ବରଗଡ଼,୨୪ା୫(ପ୍ରେମାନନ୍ଦ ଖମାରୀ): ବରଗଡ଼ ଜିଲାରେ ଗତ ୨୦ତାରିଖ ମତଦାନ ଚାଲିଥିବା ବେଳେ ସଦର ଥାନା ଅନ୍ତର୍ଗତ ସରସରା ଗ୍ରାମରେ ଅଟୋଚାଳକଙ୍କୁ ହତ୍ୟା ଘଟଣାରେ ଶୁକ୍ରବାର ବରଗଡ଼ ସଦର ଥାନା ଅଧିକାରୀ ମାନସ କୁମାର ଭୋଇ ଏବଂ ଅବକାରୀ ଷ୍ଟେଶନ ଅଧିକାରୀ ସିଦ୍ଧାନ୍ତ ପାତ୍ରଙ୍କ ବଦଳି ହୋଇଛି। ଉଭୟଙ୍କୁ ନୂଆପଡ଼ା ଜିଲାକୁ ବଦଳି ହୋଇଥିବା ଜଣାପଡ଼ିଛି।
ସୂଚନାନୁଯାୟୀ, ମୁଖ୍ୟ ନିର୍ବାଚନ ଅଧିକାରୀ ନିକୁଞ୍ଜ ବିହାରୀ ଧଳ ଏହି ଘଟଣାର ତଦନ୍ତ ଦାୟିତ୍ୱ ଉତ୍ତରାଞ୍ଚଳ ରାଜସ୍ବ ଆୟୁକ୍ତ(ଆରଡ଼ିସି) ଶ୍ରୀକାନ୍ତ ପୃଷ୍ଟିଙ୍କୁ ଦେଇଥିଲେ। ଗତ ୨୧ତାରିଖ ଆରଡିସି ବରଗଡ଼ ଗସ୍ତରେ ଆସି ଏହାର ତଦନ୍ତ କରିଥିଲେ ଏବଂ ତଦନ୍ତ ରିପୋର୍ଟ ମୁଖ୍ୟ ନିର୍ବାଚନ ଅଧିକାରୀଙ୍କୁ ପ୍ରଦାନ କରିଥିଲେ। ଘଟଣା ଦିନ ଅଭିଯୁକ୍ତମାନେ ନିଶାସକ୍ତ ଅବସ୍ଥାରେ ରହିଥିବା ନେଇ ତଦନ୍ତ ରିପୋର୍ଟରେ ଉଲ୍ଲେଖ କରାଯାଇଥିଲା। ଏହାପରେ ମୁଖ୍ୟ ନିର୍ବାଚନ ଅଧିକାରୀ ଧଳ ୨୪ ଘଣ୍ଟା ମଧ୍ୟରେ ବରଗଡ଼ ସଦର ଥାନାଧିକାରୀ ଏବଂ ଅବକାରୀ ଷ୍ଟେଶନ ଅଧିକାରୀଙ୍କୁ ବଦଳି କରିବା ପାଇଁ ନିର୍ଦ୍ଦେଶ ଦେଇଥିଲେ। ତାକୁ ଆଧାର କରି ବରଗଡ଼ ସଦର ଥାନା ଅଧିକାରୀ ଭୋଇ ଏବଂ ଅବକାରୀ ଷ୍ଟେଶନ ଅଧିକାରୀ ପାତ୍ରଙ୍କୁ ନୂଆପଡ଼ା ଜିଲାକୁ ବଦଳି କରାଯାଇଛି। ତେବେ ସଦର ଥାନା ଅଧିକାରୀଙ୍କ ସ୍ଥାନରେ ଶର୍ମିଷ୍ଠା ପ୍ରଧାନଙ୍କୁ ଅବସ୍ଥାପିତ କରାଯାଇ ଥିବାବେଳେ ଅବକାରୀ ଷ୍ଟେଶନ ଅଧିକାରୀ ପାତ୍ରଙ୍କ ସ୍ଥାନରେ ସ୍ବପ୍ନାରାଣୀ ସେଠୀଙ୍କୁ ଅବସ୍ଥାପିତ କରାଯାଇପାରେ ବୋଲି ଶୁଣିବାକୁ ମିଳିଛି।
