ନାରାୟଣପାଟଣା/କୋରାପୁଟ, ୮ା୨: କୋରାପୁଟ ଜିଲା କୋଟିଆକୁ ନେଇ ଏବେ ଚର୍ଚ୍ଚା ଥମି ନ ଥିବା ବେଳେ ଜିଲାର ନାରାୟଣପାଟଣା ବ୍ଲକର ଆନ୍ଧ୍ର ସୀମାନ୍ତ ୫ଟି ଗ୍ରାମର ଗ୍ରାମବାସୀ ଏବେ ଆନ୍ଧ୍ରମୁହାଁ ହୋଇଛନ୍ତି। ଆନ୍ଧ୍ର ସରକାରଙ୍କ ପକ୍ଷରୁ ହେଉଥିବା ପଞ୍ଚାୟତ ନିର୍ବାଚନରେ ସେମାନେ ଭୋଟ ଦେବାକୁ ନିଷ୍ପତ୍ତି ନେଇଛନ୍ତି। ଆସନ୍ତା ୧୩ରେ ହେବାକୁ ଥିବା ପଞ୍ଚାୟତ ନିର୍ବାଚନରେ ନାରାୟଣପାଟଣା ବ୍ଲକ ଲଙ୍ଗଳବେଡା ପଞ୍ଚାୟତର ଚିନ୍ତନୱାଲସା, ତେନ୍ତୁଳିଗୁଡା, କେସି ଭାଦ୍ରା ସହ ଅନ୍ୟ ୨ଟି ଗ୍ରାମ ସହ ୫ଟି ଗ୍ରାମର ଗ୍ରାମବାସୀ ଭୋଟ ଦେବାକୁ ଯାଉଥିବା ଗ୍ରାମର ଲାସୁ ମାଣ୍ଡଙ୍ଗି, ମେଲକା ବୁଚାମା, ହିନ୍ଦୁ ମେଲକା, ମେଲକା ଜୁଙ୍ଗୁ, ମାଣ୍ଡିଙ୍ଗି ନାରସମା କହିଛନ୍ତି। ଆନ୍ଧ୍ର ସରକାରଙ୍କ ପକ୍ଷରୁ ତାଙ୍କୁ ରାଶନ, ପେନସନ, ସ୍ବାସ୍ଥ୍ୟସେବା ଆଦି ମିଳୁଛି। ଏଣୁ ନିର୍ବାଚନରେ ସାମିଲ ହୋଇ ମତଦାନ କରିବେ ବୋଲି ସେମାନେ ପ୍ରକାଶ କରିଛନ୍ତି। ଆନ୍ଧ୍ରର ଏହି ପଞ୍ଚାୟତ ନିର୍ବାଚନରେ ତାଙ୍କ ଅଞ୍ଚଳର କିଏ ପ୍ରାର୍ଥୀ ହୋଇଛି କି ବୋଲି ସେମାନଙ୍କୁ ପଚାରିବାରୁ ସେମାନେ ସନ୍ତୋଷଜନକ ଉତ୍ତର ଦେଇପାରି ନ ଥିଲେ। ସୂଚନାଯୋଗ୍ୟ, ଗତବର୍ଷ ନାରାୟଣପାଟଣା ବ୍ଲକର ଉପରୋକ୍ତ ଗ୍ରାମଗୁଡିକରେ ଆନ୍ଧ୍ର ପକ୍ଷରୁ ଜମି ମାଡି ବସିବାକୁ କେନ୍ଦ୍ରକରି କୋରାପୁଟ ଜିଲା ପ୍ରଶାସନ ଏହାର ସର୍ଭେ କରି ଆନ୍ଧ୍ର ସରକାରଙ୍କ କାର୍ଯ୍ୟକୁ ଦୃଢ ବିରୋଧ କରିଥିଲା।
