ବୁଗୁଡ଼ା,୧୮।୧୧(ଡି.ଏନ୍.ଏ): ସ୍ଥାନୀୟ ପିପୁଲ୍ସ କଲେଜର ବର୍ଦ୍ଧିତ ସିଟ୍ ପାଇଁ ସ୍ଥାୟୀ ସ୍ବୀକୃତି ପ୍ରଦାନ ପରିପ୍ରେକ୍ଷୀରେ ବ୍ରହ୍ମପୁର ବିଶ୍ବବିଦ୍ୟାଳୟ ପକ୍ଷରୁ ଦୁଇ ଜଣିଆ ଏକ ଅନୁଧ୍ୟାନକାରୀ ଦଳ ଗୁରୁବାର ସେଠାରେ ପହଞ୍ଚି ଅନୁଧ୍ୟାନ କରିଥିବା ଜଣାଯାଇଛି । ଉକ୍ତ ଦଳରେ ବ୍ରହ୍ମପୁର ବିଶ୍ବବିଦ୍ୟାଳୟର ରସାୟନ ବିଜ୍ଞାନ ବିଭାଗର ଆସିଷ୍ଟାଣ୍ଟ ପ୍ରଫେସର ଡକ୍ଟର ବିଭୂତି ଭୂଷଣ ପରିଡା ଏବଂ ପ୍ରାଣୀ ବିଜ୍ଞାନ ବିଭାଗର ପ୍ରଫେସର ଡକ୍ଟର ତପନ କୁମାର ବାରିକ ରହିଥିଲେ । କଲେଜର +୩ ବିଜ୍ଞାନର ସିଟ୍ ସଂଖ୍ୟା ୧୨୮ ଥିବା ବେଳେ ସେଥିରେ ବୃଦ୍ଧି କରାଯାଇ ୧୯୨ ସିଟ୍ ପାଇଁ ପୂର୍ବରୁ ବିଶ୍ବବିଦ୍ୟାଳୟ କର୍ତ୍ତୃପକ୍ଷଙ୍କୁ ଅନୁରୋଧ କରାଯାଇଥିଲା । ପ୍ରସ୍ତାବିତ ବିଭିନ୍ନ ବିଭାଗର ସିଟ୍ ପ୍ରକାରେ ଉଭୟ ଗଣିତ ଓ ପ୍ରାଣୀ ବିଜ୍ଞାନ ପ୍ରତ୍ୟେକ ବିଭାଗର ସିଟ୍ ସଂଖ୍ୟା ୧୬ରୁ୨୪କୁ ଏବଂ ରସାୟନ ବିଜ୍ଞାନ , ଉଦ୍ଭିଦ ବିଜ୍ଞାନ ଓ ପଦାର୍ଥ ବିଜ୍ଞାନ ଆଦି ପ୍ରତ୍ୟେକଟି ବିଭାଗର ସିଟ ସଂଖ୍ୟା ୩୨ରୁ୪୮କୁ ବୃଦ୍ଧି କରିବା ପାଇଁ ନିବେଦନ କରାଯାଇଥିଲା । ଏ ପରିପ୍ରେକ୍ଷୀରେ ଆଜି ବିଶ୍ବବିଦ୍ୟାଳୟ ତରଫରୁ ଦୁଇ ଜଣିଆ ଟିମ ପହଞ୍ଚି ଅଧ୍ୟକ୍ଷ ରଜନୀ କାନ୍ତ ଦାଶଙ୍କ ସମେତ ବିଜ୍ଞାନ ବିଭାଗର ଅନ୍ୟାନ୍ୟ ଅଧ୍ୟାପକଙ୍କ ସହ ଆଲୋଚନା କରି ଫେରିଥିବା ଜଣାପଡିଛି।