ନୂଆଦିଲ୍ଲୀ, ୧୧।୫ : ଧର୍ମାନ୍ତରିତ ହୋଇଥିବା ବର୍ଗଙ୍କ ପାଇଁ ସରକାର ଖୁବ ଶୀଘ୍ର ଏକ ଜାତୀୟ ଆୟୋଗ ଗଠନ କରିବାକୁ ଯୋଜନା କରିଛନ୍ତି। ଆନ୍ତଃମନ୍ତ୍ରୀସ୍ତରୀୟ ଆଲୋଚନା ଉପରେ ଆଧାର କରି କେନ୍ଦ୍ର ଅନୁସନ୍ଧାନ ମନ୍ତ୍ରଣାଳୟର ଅନୁସନ୍ଧାନ ଅଧିନିୟମ ଅନୁଯାୟୀ ଖ୍ରୀଷ୍ଟିଆନ ତଥା ଇସଲାମ ଧର୍ମ ଗ୍ରହଣ କରୁଥିବା ବର୍ଗଙ୍କ ପାଇଁ ଏକ ଜାତୀୟ ଆୟୋଗ ଗଠନ ପାଇଁ ଏକ କ୍ୟାବିନେଟ ପ୍ରସ୍ତାବ ପ୍ରସ୍ତୁତ କରିଛନ୍ତି। ଏହି ପ୍ରସ୍ତାବ ଉପରେ ଉଚ୍ଚ ସ୍ତରୀୟ ଆଲୋଚନା ଚାଲିଛି। ଏହି ଆଲୋଚନାରେ ଦଳିତ ଖ୍ରୀଷ୍ଟିଆନମାନଙ୍କୁ ବିଶେଷ ଗୁରୁତ୍ୱ ଦିଆଯାଉଛି ବୋଲି କୁହାଯାଉଛି। ଏହି ପ୍ରସଙ୍ଗରେ ଆନ୍ତଃମନ୍ତ୍ରୀସ୍ତରୀୟ ଆଲୋଚନା ଜାନୁଆରୀରୁ ଆରମ୍ଭ ହୋଇ ନିକଟରେ ଶେଷ ହୋଇଛି।
ଇକୋନୋମିକ ଟାଇମ୍ସ ରିପୋର୍ଟ ଅନୁଯାୟୀ, ସୁପ୍ରିମକୋର୍ଟଙ୍କ ସୂଚନାନୁସାରେ, ଧର୍ମାନ୍ତରଣ କରିଥିବା ଦଳିତଙ୍କ ସ୍ଥିତି ଏବଂ ଜୀବନ ଉପରେ ଏକ ଗଭୀର, ପ୍ରମାଣ-ଆଧାରିତ ତଥା ତଥ୍ୟ ସମର୍ଥିତ ଅଧ୍ୟୟନର ଆବଶ୍ୟକତା ରହିଛି ବୋଲି ଏକ ସଙ୍କେତ ପ୍ରଦାନ କରିଥିଲେ। ସମାନ ଆଧାରରେ, ଧର୍ମାନ୍ତରିତ ହୋଇଥିବା ବର୍ଗଙ୍କ ସାମାଜିକ-ଅର୍ଥନୈତିକ ଏବଂ ଜୀବନଶୈଳୀକୁ ଆକଳନ କରିବା ପାଇଁ ଏକ ତିନିଜଣିଆ କମିଶନ ଗଠନ କରାଯିବ।
ଦଳିତଙ୍କୁ ସଂରକ୍ଷଣର ଲାଭ ପ୍ରଦାନ କରାଯାଇପାରିବ କି ନାହିଁ ତାହା ଉପରେ ପ୍ୟାନେଲର ରିପୋର୍ଟ ଗୁରୁତ୍ୱପୂର୍ଣ୍ଣ ହେବ। କାରଣ ଏହି ପ୍ରସଙ୍ଗ କୋର୍ଟରେ ବିଚାରାଧୀନ ରହିଛି। ୨୦୨୦ରେ ଖ୍ରୀଷ୍ଟିଆନ ବର୍ଗଙ୍କ ଦ୍ୱାରା ସୁପ୍ରିମକୋର୍ଟରେ ଦୁଇଟି ଆବେଦନ କରାଯାଇଥିଲା ଏବଂ ଏସ୍ସି ଏସ୍ଟି ମାନ୍ୟତାକୁ ଧର୍ମ ନିରପେକ୍ଷ କରାଯିବାକୁ ଦାବି କରାଯାଇଥିଲା। ଏ ସମ୍ପର୍କରେ ସୁପ୍ରିମକୋର୍ଟ କେନ୍ଦ୍ରକୁ ନୋଟିସ ଜାରି କରିଥିଲେ।
ହିନ୍ଦୁ, ଶିଖ ଏବଂ ବୌଦ୍ଧ ଧର୍ମର ଏସ୍ସି ଏସ୍ଟି ସଂରକ୍ଷଣ ପାଇଁ ଯୋଗ୍ୟ ବର୍ତ୍ତମାନ ହିନ୍ଦୁ, ଶିଖ ଏବଂ ବୌଦ୍ଧ ଧର୍ମର ଏସ୍ସି ଏସ୍ଟିମାନେ ଚାକିରୀ ଏବଂ ଶିକ୍ଷା କ୍ଷେତ୍ରରେ ସଂରକ୍ଷଣ ପାଇବାକୁ ଯୋଗ୍ୟ ଅଟନ୍ତି। ସମ୍ବିଧାନର ଧାରା ୩୪୧ ଅନୁଯାୟୀ ଜାରି କରାଯାଇଥିବା ରାଷ୍ଟ୍ରପତିଙ୍କ ନିର୍ଦ୍ଦେଶ ଅନୁଯାୟୀ ଯଦି ଖ୍ରୀଷ୍ଟିଆନ ଏବଂ ମୁସଲମାନ ଭାବେ ଧର୍ମାନ୍ତରଣ କରାଯାଏ ତେବେ ଏସ୍ସି ଏସ୍ଟିମାନେ ନିଜର ସଂରକ୍ଷଣ ହରାଇବେ। ସ୍ବାଧୀନତା ପରଠାରୁ ସରକାର ଯୁକ୍ତି କରିଛନ୍ତି ଯେ ଏସ୍ସି ଏସ୍ଟି ସ୍ଥିତି କେବଳ ହିନ୍ଦୁ ଧର୍ମରେ ପ୍ରଚଳିତ । ପରେ ଶିଖ ଧର୍ମ ଏବଂ ବୌଦ୍ଧ ଧର୍ମାନ୍ତରଣ କ୍ଷେତ୍ରରେ ପରିବର୍ତ୍ତନ କରିବା ପାଇଁ ସଂଶୋଧନ କରାଯାଇଥିଲା।
ରଙ୍ଗନାଥ ମିଶ୍ର ଆୟୋଗଙ୍କ ୨୦୦୭ ରିପୋର୍ଟରେ ଏସ୍ସି ଏସ୍ଟିଙ୍କ ସ୍ଥିତିକୁ ଧର୍ମଠାରୁ ପୃଥକ କରିବା ଏବଂ ସେମାନଙ୍କ ଧର୍ମକୁ ସଂରକ୍ଷଣ ନିରପେକ୍ଷ କରିବା ପାଇଁ ସମ୍ବିଧାନର ୧୯୫୦ର ଅନୁଚ୍ଛେଦ ୩ ଆଦେଶରେ ସଂଶୋଧନ କରିବାକୁ ପରାମର୍ଶ ଦିଆଯାଇଛି। ଏହାକୁ ଅପସାରଣ କରାଯିବା ଉଚିତ। ଏହି ପ୍ରସଙ୍ଗରେ କୌଣସି ତଥ୍ୟ ନାହିଁ କିମ୍ବା ଏସ୍ସି ଏସ୍ଟି ତାଲିକାରେ ଏଭଳି ଅନ୍ତର୍ଭୁକ୍ତିର ପ୍ରଭାବକୁ ଆୟୋଗ ଆକଳନ କରିନାହାଁନ୍ତି ବୋଲି ଦର୍ଶାଇ ସରକାର ଏହି ସୁପାରିଶକୁ ଗ୍ରହଣ କରି ନଥିଲେ।