ଶେରଗଡ଼,୧ା୭(ଡି.ଏନ୍.ଏ.): ଗଞ୍ଜାମ ଜିଲା ଶେରଗଡ଼ ବ୍ଲକରେ କରୋନା ସ୍ଥିତି ଦିନକୁ ଦିନ ବିଗିଡ଼ି ଚାଲିଛି। ମଙ୍ଗଳବାର ସନ୍ଧ୍ୟା ସୁଦ୍ଧା ବ୍ଲକରେ ମୋଟ୍ ୮୨ ଜଣ କରୋନାରେ ଆକ୍ରାନ୍ତ ହୋଇଥିବା ବ୍ଲକ ସୂତ୍ରରୁ ପ୍ରକାଶ। ଏଥି ମଧ୍ୟରୁ ସ୍ଥାନୀୟ ସଂକ୍ରମିତ ୫ଜଣ ଥିବା ବେଳେ ଅନ୍ୟ ସମସ୍ତେ ପ୍ରବାସୀ ଓଡ଼ିଆ। ଅନ୍ୟପକ୍ଷରେ କରୋନା କଟକଣା ପୁଣି ଅଗଷ୍ଟ ୩୦ପର୍ଯ୍ୟନ୍ତ ବଢ଼ା ଯାଇଥିବା ବେଳେ ଶେରଗଡ଼ ରମୁଣିସାହି ଓ ବଜାର ଛକରେ ଥିବା ପରିବା ବଜାର ଗତ କିଛିଦିନ ହେଲା ଗହଳି ଲାଗି ରହୁଥିଲା। ବ୍ୟବସାୟୀମାନେ ସାମାଜିକ ଦୂରତ୍ୱ ନ ମାନି ବ୍ୟବସାୟ କରୁଥିବା ବେଳେ କିଛି ତେଜରାତି ଦୋକାନରେ ସାମାଜିକ ଦୂରତାର ଅବମାନନା କରାଯାଉଥିଲା। ଶନିବାର, ରବିବାର ଶଟ୍ଡାଉନ୍ ପରେ ଶେରଗଡ଼ ପରିବା ବଜାରରେ ଲୋକମାନେ ପ୍ରବଳ ଗହଳି ଦେଖିବାକୁ ମିଳିଥିଲା। ଗୋଷ୍ଠି ସଂକ୍ରମଣ ଭୟରେ ତହସିଲଦାର ଡ. ଦୟାସିନ୍ଧୁ ପରିଡ଼ା,ଅତିରିକ୍ତ ତହସିଲଦାର ଅକ୍ଷୟ କୁମାର ମଲ୍ଲିକ, ସୁପ୍ରଭାଇଜର ମନୋଜ କୁମାର ନାହାକ, ପି.ପଞ୍ଚମା ମଙ୍ଗଳବାର ସନ୍ଧ୍ୟାରେ ଡାକବାଜି ଯନ୍ତ୍ର ଦ୍ୱାରା ଶେରଗଡ଼ ପରିବା ବଜାରରେ ଉପସ୍ଥିତ ରହି ଠେଲା ଗାଡ଼ରେ ପରିବା ବିକିବା, ବଜାର ବାହାରେ ଅସ୍ଥାୟୀ ଭାବେ ବିକ୍ରି କରିବା, ସେଠାରେ ମଧ୍ୟ ସାମାଜିକ ଦୂରତା ରଖିବାକୁ ଅନୁରୋଧ କରିଥିଲେ। ଏହି ଅନୁରୋଧ ରକ୍ଷା କରି ବ୍ୟବସାୟୀମାନେ ଅସ୍ଥାୟୀ ଭାବେ ପରିବା ବଜାର ଆରମ୍ଭ କରିଛନ୍ତି।