ଯାଜପୁର ଟାଉନ,୧୬ା୭(ଡି.ଏନ.ଏ.): ଭୁବନେଶ୍ୱର ବିଜେବି କଲେଜ ଛାତ୍ରୀ ରୁଚିକା ମହାନ୍ତିଙ୍କ ଆତ୍ମହତ୍ୟା ଘଟଣାକୁ ୨ ସପ୍ତାହ ପୂରିବାକୁ ବସିଲାଣି। ମାତ୍ର ଏନେଇ ପୋଲିସ, ପ୍ରଶାସନ, କଲେଜ କର୍ତ୍ତୃପକ୍ଷ ଓ ସରକାର କାହାରି ପାଖରେ ସାମାନ୍ୟତମ ସମ୍ବେଦନଶୀଳତା ନାହିଁ। ନବନିର୍ମାଣ ଯୁବ ଛାତ୍ର ସଂଠଗନର ଅନଶନ, ରୁଚିକା ମା’ଙ୍କ ଅହୋରାତ୍ର ଧାରଣା ସରକାରଙ୍କ ନିଦ୍ରାଭଙ୍ଗ କରିନାହିଁ କି ରୁଚିକାଙ୍କୁ ନ୍ୟାୟ ମିଳିନାହିଁ। ଏ ପରି ପ୍ରେକ୍ଷୀରେ ନବ ନିର୍ମାଣ କୃଷକ ସଂଗଠନ ପକ୍ଷରୁ ଆସନ୍ତା ୧୯ ତାରିଖ ମଙ୍ଗଳବାର ଏକ ୧୨ଘଣ୍ଟିଆ (ସକାଳ ୬ରୁ ସନ୍ଧ୍ୟା ୬) ଓଡ଼ିଶା ବନ୍ଦ ଡାକରା ଦିଆଯାଇଛି। ଏହି ବନ୍ଦ ଡାକରା କେବଳ ଛାତ୍ରୀଛାତ୍ରଙ୍କ ପାଇଁ ନୁହେଁ ଅଧିକନ୍ତୁ ଶିକ୍ଷା ବ୍ୟବସ୍ଥାର ଅସଂଗତି, ମହିଳାଙ୍କ ପ୍ରତି ଅବମାନନା, ପୋଲିସର ଦମନଲୀଳା, ପ୍ରଶାସନର ଅବହେଳା, ସରକାରୀ ପକ୍ଷପାତିତା ଓ ରାଜନୈତିକ ଇଚ୍ଛାଶକ୍ତି ବିରୋଧରେ ହିଁ ଦିଆଯାଇଛି। ଏଣୁ ସମସ୍ତ ଛାତ୍ରୀଛାତ୍ର, ଛାତ୍ର ସଂଗଠନ, ଯୁବ ସଂଗଠନ, ବିଭନ୍ନ ସଂଗଠନ, ଟ୍ରେଡ୍ ୟୁନିୟନ୍, ରାଜନୈତିକ ଦଳ, କୃଷକ ମହିଳା, ସର୍ବୋପରି ସମ୍ବେଦନଶୀଳ ବ୍ୟକ୍ତି ବିଶେଷ ଶାନ୍ତିପୂର୍ଣ୍ଣ ଓ ଗଣତନ୍ତ୍ରିକ ଭାବେ ଏହାକୁ ସଫଳ କରାଇବାକୁ ନିବେଦନ କରାଯାଇଛି। ବନ୍ଦବେଳେ ସମସ୍ତ ଯାତାୟାତ, ଅଫିସ୍ ଓ ବ୍ୟବସାୟ ବନ୍ଦ ରହିବ ବୋଲି କୁହାଯାଇଛି।