କେନ୍ଦ୍ରାପଡ଼ା ଅଫିସ/ରାଜନଗର(ଡି.ଏନ.ଏ.)/ପଟ୍ଟାମୁଣ୍ଡାଇ(ସ୍ବ.ପ୍ର.), ୨୪।୧୧: କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ଗଙ୍ଗାରାମପୁର ପଞ୍ଚାୟତର କଇଁକୁଳା ଗଁା ନିକଟରୁ ଏକ ମୃତ ଗାଙ୍ଗେଟିକ୍ ଡଲଫିନ ରବିବାର ଉଦ୍ଧାର ହୋଇଛି। ଏହାର ଓଜନ ୬୦ କେଜି ଏବଂ ଲମ୍ବ ୭ ଫୁଟ ୩ ଇଞ୍ଚ। ଏହା ବିରଳ ଜାତୀୟ ଜଳଚର ପ୍ରାଣୀ ଏବଂ ସାଧାରଣତଃ ମଧୁର ଜଳରେ ରୁହନ୍ତି। ପଶ୍ଚିମବଙ୍ଗ ଉପକୂଳ ଅଞ୍ଚଳରେ ଏମାନେ ବେଶି ଦେଖାଯାଆନ୍ତି। ଭାରତୀୟ ବନ୍ୟପ୍ରାଣୀ ସଂରକ୍ଷଣ ଆଇନ ଅନୁଯାୟୀ ଏମାନେ ସିଡ୍ୟୁଲ-୧ ଅନ୍ତର୍ଭୁକ୍ତ ପ୍ରାଣୀ ବୋଲି ପ୍ରାଣୀ ବିଶେଷଜ୍ଞ ଶିବ ପ୍ରସାଦ ପରିଡ଼ା କହିଛନ୍ତି।
କଇଁକୁଳା ଗ୍ରାମ ନିକଟ ଭେଡିସାହି ଗାଁର ମତ୍ସ୍ୟଜୀବୀମାନେ ରବିବାର ଗୋବରୀ ନଦୀରେ ଜାଲ ପକାଇ ଉଠାଇବାବେଳେ ସେଥିରେ ଉକ୍ତ ଡଲଫିନ୍ଟି ପଡ଼ିଥିବା ଦେଖିବାକୁ ପାଇଥିଲେ। ଜାଲକୁ ଟାଣି ଭୂମି ଉପରେ ରଖିବା ପରେ ଡଲଫିନ୍ଟି ମରିଯାଇଥିଲା। ମତ୍ସ୍ୟଜୀବୀମାନେ କଇଁକୁଳା ଗଁା ନିକଟ ପଡ଼ିଆରେ ତାହାକୁ ଫୋପାଡ଼ି ଦେଇଥିଲେ। ବିଳମ୍ବିତ ରାତ୍ରିରେ ରାଜନଗର ଭାରପ୍ରାପ୍ତ ରେଞ୍ଜ ଅଫିସର ଧନେଶ୍ୱର ରଥ, ଫରେଷ୍ଟର ମହନ୍ତ କୁମାର ମଲ୍ଲିକ, ଫରେଷ୍ଟ ଗାର୍ଡ ତ୍ରିଦୀପ କୁମାର ପ୍ରଧାନ, ଦେବେନ୍ଦ୍ର କୁମାର ଶତପଥୀ, ନିରୁପମା ଷଡ଼ଙ୍ଗୀ ପ୍ରମୁଖ ମୃତ ଡଲଫିନକୁ ଉଦ୍ଧାର କରି ସଂସାରଫଳସ୍ଥିତ ସେଣ୍ଟ୍ରାଲ ନର୍ସରିକୁ ଆଣିଥିଲେ। ମହାନଦୀ ଡେଲ୍ଟା ମୁହାଣରୁ ଏହି ଡଲ୍ଫିନ୍ଟି ଗୋବରୀ ନଦୀକୁ ପଶି ଆସିଥିବା ବନ ବିଭାଗ ପକ୍ଷରୁ କୁହାଯାଇଛି। ସୋମବାର ରାଜନଗରର ଅତିରିକ୍ତ ପ୍ରାଣୀ ଚିକିତ୍ସା ଅଧିକାରୀ ଡା. ଦେବୀ ପ୍ରସାଦ କୁଣ୍ଡ ମୃତ ଡଲଫିନର ବ୍ୟବଚ୍ଛେଦ କରିଥିଲେ। ମାଂସ କଢ଼ାଯାଇ ଡିଏନଏ ଟେଷ୍ଟ ପାଇଁ ନମୁନା ସଂଗ୍ରହ କରାଯାଇଛି। କଙ୍କାଳକୁ ମଙ୍ଗଳବାର ଭିତରକନିକାର ଡାଙ୍ଗମାଳ ମ୍ୟୁଜିୟମ୍କୁ ପଠାଯିବ। ସେଠାରେ କାଚ ବାକ୍ସରେ ସଂରକ୍ଷିତ କରି ରଖାଯିବା ବ୍ୟବସ୍ଥା ହୋଇଛି।