେ ବ୍ୟବସାୟ କରୁଛନ୍ତି ସେମାନଙ୍କୁ ଭଡା ଦେବା ପାଇଁ ସୁଯୋଗ ସୃଷ୍ଟି କରିବା ଆବଶ୍ୟକ ବୋଲି ପ୍ରତିକ୍ରିୟାରେ କହିଛନ୍ତି।