ନୂଆଦିଲ୍ଲୀ,୧୦ ।୭: ଅମରନାଥ ଗୁମ୍ଫା ନିକଟରେ ହୋଇଥିବା ବାଦଲ ଫଟା ବର୍ଷାରେ ଏବେ ପର୍ଯ୍ୟନ୍ତ ୧୬ ଜଣଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ୬୫ ଜଣଙ୍କ ଚିକିତ୍ସା ଚାଲିଛି । ୪୧ ଜଣ ଏବେବି ନିଖୋଜ ଥିବା କୁହାଯାଉଛି । ତୃତୀୟ ଦିନରେ ବି ସେଠାରେ ଉଦ୍ଧାର କାର୍ଯ୍ୟ ଜାରି ରହିଛି । ଜମ୍ମୁ-କଶ୍ମୀର ପୋଲିସ, ଏନଡିଆରଏଫ, ଭାରତୀୟ ସେନା ଓ ଭାରତୀୟ ତିବ୍ୱତ ସୀମା ପୋଲିସ ଉଦ୍ଧାର କାର୍ଯ୍ୟରେ ଲାଗି ପଡିଛନ୍ତି ।
ଶୁକ୍ରବାର ମନ୍ଦିର ପରିସରରେ ଅପରାହ୍ନ ୪ଟା ୩୦ରୁ ୬ଟା ୩୦ ମଧ୍ୟରେ ୩୧ ମିଲିମିଟର ବର୍ଷା ହୋଇଥିବାରୁ ଏହା ବାଦଲ ଫଟା ବର୍ଷା ନୁହେଁ ବୋଲି ପାଣିପାଗ ବିଶେଷଜ୍ଞ କହୁଛନ୍ତି । ଏହା ସାଧାରଣ ବର୍ଷା ଓ ଏହାକୁ ନେଇ ପାଣିପାଗ ବିଭାଗ ପକ୍ଷରୁ ପୂର୍ବରୁ ସତର୍କ ସୂଚନା ଦିଆଯାଇଥିବା କୁହାଯାଉଛି । ଏହି ସାଧାରଣ ବର୍ଷା ବନ୍ୟା ପରିସ୍ଥିତି ସୃଷ୍ଟି କରିପାରେ ବୋଲି କୁହାଯାଇଥିବା ସୂଚନା ଦେଇଛନ୍ତି ପାଣିପାଗ ବିଶେଷଜ୍ଞ । ଏବେବି ସେଠାରେ ଉଦ୍ଧାର କାର୍ଯ୍ୟ ଜାରି ରହିଥିବା ବେଳେ ଏହା ଖୁବଶୀଘ୍ର ଶେଷ ହେବ ବୋଲି କୁହାଯାଇଛି । ଏହି ଘଟଣା ପରେ ଅମରନାଥ ଯାତ୍ରାକୁ ସାମୟିକ ଭାବେ ବନ୍ଦ ରଖାଯାଇଛି । ଏବେ ଜଣାପଡିଛି କି ପାଗରେ ପରିବର୍ତ୍ତନ ହେଲେ ଦିନେ କି ଦୁଇ ଦିନ ମଧ୍ୟରେ ପୁଣିଥରେ ଅମରନାଥ ଯାତ୍ରା ଆରମ୍ଭ କରାଯାଇପାରେ ।
