ଭୋଗରାଇ, ୨୬।୪(ଡି.ଏନ.ଏ.) ବାଲେଶ୍ୱର ଜିଲା ଭୋଗରାଇ ବ୍ଲକରେ ଗତ ରବିବାର ଅପରାହ୍ନରେ ହୋଇଥିବା କାଳବୈଶାଖୀରେ କ୍ଷତି ହୋଇଥିବା ଧାନ, ପାନ, ଘର, ରବିଫସଲ ଓ ତୈଳବୀଜର ରିପୋର୍ଟ ୭ଦିନ ମଧ୍ୟରେ ଦେବାକୁ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ରାଜସ୍ବ ଓ କୃଷି ବିଭାଗକୁ ନିର୍ଦ୍ଦେଶ ଦେଇଛନ୍ତି। ସୋମବାର ଜିଲାପାଳ ଭୋଗରାଇ ଗସ୍ତରେ ଆସି ଖବରଦାତାଙ୍କ ପ୍ରଶ୍ନର ଉତ୍ତରରେ ସେ ନିଜେ କାଳବୈଶାଖୀ କ୍ଷୟକ୍ଷତି ଅନୁଧ୍ୟାନ କରିବେ ବୋଲି କହିଛନ୍ତି। ରବିବାର ଅପରାହ୍ନରେ ଦକ୍ଷିଣ ଭୋଗରାଇର ୧୨ ପଞ୍ଚାୟତର ଶତାଧିକ ଗ୍ରାମରେ କାଳବୈଶାଖୀ ଝଡ଼ ହେବା ଦ୍ୱାରା ଧାନ, ପାନ, ରବି ଓ ତୈଳବୀଜ ଚାଷର କ୍ଷତି ହୋଇଛି। ଏତଦ୍ଭିନ୍ନ ବହୁ ନଡ଼ାଛପର, ଆଜବେଷ୍ଟସ, କ୍ୟାବିନ୍ ଗୃହ ଟିଣ ଉଡ଼ାଇ ନେଇଥିବା ବେଳେ ବିଦ୍ୟୁତ୍ ଖୁଣ୍ଟି ଓ ବିଦ୍ୟୁତ୍ ତାର ଉପରେ ବଡ଼ ବଡ଼ ଗଛ ଭାଙ୍ଗିପଡ଼ିବାରୁ ଦୁଇଦିନ ଧରି ବିଦ୍ୟୁତ୍ ସଂଯୋଗ ବନ୍ଦ ରହିଛି। ବିଦ୍ୟୁତ୍ସେବା ବନ୍ଦ ଯୋଗୁ ଅସହ୍ୟ ତାତିରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିବା ସହ ପାନୀୟ ଜଳ ସଙ୍କଟ ଦେଖାଦେଇଛି। ରାଜସ୍ବ ବିଭାଗର ସମସ୍ତ ଆର୍ଆଇଙ୍କୁ ତହସିଲଦାର କ୍ଷୟକ୍ଷତି ଆକଳନ ନିମନ୍ତେ ନିର୍ଦ୍ଦେଶ ଦେଇଥିବା ବେଳେ କୃଷି ବିଭାଗ ଅନୁରୂପ ଭାବେ କ୍ଷୟକ୍ଷତିର ରିପୋର୍ଟ କରୁଥିବା ସୂଚନା ମିଳିଛି।